ഇറക്കുമതി; കശ്മീര്‍ ആപ്പിള്‍ വ്യാപാരികള്‍ക്ക് സംരക്ഷണം നല്‍കും

കശ്മീര്‍ ആപ്പിള്‍ വ്യാപാരികള്‍ക്ക് ഇറക്കുമതിയില്‍ നിന്ന് കൂടുതല്‍ സംരക്ഷണം നല്‍കണമെന്ന ആവശ്യം പരിഗണിക്കുമെന്ന് വാണിജ്യമന്ത്രി പിയൂഷ് ഗോയല്‍. എന്നാല്‍ കര്‍ഷകരുടെയും ഉപഭോക്താക്കളുടെയും താല്‍പ്പര്യങ്ങള്‍ സന്തുലിതമാക്കേണ്ടതിന്റെ ആവശ്യകതയും അദ്ദേഹം ഊന്നിപ്പറഞ്ഞു.

കരകൗശല വസ്തുക്കളുടെ ചരക്ക് സേവന നികുതി (ജിഎസ്ടി) കുറയ്ക്കുന്നതിനുള്ള പങ്കാളികളുടെ നിര്‍ദ്ദേശം പരിഗണിക്കുമെന്നും ഗോയല്‍ പറഞ്ഞു. ജിഎസ്ടി 12 ശതമാനത്തില്‍ നിന്ന് 5 ശതമാനമായി കുറയ്ക്കണമെന്ന് വ്യവസായം ആവശ്യപ്പെട്ടിരുന്നു.

'കേന്ദ്ര ധനകാര്യ മന്ത്രാലയവുമായും വിശദാംശങ്ങള്‍ പങ്കിടാന്‍ ഞാന്‍ അവരോട് ആവശ്യപ്പെട്ടിട്ടുണ്ട്. ഇതിനൊരു പരിഹാരം കണ്ടെത്താന്‍ ഞങ്ങള്‍ ശ്രമിക്കും,' ശ്രീനഗറില്‍ നടന്ന എഫ്ടിഐഐ ട്രേഡേഴ്സ് കോണ്‍ക്ലേവിനെ അഭിസംബോധന ചെയ്തുകൊണ്ട് അദ്ദേഹം പറഞ്ഞു.

കശ്മീരി ആപ്പിളിന് കൂടുതല്‍ സംരക്ഷണം നല്‍കണമെന്ന് വ്യവസായം അഭ്യര്‍ത്ഥിച്ചിട്ടുണ്ടെന്നും നിലവില്‍ കിലോഗ്രാമിന് 50 രൂപ കുറഞ്ഞ ഇറക്കുമതി വിലയും (എംഐപി) 50 ശതമാനം ഇറക്കുമതി തീരുവയും ഈടാക്കുന്നുണ്ടെന്നും അദ്ദേഹം പറഞ്ഞു.

ഗതാഗതം, മാര്‍ക്കറ്റിംഗ്, ബ്രാന്‍ഡിംഗ്, റീട്ടെയില്‍ എന്നിവയുള്‍പ്പെടെ എല്ലാ ചാര്‍ജുകളും ചെലവുകളും കണക്കാക്കിയ ശേഷം, ഉപഭോക്താക്കള്‍ കിലോയ്ക്ക് 125-150 രൂപ നല്‍കുന്നുണ്ടെന്നും, ഉപഭോക്താക്കളുടെയും കര്‍ഷകരുടെയും താല്‍പ്പര്യങ്ങള്‍ സന്തുലിതമാക്കേണ്ടതിന്റെ ആവശ്യകതയുണ്ടെന്നും അദ്ദേഹം പറഞ്ഞു.

നിലവില്‍, ആഭ്യന്തര വിപണിയിലെ ക്ഷാമം നികത്താന്‍ ഇന്ത്യ പ്രതിവര്‍ഷം 4.5-5 ടണ്‍ ആപ്പിള്‍ ഇറക്കുമതി ചെയ്യുന്നു.

കൂടാതെ, ഇന്ത്യന്‍ ചരക്കുകള്‍ക്കും സേവനങ്ങള്‍ക്കും കൂടുതല്‍ വിപണി പ്രവേശനം നല്‍കുന്നതിനായി ഇന്ത്യ പുതിയ സ്വതന്ത്ര വ്യാപാര കരാറുകളില്‍ (എഫ്ടിഎ) ഒപ്പുവെക്കുന്നുണ്ടെന്നും അദ്ദേഹം പറഞ്ഞു. ഈ കരാറുകളില്‍ ഇന്ത്യന്‍ വ്യവസായത്തിന്റെയും ഉപഭോക്താക്കളുടെയും താല്‍പ്പര്യം ഇന്ത്യ എപ്പോഴും സംരക്ഷിക്കുമെന്നും അദ്ദേഹം കൂട്ടിച്ചേര്‍ത്തു.

ഇന്ത്യയുമായുള്ള നിര്‍ദ്ദിഷ്ട വ്യാപാര കരാറില്‍ ആപ്പിളിന് തീരുവ ഇളവുകള്‍ നല്‍കാന്‍ അമേരിക്ക ശ്രമിക്കുന്ന സാഹചര്യത്തില്‍ ഈ പരാമര്‍ശങ്ങള്‍ക്ക് പ്രാധാന്യമുണ്ട്.