Login 
പഠിക്കാം & സമ്പാദിക്കാം 
Home
1 Aug 2023 5:00 PM IST
Summary
- സെസ്സ് യൂണിറ്റുകള്‍, ഇന്‍ഷുറന്‍സ്, നോണ്‍ ബാങ്കിങ് ഫിനാന്‍ഷ്യല്‍ കമ്പനികള്‍ തുടങ്ങി ഏതാനും വിഭാഗങ്ങളെ ഇതില്‍ നിന്നും ഒഴിവാക്കിയിട്ടുണ്ട്.
അഞ്ച് കോടി രൂപയ്ക്ക് മുകളില്‍ വാര്‍ഷിക വിറ്റുവരവുള്ള വ്യാപാരികളുടെ ബിസിനസ്-ടു-ബിസിനസ് വ്യാപാര ഇടപാടുകള്‍ക്ക് ഇന്ന് മുതല്‍ ഇ-ഇന്‍വോയ്സിങ് നിര്‍ബന്ധം. 2017-2018 സാമ്പത്തിക വര്‍ഷം മുതല്‍ 2022-23 സാമ്പത്തിക വര്‍ഷങ്ങളില്‍ ഏതെങ്കിലും വര്‍ഷത്തില്‍ അഞ്ച് കോടിയോ അതിലധികമോ വാര്‍ഷിക വിറ്റുവരവുള്ള വ്യാപാരികള്‍ ഇന്ന് മുതല്‍ ഇ-ഇന്‍വോയ്സ് തയാറാക്കണം.
ഇ-ഇന്‍വോയ്സിങ് ബാധകമായ വ്യാപാരികള്‍ നികുതി ബാധ്യതയുള്ള ചരക്കുകള്‍ക്കും, സേവനങ്ങള്‍ക്കും കൂടാതെ വ്യാപാരി നല്‍കുന്ന ക്രഡിറ്റ് അല്ലെങ്കില്‍ ഡെബിറ്റ് നോട്ടുകള്‍ക്കും ഇ-ഇന്‍വോയ്സ് തയ്യാറാക്കണം. ഇതുവരെ 10 കോടി രൂപയിലധികം വിറ്റുവരവുള്ള വ്യാപാരങ്ങള്‍ക്കാണ് ഇ-ഇന്‍വോയ്സിങ് നിര്‍ബന്ധമാക്കിയിട്ടുണ്ടായിരുന്നത്. ഇതാണ് ഇന്ന് മുതല്‍ 5 കോടി രൂപയായി കുറച്ചത്.
ഇ-ഇന്‍വോയ്സ് എടുക്കാന്‍ ബാധ്യതയുള്ള വ്യാപാരികള്‍ ചരക്കു നീക്കം നടത്തുന്നതിന് മുന്‍പ് തന്നെ ഇ-ഇന്‍വോയ്സിങ് നടത്തണം. ഇതിനായി ഇ-ഇന്‍വോയ്സ് പോര്‍ട്ടലായ https://einvoice1.gst.gov.in ല്‍ രജിസ്റ്റര്‍ ചെയ്ത് 'യൂസര്‍ ക്രെഡന്‍ഷ്യല്‍സ് ' കൈപ്പറ്റേണ്ടതാണ്. ഇ-വേ ബില്‍ പോര്‍ട്ടലില്‍ 'യൂസര്‍ ക്രെഡന്‍ഷ്യല്‍സ്' ഉള്ള വ്യാപാരികള്‍ക്ക് അതിനായുള്ള യൂസര്‍ ഐഡിയും പാസ് വേര്‍ഡും ഉപയോഗിച്ച് ഇ-ഇന്‍വോയ്സിങ് പോര്‍ട്ടലില്‍ ലോഗ് ഇന്‍ ചെയ്യാം.
ജിഎസ്ടി നിയമത്തിലെ 51 -ാം വകുപ്പ് പ്രകാരമുള്ള ടി.ഡി.എസ് (TDS) കിഴിവ് നടത്തുന്നതിനു വേണ്ടി എടുത്ത ടിഡിഎസ് രജിസ്ട്രേഷന്‍ മാത്രമുള്ള, സര്‍ക്കാര്‍/അര്‍ദ്ധ-സര്‍ക്കാര്‍ സ്ഥാപനങ്ങള്‍ക്കും, പൊതുമേഖലാ സ്ഥാപനങ്ങള്‍ക്കും ഇ-ഇന്‍വോയ്സ് ബാധകമായ സപ്ലയര്‍ നികുതി വിധേയമായ സാധനങ്ങളോ , സേവനങ്ങളോ സപ്ലൈ ചെയ്യുമ്പോള്‍ ആയത് ബിസിനസ് ടു ബിസിനസ് സപ്ലൈ ആയി പരിഗണിച്ചുകൊണ്ട് അത്തരം സ്ഥാപനങ്ങളുടെ ടിഡിഎസ് രജിസ്ട്രേഷന്‍ നമ്പറില്‍ ഇ-ഇന്‍വോയ്സ് നല്‍കേണ്ടതാണ് . പ്രസ്തുത സ്ഥാപനത്തിന് റഗുലര്‍ രജിസ്ട്രേഷന്‍ ഉണ്ടെങ്കില്‍ ഇ-ഇന്‍വോയ്സ് നല്‍കേണ്ടത് റഗുലര്‍ രജിസ്ട്രേഷന്‍ നമ്പറില്‍ തന്നെയാണ്.
ഇ-ഇന്‍വോയ്സിങ് ബാധ്യതയുള്ള വ്യാപാരി ഇ-ഇന്‍വോയ്സിങ് നടത്തിയില്ലെങ്കില്‍ സ്വീകര്‍ത്താവിന് ഇന്‍പുട്ട് ടാക്സ് ക്രെഡിറ്റിന് അര്‍ഹതയുണ്ടാവില്ല. ജി.എസ്.ടി നിയമ പ്രകാരം നികുതിരഹിതമായ ചരക്കുകള്‍ കൈകാര്യം ചെയ്യുന്ന വ്യാപാരികള്‍ക്ക് ഇ- ഇന്‍വോയ്സിങ് ആവശ്യമില്ല. സെസ്സ് യൂണിറ്റുകള്‍, ഇന്‍ഷുറന്‍സ്, നോണ്‍ ബാങ്കിങ് ഫിനാന്‍ഷ്യല്‍ കമ്പനികള്‍ അടക്കമുള്ള ബാങ്കിങ് മേഖല, ഗുഡ്സ് ട്രാന്‍സ്പോര്‍ട്ടിങ് ഏജന്‍സികള്‍, പാസഞ്ചര്‍ ട്രാന്‍സ്പോര്‍ട് സര്‍വീസ്, മള്‍ട്ടിപ്ലെക്സ് സിനിമ അഡ്മിഷന്‍, എന്നീ മേഖലകളെയും ഇ- ഇന്‍വോയ്സിങ്ങില്‍ നിന്നും ഒഴിവാക്കിയിട്ടുണ്ട്.