ബസിനുള്ളിൽ യാത്രക്കാർക്ക് ലഘു ഭക്ഷണം ലഭ്യമാക്കാന്‍ KSRTC

ബസ്സിനുള്ളിൽ യാത്രക്കാർക്ക് കുപ്പിവെള്ളം നൽകുന്ന പദ്ധതിക്ക് പിന്നാലെ ലഘു ഭക്ഷണവും വിതരണം ചെയ്യാൻ കെഎസ്ആർടിസി തയ്യാറെടുക്കുന്നു. ബസ് യാത്രകളിൽ ലഘുഭക്ഷണം നൽകിക്കൊണ്ട് യാത്രക്കാർക്ക് മെച്ചപെട്ട യാത്രാസൗകര്യം ഒരുക്കുന്നതിന്റെ ഭാഗമായാണ് പുതിയ സംരംഭം.

ബസ്സുകളിൽ ഭക്ഷണം വിതരണം ചെയ്യുന്നതിനായി താല്പര്യമുള്ളവരിൽ നിന്ന് കെ.എസ്.ആർ.ടി.സി പ്രപ്പോസലുകൾ ക്ഷണിച്ചു.

കെഎസ്ആർടിസി ചെയർമാന് ആയിരിക്കും പദ്ധതി നടത്തിപ്പു സംബന്ധിച്ച അന്തിമ തീരുമാനമെടുക്കാനുള്ള അധികാരം.

കെഎസ്ആർടിസി ബസ്സുകളിൽ കുപ്പിവെള്ളം വിതരണം ചെയ്യുന്ന പദ്ധതി കഴിഞ്ഞ ദിവസം ആരംഭിച്ചിരുന്നു. സൂപ്പർ ഫാസ്റ്റ് മുതൽ ഉയർന്ന ശ്രേണിയിലുള്ള ബസുകളിൽ നൽകുന്ന ‘ഹില്ലി അക്വാ’ ലിറ്ററിന് 15 രൂപ നിരക്കിൽ യാത്രക്കാർക്ക് വെള്ളം ലഭ്യമാക്കുന്ന പദ്ധതിക്ക് മികച്ച പ്രതികരണമാണ് ലഭിച്ചത്.

പദ്ധതിയുടെ വിശദാംശങ്ങൾ

• ബസ്സ് യാത്രകൾക്ക് അനുയോജ്യമായ ലഘു ഭക്ഷണങ്ങളാകണം ലഭ്യമാക്കേണ്ടത്.

• ലഘുഭക്ഷണങ്ങൾ പാക്കുചെയ്തതും ബസ്സ് പരിതസ്ഥിതിയിൽ എളുപ്പത്തിൽ ഉപയോഗിക്കാവുന്നതുമായിരിക്കണം.

• നിർദ്ദേശിച്ച ലഘുഭക്ഷണങ്ങൾ നിർദ്ദിഷ്ട ഗുണനിലവാരവും ശുചിത്വവും പാലിക്കുന്നതായിരിക്കണം.

• ബസ്സുകൾക്കുള്ളിൽ ഷെൽഫ്/ വെൻഡിങ് മെഷീൻ സ്ഥാപിക്കുന്നതിനുള്ള സ്ഥല സൗകര്യം കെഎസ്ആർടിസി നൽകുന്നതായിരിക്കും.

• പദ്ധതി നടത്തിപ്പിനെ സംബന്ധിച്ച അന്തിമ തീരുമാനം കെഎസ്ആർടിസി ചെയർമാൻ & മാനേജിങ് ഡയറക്ടറിൽ നിക്ഷിപ്തമായിരിക്കും

പ്രൊപ്പോസലുകൾ സമർപ്പിക്കേണ്ട മാർഗ്ഗനിർദ്ദേശങ്ങൾ

• പ്രൊപ്പോസലുകൾ മുദ്രവച്ച കവറിൽ തിരുവനന്തപുരത്തെ കെഎസ്ആർടിസി ആസ്ഥാനമായ ട്രാൻസ്പോർട്ട് ഭവനിലെ ഗ്രൗണ്ട് ഫ്ലോറിലെ തപാൽ സെക്ഷനിൽ നേരിട്ടെത്തിക്കേണ്ടതാണ്.

• ഓരോ പ്രൊപ്പോസലും "ലഘുഭക്ഷണ വിതരണത്തിനുള്ള നിർദ്ദേശം - KSRTC ബസ്സുകളിൽ" എന്ന് വ്യക്തമായി അടയാളപ്പെടുത്തി 24.05.2024 വൈകിട്ട് 5 മണിക്ക് മുൻപ് സമർപ്പിക്കണം.

കൂടുതൽ വിവരങ്ങൾക്കും അന്വേഷണങ്ങൾക്കുമായി

[email protected] എന്ന ഇ- മെയിലിലോ 9188619384 എന്ന ഫോൺ നമ്പറിലോ ബന്ധപ്പെടുക.