വിദേശ തൊഴില്‍ തേടുന്നവര്‍ ജാഗ്രതൈ! യുകെയില്‍ ഇന്ത്യാക്കാര്‍ക്ക് അവസരം കുറയും

യുകെയില്‍ ഇന്ത്യയടക്കമുള്ള രാജ്യങ്ങളിലെ ആളുകള്‍ക്ക് ഇനി തൊഴിലവസരങ്ങള്‍ കുറയും. നിര്‍മ്മാണം, എഞ്ചിനീയറിംഗ്, സാമൂഹിക പരിപാലനം തുടങ്ങിയ മേഖലകളിലാണ് തിരിച്ചടി ഉണ്ടാകാന്‍ പോകുന്നത്. ഈ മേഖലകളില്‍ ബ്രിട്ടീഷ് സര്‍ക്കാര്‍ സ്വന്തം പൗരന്‍മാരെ പരിശീലിപ്പിക്കാന്‍ പദ്ധതി ആവിഷ്‌ക്കരിച്ചു. വിദേശ തൊഴിലാളികളെ ആശ്രയിക്കുന്നത് കുറയ്ക്കുക എന്നതാണ് പ്രധാന ലക്ഷ്യം.

ആദ്യം ഏകദേശം 120,000 തൊഴിലാളികളെയാണ് പരിശീലിപ്പിക്കുക. യുകെ സര്‍ക്കാര്‍ ആരംഭിച്ച ഈ നൈപുണ്യ സംരംഭത്തിനായി മൂന്ന് ബില്യണ്‍ പൗണ്ടാണ് നീക്കിവെച്ചത്. തൊഴില്‍ ക്ഷാമം പരിഹരിക്കുന്നതിനുള്ള ശ്രമങ്ങളുടെ ഭാഗം കൂടിയാണ് ഈ നടപടി. ഇത് ഇന്ത്യയെപ്പോലുള്ള രാജ്യങ്ങള്‍ക്ക് കനത്ത ഭീഷണിയാകും.

വിദ്യാഭ്യാസ സെക്രട്ടറി ബ്രിഡ്ജറ്റ് ഫിലിപ്‌സണ്‍ പ്രഖ്യാപിച്ച, ലേബര്‍ ഗവണ്‍മെന്റിന്റെ 'നൈപുണ്യ വിപ്ലവ'ത്തില്‍ പാര്‍ലമെന്റില്‍ 30,000 പുതിയ അപ്രന്റീസ്ഷിപ്പുകള്‍ ആരംഭിക്കുന്നതും ഉള്‍പ്പെടുന്നു. വിദേശ തൊഴിലാളികളെ നിയമിക്കുന്നതിനുള്ള തൊഴിലുടമകളുടെ ലെവിയായ ഇമിഗ്രേഷന്‍ സ്‌കില്‍സ് ചാര്‍ജില്‍ 32 ശതമാനം വര്‍ദ്ധനവ് വരുത്തിയതും പ്രാദേശിക നിയമനത്തെ പ്രോത്സാഹിപ്പിക്കുക എന്നതിനെ മുന്‍നിര്‍ത്തിയാണ്.

നിലവില്‍ ഇംഗ്ലണ്ടില്‍ 16-24 വയസ്സ് പ്രായമുള്ളവരില്‍ എട്ടില്‍ ഒരാള്‍ക്ക് വിദ്യാഭ്യാസം, തൊഴില്‍, പരിശീലനം എന്നിവയില്ലെന്ന് സര്‍ക്കാര്‍ പറഞ്ഞു. ഗാര്‍ഹിക തൊഴിലാളികളെ അവശ്യ കഴിവുകള്‍ കൊണ്ട് സജ്ജരാക്കുക, ഉല്‍പ്പാദനക്ഷമത വര്‍ദ്ധിപ്പിക്കുക, എല്ലാവരെയും ഉള്‍ക്കൊള്ളുന്ന സാമ്പത്തിക നവീകരണത്തിന് അടിത്തറയിടുക എന്നിവയാണ് പദ്ധതിയുടെ ലക്ഷ്യം.

ബ്രെക്‌സിറ്റിനു ശേഷമുള്ള തൊഴില്‍ ക്ഷാമം രൂക്ഷമായ മേഖലകളില്‍, പ്രത്യേകിച്ച് 45,000 അധിക പരിശീലന അവസരങ്ങള്‍ സൃഷ്ടിക്കാനാകുമെന്ന് പ്രതീക്ഷിക്കുന്നു.

'യുവാക്കള്‍ക്ക് ഒരു തൊഴില്‍ പഠിക്കാനും, വേതനം നേടാനും, അഭിവൃദ്ധി പ്രാപിക്കാനും കൂടുതല്‍ അവസരങ്ങള്‍ നല്‍കിക്കൊണ്ട് ഞങ്ങള്‍ അടുത്ത തലമുറയെ പിന്തുണയ്ക്കുന്നു,' ഫിലിപ്‌സണ്‍ പറഞ്ഞു.

നെറ്റ് മൈഗ്രേഷന്‍ കുറയ്ക്കുന്നതിനുള്ള രാഷ്ട്രീയ സമ്മര്‍ദ്ദം വര്‍ദ്ധിക്കുന്നതിനിടയിലാണ് പരിഷ്‌കാരങ്ങള്‍ വരുന്നത്. വിദേശ തൊഴിലാളികള്‍ക്കുള്ള കര്‍ശനമായ ഇംഗ്ലീഷ് ഭാഷാ ആവശ്യകതകള്‍, കര്‍ശനമായ താമസ നിയമങ്ങള്‍ തുടങ്ങിയ നടപടികളും സമീപ ആഴ്ചകളില്‍ പ്രഖ്യാപിച്ചിട്ടുണ്ട്.