ഇന്ത്യ കൂടുതല്‍ തൊഴിലവസരങ്ങള്‍ സൃഷ്ടിക്കേണ്ടതുണ്ടെന്ന് വിദഗ്ധര്‍

ഇന്ത്യ അടുത്ത പത്ത്-പന്തണ്ട് വര്‍ഷത്തേക്ക് പ്രതിവര്‍ഷം എട്ട് ദശലക്ഷം തൊഴിലവസരങ്ങള്‍ സൃഷ്ടിക്കേണ്ടതുണ്ടെന്ന് കേന്ദ്ര സര്‍ക്കാരിന്റെ മുഖ്യ സാമ്പത്തിക ഉപദേഷ്ടാവ് വി. അനന്ത നാഗേശ്വരന്‍. 2047 ഓടെ വികസിത രാജ്യമാകാനുള്ള കാഴ്ചപ്പാട് കൈവരിക്കാന്‍ ശ്രമിക്കുന്നതിനാല്‍ ഇതോടൊപ്പം ജിഡിപിയില്‍ ഉല്‍പ്പാദനമേഖലയുടെ വിഹിതം വര്‍ധിപ്പിക്കുകയും വേണം.

കൊളംബിയ യൂണിവേഴ്സിറ്റിയിലെ സ്‌കൂള്‍ ഓഫ് ഇന്റര്‍നാഷണല്‍ ആന്‍ഡ് പബ്ലിക് അഫയേഴ്സില്‍ ദീപക് ആന്‍ഡ് നീര രാജ് സെന്റര്‍ ഓണ്‍ ഇന്ത്യന്‍ ഇക്കണോമിക് പോളിസീസ് സംഘടിപ്പിച്ച കൊളംബിയ ഇന്ത്യ ഉച്ചകോടി 2025-ല്‍ സംസാരിക്കുകയായിരുന്നു നാഗേശ്വരന്‍.

ഇന്നത്തെ വികസിത രാജ്യങ്ങള്‍ക്ക് അവരുടെ വികസന യാത്രയില്‍ നേരിടേണ്ടിവന്നിട്ടില്ലാത്ത

വെല്ലുവിളികളാണ് കൃത്രിമബുദ്ധി, സാങ്കേതികവിദ്യ, റോബോട്ടിക്‌സ് എന്നിവയെന്ന് അദ്ദേഹം വിശദീകരിച്ചു.

'എന്നാല്‍ വലിപ്പം കൊണ്ട് ഇന്ത്യ ഈ വലിയതും സങ്കീര്‍ണ്ണവുമായ വെല്ലുവിളിയെ മറികടക്കേണ്ടതുണ്ട്. ഇതിന് എളുപ്പമുള്ള ഉത്തരങ്ങളൊന്നുമില്ല. നമ്മള്‍ സൃഷ്ടിക്കേണ്ട തൊഴിലവസരങ്ങളുടെ എണ്ണം നോക്കിയാല്‍, അത് പ്രതിവര്‍ഷം ഏകദേശം 8 ദശലക്ഷം തൊഴിലവസരങ്ങളാണ്. എന്‍ട്രി ലെവല്‍ ജോലികള്‍ ഇല്ലാതാക്കുന്നതില്‍ കൃത്രിമബുദ്ധിക്ക് വലിയ പങ്കുണ്ടാകും എന്നതും ഓര്‍ക്കേണ്ടതുണ്ട്. അല്ലെങ്കില്‍ ഐടി-പ്രാപ്തമല്ലാത്ത സേവന ജോലികള്‍ ഭീഷണിയിലായേക്കാം,' അദ്ദേഹം പറഞ്ഞു.

എഐ ആധിപത്യം പുലര്‍ത്തുന്ന ഒരു ലോകത്തിനായി ജനങ്ങളെ ഒരുക്കുന്നത് ഒരു ശ്രമകരമായ കാര്യമാണ്. തൊഴില്‍ കേന്ദ്രീകൃത നയങ്ങള്‍ക്കും സാങ്കേതികവിദ്യയ്ക്കും ഇടയില്‍ ശരിയായ സന്തുലിതാവസ്ഥ കണ്ടെത്തുന്നത് മറ്റൊരു കാര്യമാണെന്നും അദ്ദേഹം കൂട്ടിച്ചേര്‍ത്തു.

സ്വാതന്ത്ര്യത്തിന്റെ ശതാബ്ദി വര്‍ഷമായ 2047-ഓടെ 'വികസിത് ഭാരത്' എന്ന കാഴ്ചപ്പാട് കൈവരിക്കുന്നതിലേക്ക് ഇന്ത്യ നീങ്ങുമ്പോള്‍, അതിന് ഇന്ത്യന്‍ ബിസിനസുകളെ ആഗോള മൂല്യ ശൃംഖലകളിലേക്ക് പ്ലഗ് ചെയ്യേണ്ടതുണ്ട്. അതുപോലെ തന്നെ ഒരു ചെറുകിട ഇടത്തരം സംരംഭ മേഖല സൃഷ്ടിക്കുകയും വേണം, കാരണം നിര്‍മ്മാണവും എംഎസ് എംഇയും ഒരുമിച്ച് പോകുന്നു.

വര്‍ധിച്ച വിദേശ നിക്ഷേപം ഉണ്ടാകുകയും വേണം. രാജ്യങ്ങള്‍ തമ്മിലുള്ള സംഘര്‍ഷങ്ങള്‍ ആഗോള മൂലധന പ്രവാഹത്തെ ബാധിക്കും എന്നതും പ്രധാനമാണ്.

ഇന്ത്യയുടെ കയറ്റുമതി മത്സരശേഷി പ്രശ്‌നമല്ലെന്ന് നാഗേശ്വരന്‍ അഭിപ്രായപ്പെട്ടു. ഗുണനിലവാരം, ഗവേഷണ വികസനം, ലോജിസ്റ്റിക്‌സ്, അവസാന മൈല്‍ കണക്റ്റിവിറ്റി എന്നിവയില്‍ ആന്തരികമായി നാം മുന്‍കൈയെടുക്കണം. കോവിഡിന് ശേഷമുള്ള കഴിഞ്ഞ മൂന്ന് വര്‍ഷങ്ങളില്‍ ഇന്ത്യയുടെ വളര്‍ച്ച ശരാശരി 8% ല്‍ കൂടുതലായിരുന്നതായും അദ്ദേഹം അഭിപ്രായപ്പെട്ടു.

നിലവിലെ സാഹചര്യത്തില്‍, 8% വളര്‍ച്ചാ നിരക്ക് നിലനിര്‍ത്തുക എന്നത് വളരെ ബുദ്ധിമുട്ടുള്ള കാര്യമാണ്. എന്നാല്‍ അടുത്ത ഒന്നോ രണ്ടോ ദശകങ്ങളില്‍ സുസ്ഥിരമായ അടിസ്ഥാനത്തില്‍ 6.5 ശതമാനം വളര്‍ച്ചാ നിരക്ക് നിലനിര്‍ത്താനും ആഭ്യന്തരമായി നിയന്ത്രണങ്ങള്‍ നീക്കുന്നതില്‍ ശ്രദ്ധ കേന്ദ്രീകരിച്ച് അവസരവാദപരമായി അത് 7 ശതമാനത്തിലധികമായി ഉയര്‍ത്താനും കഴിയുമെങ്കില്‍, അതായിരിക്കും ഏറ്റവും മികച്ച വഴിയെന്നും അദ്ദേഹം കൂട്ടിച്ചേര്‍ത്തു.

കൊളംബിയയില്‍ ഒരു ദിവസം നീണ്ടുനിന്ന പരിപാടിയില്‍ ഫാക്കല്‍റ്റി, വിദ്യാര്‍ത്ഥികള്‍, നയ വിദഗ്ധര്‍, സാമ്പത്തിക വിദഗ്ധര്‍ എന്നിവര്‍ പങ്കെടുത്തു. ഇന്ത്യയുടെ സമ്പദ്വ്യവസ്ഥ, നവീകരണം, വ്യാപാരം എന്നിവയുടെ ഭാവിയെക്കുറിച്ചുള്ള ചര്‍ച്ചയില്‍ ഈ പരിപാടി ശ്രദ്ധ കേന്ദ്രീകരിച്ചു.