വെസ്റ്റേണ്‍ യൂണിയന്‍

വെസ്റ്റേണ്‍ യൂണിയന്‍ കമ്പനി, കൊളറാഡോയിലെ ഡെന്‍വര്‍ ആസ്ഥാനമായി പ്രവര്‍ത്തിക്കുന്ന ഒരു അമേരിക്കന്‍ ബഹുരാഷ്ട്ര ധനകാര്യ സേവന കമ്പനിയാണ്. ന്യൂയോര്‍ക്കിലെ റോച്ചസ്റ്ററില്‍ 1851 ല്‍ ന്യൂയോര്‍ക്ക് ആന്‍ഡ് മിസിസിപ്പി വാലി പ്രിന്റിംഗ് ടെലിഗ്രാഫ് കമ്പനിയായി സ്ഥാപിതമായി. 1856 ല്‍ വെസ്റ്റേണ്‍ യൂണിയന്‍ ടെലിഗ്രാഫ് കമ്പനി എന്ന് പേര് മാറ്റി.

1860 മുതല്‍ 1980 വരെ അമേരിക്കന്‍ ടെലിഗ്രാഫി വ്യവസായത്തില്‍ കമ്പനി ആധിപത്യം പുലര്‍ത്തി. ടെലിഗ്രാം സന്ദേശങ്ങള്‍ കൈമാറുന്നതിനും വിതരണം ചെയ്യുന്നതിനുമുള്ള പ്രധാന ബിസിനസ്സിനു പുറമെ ടെലിഗ്രാഫ് സംബന്ധിയായ സേവനങ്ങള്‍ (വയര്‍ മണി ട്രാന്‍സ്ഫര്‍ ഉള്‍പ്പെടെ) വികസിപ്പിച്ചെടുത്ത കമ്പനി, ടെലക്‌സ് പോലുള്ള സാങ്കേതിക വിദ്യകളുടെ മുന്‍നിരക്കാരായി മാറി.

സാമ്പത്തിക ബുദ്ധിമുട്ടുകള്‍ അനുഭവപ്പെട്ടതിനെത്തുടര്‍ന്ന്, വെസ്റ്റേണ്‍ യൂണിയന്‍ 1980 കളില്‍ ആശയവിനിമയത്തില്‍ നിന്ന് തങ്ങളുടെ ബിസിനസ്സ് മാറ്റി പണം കൈമാറ്റ സേവനങ്ങളില്‍ കൂടുതല്‍ ശ്രദ്ധ കേന്ദ്രീകരിച്ചു. 2006 ല്‍ കമ്പനി അതിന്റെ ആശയവിനിമയ പ്രവര്‍ത്തനങ്ങള്‍ പൂര്‍ണ്ണമായും നിര്‍ത്തി. ഇപ്പോള്‍ ലോകത്തിലെ ഏറ്റവും വലിയ പണ കൈമാറ്റ കമ്പനിയാണ്.

ക്രോസ്-ബോര്‍ഡര്‍, ക്രോസ്-കറന്‍സി മണി മൂവ്‌മെന്റില്‍ കമ്പനി ഒരു ആഗോള നേതാവാണ്. ചെറുകിട ബിസിനസ്സുകളും ആഗോള കോര്‍പ്പറേഷനുകളും തുടങ്ങി കുടുംബങ്ങള്‍ വരെ, ഏറ്റവും വിദൂര പ്രദേശങ്ങളില്‍ നിന്ന് പോലും , വെസ്റ്റേണ്‍ യൂണിയനെ പണം കൈമാറ്റത്തിന് ആശ്രയിക്കുന്നു.

2011 ജനുവരിയില്‍, പണം കൈമാറ്റത്തിലും കുടിയേറ്റക്കാര്‍ക്കുള്ള സേവനങ്ങളിലും സജീവമായ ആഞ്ചലോ കോസ്റ്റയെ വെസ്റ്റേണ്‍ യൂണിയന്‍ ഏറ്റെടുത്തു. ആഞ്ചലോ കോസ്റ്റയ്ക്ക് യൂറോപ്പിലുടനീളം 7,500 പോയിന്റുകളുടെ വില്‍പ്പന ശൃംഖലയുണ്ട്. 200 മില്യണ്‍ യുഎസ് ഡോളറിനാണ് കരാര്‍ ഒപ്പിട്ടത്. 2011 ജൂലൈയില്‍, വെസ്റ്റേണ്‍ യൂണിയന്‍ 606 മില്യണ്‍ പൗണ്ടിന് ട്രാവെലെക്സിന്റെ ഗ്ലോബല്‍ ബിസിനസ് പേയ്മെന്റ് ഡിവിഷന്‍ ഏറ്റെടുത്തു.