Login 
പഠിക്കാം & സമ്പാദിക്കാം 
Home
15 Jun 2025 5:46 PM IST
കാലാവസ്ഥാ അധിഷ്ഠിത വിള ഇന്‍ഷുറന്‍സ്; പദ്ധതിയില്‍ തേയിലത്തോട്ടങ്ങളും
MyFin Desk
Summary
- കേന്ദ്ര തീരുമാനത്തെ സ്വാഗതം ചെയ്ത് കര്‍ഷകര്‍
- മൊത്തം തേയില ഉത്പാദനത്തിന്റെ 50 ശതമാനത്തിലധികവും ചെറുകിട കര്‍ഷകരുടേത്
പുനഃക്രമീകരിച്ച കാലാവസ്ഥാ അധിഷ്ഠിത വിള ഇന്‍ഷുറന്‍സ് പദ്ധതി കീഴില്‍ തേയിലത്തോട്ടങ്ങള്‍ കൊണ്ടുവരാനുള്ള സര്‍ക്കാര്‍ തീരുമാനത്തെ തേയില കര്‍ഷകര്‍ പ്രശംസിച്ചു. 2025 ലെ ഖാരിഫ് മുതല്‍ ഇന്‍ഷുറന്‍സ് പദ്ധതി പ്രാബല്യത്തില്‍ വരുമെന്ന് പ്രസ്താവിച്ചുകൊണ്ട് കൃഷി, കര്‍ഷകക്ഷേമ വകുപ്പ് ജൂണ്‍ 10 ന് ഒരു വിജ്ഞാപനം പുറപ്പെടുവിച്ചിരുന്നു.
കര്‍ഷകര്‍ക്ക് പദ്ധതിയുടെ പ്രയോജനം ലഭിക്കുന്നുണ്ടെന്ന് ഉറപ്പാക്കാന്‍ ജൂണ്‍ 20-നകം ടെന്‍ഡറുകള്‍ വിളിക്കല്‍, ഇന്‍ഷുറന്‍സ് കമ്പനിയുടെ അന്തിമരൂപം നല്‍കല്‍, മറ്റ് നടപടിക്രമങ്ങള്‍ എന്നിവ വേഗത്തിലാക്കാന്‍ സംസ്ഥാനങ്ങളോടും കേന്ദ്രഭരണ പ്രദേശങ്ങളോടും കേന്ദ്രം ആവശ്യപ്പെട്ടു.
കാലാവസ്ഥാ അധിഷ്ഠിത ഇന്‍ഷുറന്‍സ് പദ്ധതിയുടെ പരിധിയില്‍ ഈ മേഖലയെ കൊണ്ടുവരുന്നത് ഇതാദ്യമാണെന്ന് ഇന്ത്യന്‍ ടീ അസോസിയേഷന്‍ (ഐടിഎ) സെക്രട്ടറി ജനറല്‍ അരിജിത് റാഹ പിടിഐയോട് പറഞ്ഞു.
'ക്രമരഹിതമായ മഴ, വെള്ളക്കെട്ട്, 35 ഡിഗ്രി സെല്‍ഷ്യസ് കവിയുന്ന താപനില വര്‍ദ്ധനവ് എന്നിവ കാരണം തേയില മേഖലയില്‍ ഉല്‍പാദനത്തില്‍ പതിവായി ഏറ്റക്കുറച്ചിലുകള്‍ അനുഭവപ്പെടുന്നു. കാലാവസ്ഥാ വ്യതിയാനവുമായി പൊരുത്തപ്പെടലും ലഘൂകരണവും മേഖലയെ സുസ്ഥിരമായി നിലനിര്‍ത്തുന്നതിന് ഒരു പ്രധാന വെല്ലുവിളിയായി മാറിയിരിക്കുന്നു,' അദ്ദേഹം പറഞ്ഞു.
'ഈ സാഹചര്യത്തില്‍, കാലാവസ്ഥയെ അടിസ്ഥാനമാക്കിയുള്ള വിള ഇന്‍ഷുറന്‍സ് അനിവാര്യമാണ്. പദ്ധതി ഈ മേഖലയിലേക്കും വ്യാപിപ്പിക്കാനുള്ള കേന്ദ്രത്തിന്റെ തീരുമാനത്തെ ഞങ്ങള്‍ ഹൃദയപൂര്‍വ്വം സ്വാഗതം ചെയ്യുന്നു,' അദ്ദേഹം കൂട്ടിച്ചേര്‍ത്തു.
കഴിഞ്ഞ അഞ്ച് വര്‍ഷമായി ഇതിനുള്ള ആവശ്യം ഉയര്‍ന്നുകൊണ്ടിരിക്കുകയാണെന്ന് കോണ്‍ഫെഡറേഷന്‍ ഓഫ് ഇന്ത്യന്‍ സ്‌മോള്‍ ടീ ഗ്രോവേഴ്സ് (സിസ്റ്റ) പ്രസിഡന്റ് ബിജോയ് ഗോപാല്‍ ചക്രവര്‍ത്തി പറഞ്ഞു.
'ഈ നടപടിയെ ഞങ്ങള്‍ സ്വാഗതം ചെയ്യുന്നു. കാലാവസ്ഥാ വ്യതിയാനത്തിന്റെ പശ്ചാത്തലത്തില്‍ വിള ഇന്‍ഷുറന്‍സ് ഫലപ്രദവും ലഘൂകരിക്കുന്നതുമായ ഒരു ഘടകമാണ്. ചെറുകിട കര്‍ഷകരുടെ തേയില കൃഷി ഉയര്‍ന്ന താപനിലയും അമിത മഴയും മൂലം തകര്‍ന്നു,' അദ്ദേഹം പറഞ്ഞു.
ലോകത്തിലെ ഏറ്റവും വലിയ രണ്ടാമത്തെ തേയില ഉല്‍പ്പാദക രാജ്യമായ ഇന്ത്യ, 2024 ല്‍ 1,382 ദശലക്ഷം കിലോഗ്രാം ഉത്പാദനം റിപ്പോര്‍ട്ട് ചെയ്തു. 2023 ല്‍ 1,375 ദശലക്ഷം കിലോഗ്രാം തേയിലയാണ് ഉത്പാദിപ്പിച്ചത്. രാജ്യത്തെ മൊത്തം തേയില ഉത്പാദനത്തിന്റെ 50 ശതമാനത്തിലധികവും ചെറുകിട തേയില കര്‍ഷകരുടെ സംഭാവനയാണ്.