മിന്ത്രയുടെ പരിധിയില്‍ ഇനി സിംഗപ്പൂരും

ഫാഷന്‍ ഇ-കൊമേഴ്സ് പ്ലാറ്റ്ഫോമായ മിന്ത്ര, സിംഗപ്പൂരിലേക്ക് പ്രവര്‍ത്തനം വ്യാപിപ്പിക്കുന്നു. ഏകദേശം 650,000 ഇന്ത്യന്‍ പ്രവാസികളെ ലക്ഷ്യമിട്ടുള്ള ഈ നീക്കം, മിന്ത്രയുടെ വളര്‍ച്ചാ തന്ത്രത്തിന്റെ ഭാഗമാണെന്ന് കമ്പനി പ്രഖ്യാപിച്ചു.

വരും വര്‍ഷങ്ങളില്‍ പുതിയ ഉപഭോക്തൃ വിഭാഗങ്ങളിലേക്ക് കടന്നുചെല്ലാനും ശക്തമായ അന്താരാഷ്ട്ര ബ്രാന്‍ഡ് ബന്ധം വളര്‍ത്തിയെടുക്കാനും മിന്ത്ര ലക്ഷ്യമിടുന്നു.

മിന്ത്രയില്‍ ഇതിനകം തന്നെ ശ്രദ്ധേയമായ താല്‍പ്പര്യം സമൂഹം പ്രകടിപ്പിക്കുന്നുണ്ട്. സിംഗപ്പൂരില്‍ നിന്ന് ഏകദേശം 30,000 ഉപയോക്താക്കള്‍ നിലവിലുള്ള പ്ലാറ്റ്ഫോം സന്ദര്‍ശിച്ചിട്ടുണ്ടെന്ന് മിന്ത്ര സിഇഒ നന്ദിത സിന്‍ഹ പറഞ്ഞു.

'ലോകത്തിന് മുന്നില്‍ ഇന്ത്യന്‍ ഫാഷന്‍ അവതരിപ്പിക്കുന്നതില്‍ ശ്രദ്ധ കേന്ദ്രീകരിച്ച് സിംഗപ്പൂരില്‍ ഞങ്ങള്‍ മിന്ത്ര ഗ്ലോബല്‍ ആരംഭിച്ചു. ഇന്ത്യന്‍ പ്രവാസികളുടെ ആവശ്യങ്ങള്‍ നിറവേറ്റുന്ന, ഇന്ത്യയില്‍ നിര്‍മിച്ച ബ്രാന്‍ഡുകളാണ് ഞങ്ങള്‍ ഉപഭോക്താക്കളിലേക്ക് എത്തിക്കുന്നത്.'

'സിംഗപ്പൂര്‍ പോലുള്ള ഒരു രാജ്യത്ത് ഞങ്ങള്‍ക്ക് വലിയൊരു ഇന്ത്യന്‍ പ്രവാസി സമൂഹമുണ്ട് - ഏകദേശം 650,000 ഇന്ത്യക്കാര്‍ സിംഗപ്പൂരില്‍ താമസിക്കുന്നു. ഞങ്ങളുടെ ഡാറ്റ പരിശോധിച്ചപ്പോള്‍ ഏകദേശം 30,000 ഉപയോക്താക്കള്‍ എല്ലാ മാസവും ഞങ്ങളെ സന്ദര്‍ശിക്കുന്നുണ്ടെന്ന് ഞങ്ങള്‍ക്ക് മനസ്സിലായി. തുടര്‍ന്ന് ഞങ്ങള്‍ സിംഗപ്പൂരില്‍ മിന്ത്ര ഗ്ലോബല്‍ ആരംഭിക്കാന്‍ തീരുമാനിച്ചു,' സിന്‍ഹ പറഞ്ഞു.

വസ്ത്രങ്ങള്‍, പാദരക്ഷകള്‍, ആക്സസറികള്‍ തുടങ്ങിയ വിഭാഗങ്ങളിലായി നൂറിലധികം ഇന്ത്യന്‍ ബ്രാന്‍ഡുകളില്‍ നിന്നുള്ള ഏകദേശം 35,000 സ്‌റ്റൈലുകള്‍ മിന്ത്ര ഗ്ലോബല്‍ വെബ്സൈറ്റില്‍ പ്രദര്‍ശിപ്പിക്കും.

മിന്ത്ര ഗ്ലോബലില്‍ നല്‍കുന്ന ഓര്‍ഡറുകള്‍ ഇന്ത്യയില്‍ നിന്ന് ഷിപ്പ് ചെയ്യുകയും ശരാശരി 4-7 ദിവസത്തിനുള്ളില്‍ ഡെലിവറി ചെയ്യുകയും ചെയ്യും. മൂന്നാം കക്ഷി ക്രോസ്-ബോര്‍ഡര്‍ ലോജിസ്റ്റിക്‌സ് സേവനങ്ങളുടെ പിന്തുണയോടെയാകും ഇത്.

2007-ല്‍ സ്ഥാപിതമായതും ഇപ്പോള്‍ വാള്‍മാര്‍ട്ടിന്റെ ഉടമസ്ഥതയിലുള്ളതുമായ ഫ്‌ലിപ്കാര്‍ട്ട് ഗ്രൂപ്പിന്റെ ഭാഗമായ മിന്ത്രയ്ക്ക് പ്രതിമാസം 70 ദശലക്ഷത്തിലധികം സജീവ ഉപയോക്താക്കളും 9,700-ലധികം ബ്രാന്‍ഡുകളില്‍ നിന്നുള്ള 3.9 ദശലക്ഷത്തിലധികം സ്‌റ്റൈലുകളുടെ കാറ്റലോഗുമുണ്ട്.