മെഗാ സ്റ്റീല്‍ പ്ലാന്റ്: ഇന്ത്യ-കൊറിയ കമ്പനികള്‍ കൈകോര്‍ക്കുന്നു

ഇന്ത്യയില്‍ മെഗാ സ്റ്റീല്‍ പ്ലാന്റ് സ്ഥാപിക്കുന്നതിനായി ജെഎസ്ഡബ്ല്യു സ്റ്റീലും ദക്ഷിണ കൊറിയയിലെ പോസ്‌കോ ഗ്രൂപ്പും കൈകോര്‍ത്തു. അടുത്ത ഘട്ടമായി ഇരു കമ്പനികളും വിശദമായ സാധ്യതാ പഠനം നടത്തും. പദ്ധതിയുടെ ശേഷി പ്രതിവര്‍ഷം ആറ് ദശലക്ഷം ടണ്‍ ആയിരിക്കും.

സ്റ്റീല്‍ പ്ലാന്റ് സ്ഥാപിക്കുന്നത് സംയുക്തമായി പര്യവേക്ഷണം ചെയ്യുന്നതിനായി ഒരു നോണ്‍-ബൈന്‍ഡിംഗ് ഹെഡ്‌സ് ഓഫ് എഗ്രിമെന്റ് ഒപ്പുവച്ചതായി ജെഎസ്ഡബ്ല്യു സ്റ്റീല്‍ പ്രസ്താവനയില്‍ അറിയിച്ചു. '2024 ഒക്ടോബറില്‍ ഇരു കക്ഷികളും ഒപ്പുവച്ച ധാരണാപത്രത്തെ അടിസ്ഥാനമാക്കിയാണ് ഈ കരാര്‍ .കൂടാതെ നിര്‍ദ്ദിഷ്ട 50:50 സംയുക്ത സംരംഭത്തിനായുള്ള വിശാലമായ ചട്ടക്കൂടിന്റെ രൂപരേഖയും ഇത് നല്‍കുന്നു,' സ്റ്റീല്‍ നിര്‍മ്മാതാവ് പറഞ്ഞു.

പ്രകൃതിവിഭവ അടിത്തറയും ലോജിസ്റ്റിക് ഗുണങ്ങളും കണക്കിലെടുക്കുമ്പോള്‍, പരിഗണിക്കപ്പെടുന്ന പ്രധാന സ്ഥലങ്ങളില്‍ ഒഡീഷയും ഉള്‍പ്പെടുന്നു.

പോസ്‌കോ ഹോള്‍ഡിംഗ്സിന്റെ പ്രതിനിധി ഡയറക്ടറും പ്രസിഡന്റുമായ ലീ ജു-ടേയുടെയും ജെഎസ്ഡബ്ല്യു സ്റ്റീലിന്റെ ജോയിന്റ് മാനേജിംഗ് ഡയറക്ടറും സിഇഒയുമായ ജയന്ത് ആചാര്യയുടെയും സാന്നിധ്യത്തില്‍ മുംബൈയില്‍ വെച്ചാണ് കരാര്‍ ഒപ്പുവച്ചത്.

ജെഎസ്ഡബ്ല്യു സ്റ്റീലും ദക്ഷിണ കൊറിയയിലെ പോസ്‌കോ ഗ്രൂപ്പും തമ്മിലുള്ള തന്ത്രപരമായ സഹകരണം കൂടുതല്‍ ആഴത്തിലാക്കുന്നതിനുള്ള ഒരു സുപ്രധാന ചുവടുവയ്പ്പാണ് ഈ കരാര്‍.

23 ബില്യണ്‍ യുഎസ് ഡോളര്‍ മൂല്യമുള്ള ജെഎസ്ഡബ്ല്യു ഗ്രൂപ്പിന്റെ ഫ്‌ലാഗ്ഷിപ്പ് ബിസിനസ്സാണ് ജെഎസ്ഡബ്ല്യു സ്റ്റീല്‍. യുണൈറ്റഡ് സ്റ്റേറ്റ്‌സിലെ 1.5 എംടിപിഎ ഉള്‍പ്പെടെ 35.7 എംടിപിഎ സംയോജിത ശേഷിയുള്ള ഇന്ത്യയിലെ മുന്‍നിര സംയോജിത സ്റ്റീല്‍ ഉല്‍പ്പാദകരുമാണ് ജെഎസ്ഡബ്ല്യു സ്റ്റീല്‍.

2022-ല്‍, ദക്ഷിണ കൊറിയയിലെ പ്രമുഖ വ്യാവസായിക ഗ്രൂപ്പായ പോസ്‌കോ ഗ്രൂപ്പ്, സ്റ്റീല്‍, പുനരുപയോഗ ഊര്‍ജം തുടങ്ങിയ മേഖലകളിലെ ബിസിനസ് അവസരങ്ങള്‍ പര്യവേക്ഷണം ചെയ്യുന്നതിനായി അദാനി ഗ്രൂപ്പുമായി ഒരു കരാറില്‍ ഒപ്പുവച്ചിരുന്നു.