സില്‍വര്‍ ലൈന്‍ പദ്ധതി സംസ്ഥാന സര്‍ക്കാരിന് നേരിട്ട് ബാധ്യതയാകില്ല: കെ എന്‍ ബാലഗോപാല്‍

തിരുവനന്തപുരം: സില്‍വര്‍ലൈന്‍ പദ്ധതി സംസ്ഥാന സര്‍ക്കാരിന് നേരിട്ട് ബാധ്യതയാകില്ലെന്ന്ധനകാര്യ വകുപ്പ് മന്ത്രി കെ എന്‍ ബാലഗോപാല്‍ നിയമസഭയില്‍ വ്യക്തമാക്കി.

പദ്ധതി നടപ്പിലാക്കുന്നതിനായി ചുമതലപ്പെടുത്തിയിട്ടുള്ള സ്പെഷല്‍ പര്‍പസ് വെഹിക്കിളായ കെ-റെയില്‍ വിദേശ വായ്പാ ഏജന്‍സികള്‍ ഉള്‍പ്പെടെയുള്ള ധനകാര്യ സ്ഥാപനങ്ങളില്‍ നിന്ന് സംസ്ഥാന സര്‍ക്കാരിന്റെ ഗ്യാരണ്ടിയോടു കൂടി നേരിട്ട് വായ്പ സമാഹരിക്കും. എന്നാല്‍ അത്തരം വായ്പയിന്‍മേല്‍ സംസ്ഥാന സര്‍ക്കാരിന് ബാധ്യത വരുന്നില്ലെന്ന് ധനകാര്യ മന്ത്രി പറഞ്ഞു.

വിദേശ വായ്പയുടെ വിശദാംശങ്ങള്‍ ഇപ്പോള്‍ ചര്‍ച്ച ചെയ്യേണ്ട ഘട്ടമായിട്ടില്ലെന്നും. ഡി പി ആര്‍ കേന്ദ്രം അംഗീകരിച്ച് വിദേശ വായ്പക്ക് ശുപാര്‍ശ ചെയ്തതിന് ശേഷം മാത്രം അക്കാര്യങ്ങള്‍ പരിഗണിക്കാമെന്നും നിയമസഭയില്‍ സില്‍വര്‍ലൈന്‍ പദ്ധതിയെ കുറിച്ച് വിവിധ അംഗങ്ങള്‍ ഉന്നയിച്ച ചോദ്യങ്ങള്‍ക്ക് മറുപടിയായി അദ്ദേഹം പറഞ്ഞു.

വിവിധ ഉഭയകക്ഷി ബഹുമുഖ ധനകാര്യ സ്ഥാപനങ്ങളായ എഡിബി, ജൈക്ക, എഐഐബി, കെഎഫ്ഡബ്ല്യു എന്നിവിടങ്ങളില്‍ നിന്നും സില്‍വര്‍ലൈന്‍ പദ്ധതിക്കായി വേണ്ടി വരുന്ന 63, 941 കോടി രൂപയില്‍ 33, 700 കോടി രൂപ സമാഹരിക്കാനാണ് ലക്ഷ്യമിടുന്നത്. ഇതിന്റെ അടിസ്ഥാനത്തില്‍ ഇത്തരം ധനകാര്യ സ്ഥാപനങ്ങളെ കേന്ദ്ര ധനകാര്യമന്ത്രാലയം വഴി സമീപിക്കുകയും വിശദമായ പദ്ധതി റിപ്പോര്‍ട്ട് സമര്‍പ്പിക്കുകയും ചെയ്തു കഴിഞ്ഞു. കൂടാതെ ഇതിനോടകം തന്നെ റെയില്‍വേ ബോര്‍ഡ്, ധനകാര്യം (എക്സ്പെന്‍ഡിച്ചര്‍), നീതി ആയോഗ് എന്നീ കേന്ദ്രസര്‍ക്കാര്‍ വകുപ്പുകള്‍ വായ്പയ്ക്കായി കേന്ദ്ര സാമ്പത്തികകാര്യ മന്ത്രാലയത്തിനു പദ്ധതി ശുപാര്‍ശ ചെയ്തിട്ടുണ്ടെന്നും ധനമന്ത്രി വിശദമാക്കി.

സില്‍വര്‍ലൈന്‍ ജൈക്കയുടെ ഒഡിഎ റോളിംഗ് പ്ലാനില്‍ ഉള്‍പ്പെട്ട പദ്ധതിയാണ്. ജൈക്കയുമായി ചര്‍ച്ചകള്‍ നടത്തിയിട്ടുണ്ട്. സില്‍വര്‍ലൈന്‍ പദ്ധതിയുടെ ഡിപിആര്‍ കേന്ദ്ര സാമ്പത്തികകാര്യ വകുപ്പിനു സമര്‍പ്പിച്ചിരിക്കുകയാണ്. ഇത് വകുപ്പിന്റെ പരിശോധനാ ഘട്ടത്തിലാണ്. ഇനി സാമ്പത്തികകാര്യ മന്ത്രാലയം റിപ്പോര്‍ട്ട് അംഗീകരിച്ച് വിദേശ ധനകാര്യ സ്ഥാപനങ്ങള്‍ക്ക് ശുപാര്‍ശ ചെയ്യേണ്ടതുണ്ട്. ഇതിനു ശേഷം മാത്രമാണ് ഔദ്യോഗിക ചര്‍ച്ചകളുമായി മുമ്പോട്ടു പോകുകയെന്നും വായ്പ വ്യവസ്ഥകള്‍ ഉള്‍പ്പെടെയുള്ള മറ്റു കാര്യങ്ങളെല്ലാം ആ ഘട്ടത്തിലാണ് തീരുമാനിക്കുകയെന്നും ധനമന്ത്രി നിയമയഭയില്‍ പറഞ്ഞു.

സില്‍വര്‍ലൈനില്‍ മറ്റൊരു ബദലില്ലെന്ന് മുഖ്യമന്ത്രി പിണറായി വിജയന്‍ ഇന്നലെ സഭയില്‍ വ്യക്തമാക്കിയിരുന്നു. പദ്ധതി സംസ്ഥാനത്തെ രണ്ടായി വിഭജിക്കുമെന്നത് അടിസ്ഥാന രഹിതമാണെന്ന് പറഞ്ഞ മുഖ്യമന്ത്രി പരിസ്ഥിതിയെ കൂടി കണക്കിലെടുത്താകും പദ്ധതിയുടെ നിര്‍മ്മാണമെന്നും പറഞ്ഞിരുന്നു.

പദ്ധതി പ്രകൃതി ദുരന്തങ്ങള്‍ക്ക് ആക്കം കൂട്ടുമെന്നത് ശരിയല്ലെന്നും പരിസ്ഥിതി സൗഹൃദമായി പദ്ധതി നടപ്പാക്കാന്‍ സാധിക്കുമെന്നും മുഖ്യമന്ത്രി പറഞ്ഞിരുന്നു.

അതേസമയം സില്‍വര്‍ലൈന്‍ പദ്ധതിക്കെതിരെ സംസ്ഥാനത്ത് ശക്തമായ പ്രതിഷേധമാണ് ഉയരുന്നത്. പദ്ധതിക്കായി കല്ലിടാനെത്തുന്ന ഉദ്യോഗസ്ഥരെ തടയുന്നതും വ്യാപകമാണ്.