ദേവയാനി ഇന്റർനാഷണൽ ഓഹരികൾ 6 ശതമാനം നേട്ടത്തിൽ

റെസ്റ്റോറന്റ് ചെയിൻ ഓപ്പറേറ്റർ ദേവയാനി ഇന്റർനാഷണൽ ലിമിറ്റഡിന്റെ ഓഹരികൾ വ്യാപാരത്തിനിടയിൽ 9 ശതമാനത്തോളം ഉയർന്നു. ബിഎസ്ഇയിൽ 193 രൂപ വരെ ഓഹരി ഉയർന്നിരുന്നു. ജൂൺ പാദത്തിൽ മികച്ച മുന്നേറ്റമാണ് കമ്പനി ഉണ്ടാക്കിയത്. കമ്പനിയുടെ നികുതി കിഴിച്ചുള്ള ലാഭം 74.8 കോടി രൂപയായി. കഴിഞ്ഞ വർഷത്തിൽ ഇതേ പാദത്തിൽ 33.44 കോടി രൂപയുടെ അറ്റ നഷ്ടമാണ് റിപ്പോർട്ട് ചെയ്തത്. കമ്പനിയുടെ പ്രവർത്തനങ്ങളിൽ നിന്നുള്ള വരുമാനം 100 ശതമാനം വളർന്ന് 704.7 കോടി രൂപയായി.

ദേവയാനി ഇന്റർനാഷണൽ അതിന്റെ പ്രധാന ബ്രാൻഡുകളിലെല്ലാം ശക്തമായ പ്രകടനമാണ് കാഴ്ച വച്ചത്. ഡിമാന്റിലുള്ള തിരിച്ചുവരവും, പുതിയ സ്റ്റോറുകളുടെ വർധനവും ഈ പാദത്തിൽ സാധ്യമായി. കോവിഡുമായി ബന്ധപ്പെട്ട പ്രതിസന്ധികൾ ഇല്ലാതിരുന്നതിനാൽ 70 പുതിയ സ്റ്റോറുകളാണ് കമ്പനി ഈ പാദത്തിൽ തുടങ്ങിയത്. കെഎഫ് സിയുടെ 27 സ്റ്റോറുകളും, പിസ്സ ഹട്ടിന്റെ 23 സ്റ്റോറുകളും, കോസ്റ്റ കോഫിയുടെ 14 സ്റ്റോറുകളുമാണ് ആരംഭിച്ചത്. 2022 ജൂൺ 30 വരെയുള്ള കണക്കു പ്രകാരം, ദേവയാനി ഇന്റർനാഷണൽ 391 കെഎഫ്സി സ്റ്റോറുകളും, 436 പിസ്സ ഹട്ട് സ്റ്റോറുകളും, 69 കോസ്റ്റ കോഫീ സ്റ്റോറുകളും നടത്തുന്നുണ്ട്. ഓഹരി ഇന്ന് 5.77 ശതമാനം നേട്ടത്തിൽ 186.95 രൂപയിലാണ് വ്യാപാരം അവസാനിപ്പിച്ചത്.