ആഗോള പ്രവണത പ്രതിഫലിച്ചു; ഇരു വിപണികളിലും നേട്ടം

ആഗോള വിപണികളിലെ പോസിറ്റീവ് പ്രവണതയുടെയും വിദേശ ഫണ്ട് ഒഴുക്ക് ശക്തമായി തുടരുന്നതിന്‍റെയും പശ്ചാത്തലത്തില്‍ ഇന്ന് ആഭ്യന്തര ഓഹരി വിപണി സൂചികകൾ നേട്ടത്തില്‍ വ്യാപാരം അവസാനിപ്പിച്ചു. സൂചികയിലെ പ്രമുഖ ഓഹരികളായ റിലയൻസ് ഇൻഡസ്ട്രീസ്, ഇൻഫോസിസ്, ഐടിസി എന്നിവയിലെ ശക്തമായ വാങ്ങലാണ് വിപണിയുടെ മുന്നേറ്റത്തില്‍ വലിയൊരു പങ്ക് വഹിച്ചത്.

30-ഷെയർ ബിഎസ്ഇ സെൻസെക്‌സ് 273.67 പോയിന്റ് അഥവാ 0.42 ശതമാനം ഉയർന്ന് 65,617.84 എന്ന നിലയിലെത്തി. പകൽ സമയത്ത് ഇത് 526.42 പോയിന്റ് അഥവാ 0.80 ശതമാനം ഉയർന്ന് 65,870.59 എന്ന നിലയിലെത്തിയിരുന്നു. എൻഎസ്ഇ നിഫ്റ്റി 83.50 പോയിന്റ് അഥവാ 0.43 ശതമാനം ഉയർന്ന് 19,439.40 ൽ അവസാനിച്ചു.

സെൻസെക്‌സ് പാക്കില്‍ ഫാർമ, മാരുതി, ടാറ്റ മോട്ടോഴ്‌സ്, ഐടിസി, നെസ്‌ലെ, ലാർസൻ ആൻഡ് ടൂബ്രോ, ഇൻഫോസിസ്, ഏഷ്യൻ പെയിന്റ്‌സ്, ടൈറ്റൻ, ടെക് മഹീന്ദ്ര, പവർ ഗ്രിഡ്, റിലയൻസ് ഇൻഡസ്ട്രീസ് തുടങ്ങിയ ഓഹരികൾ നേട്ടത്തിലാണ്. ബജാജ് ഫിനാൻസ്, ആക്‌സിസ് ബാങ്ക്, എച്ച്‌സിഎൽ ടെക്‌നോളജീസ്, സ്റ്റേറ്റ് ബാങ്ക് ഓഫ് ഇന്ത്യ, എച്ച്‌ഡിഎഫ്‌സി, എച്ച്‌ഡിഎഫ്‌സി ബാങ്ക്, ഐസിഐസിഐ ബാങ്ക്, ബജാജ് ഫിൻസെർവ് എന്നിവ നഷ്ടത്തിലാണ് വ്യാപാരം അവസാനിപ്പിച്ചത്.

ഏഷ്യൻ വിപണികളിൽ സിയോൾ, ടോക്കിയോ, ഷാങ്ഹായ്, ഹോങ്കോംഗ് എന്നിവ നേട്ടത്തില്‍ വ്യാപാരം അവസാനിപ്പിച്ചു. യൂറോപ്പിലെ ഇക്വിറ്റി വിപണികൾ കൂടുതലും നേട്ടത്തിലാണ് വ്യാപാരം നടത്തിയത്. തിങ്കളാഴ്ച യുഎസ് വിപണികൾ പോസിറ്റീവ് തലത്തിലാണ് അവസാനിച്ചത്. ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.18 ശതമാനം ഉയർന്ന് ബാരലിന് 77.83 ഡോളറിലെത്തി.

എക്‌സ്‌ചേഞ്ച് ഡാറ്റ പ്രകാരം തിങ്കളാഴ്ച 588.48 കോടി രൂപയുടെ ഇക്വിറ്റികൾ വാങ്ങി വിദേശ സ്ഥാപന നിക്ഷേപകർ (എഫ്‌ഐഐകൾ) ഇന്ത്യന്‍ വിപണികളിലെ തങ്ങളുടെ വാങ്ങൽ തുടരുകയാണ്.

തിങ്കളാഴ്ച ബിഎസ്ഇ ബെഞ്ച്മാർക്ക് 63.72 പോയിന്റ് അഥവാ 0.10 ശതമാനം ഉയർന്ന് 65,344.17ലാണ് വ്യാപാരം അവസാനിപ്പിച്ചത് . നിഫ്റ്റി 24.10 പോയിന്റ് അഥവാ 0.12 ശതമാനം ഉയർന്ന് 19,355.90ൽ വ്യാപാരം അവസാനിപ്പിച്ചു.