ഓഹരി വിപണികളില്‍ തുടര്‍ച്ചയായ രണ്ടാം ദിനത്തിലും ഇടിവ്

സെൻസെക്സും നിഫ്റ്റിയും തുടർച്ചയായ രണ്ടാം സെഷനിലും നഷ്ടത്തോടെ വ്യാപാരം അവസാനിപ്പിച്ചു. സൂചികയിലെ പ്രമുഖരായ റിലയൻസ് ഇൻഡസ്ട്രീസ്, ഇൻഫോസിസ്, എൽ ആൻഡ് ടി എന്നിവയിലെ വിൽപന സമ്മർദ്ദം ബെഞ്ച്മാർക്ക് സൂചികകളെ താഴേക്ക് വലിക്കുന്നതില്‍ പ്രധാന പങ്കുവഹിച്ചതായി ട്രേഡര്‍മാര്‍ പറയുന്നു. 30-ഷെയർ ബിഎസ്ഇ സെൻസെക്‌സ് 259.52 പോയിന്റ് അഥവാ 0.41 ശതമാനം ഇടിഞ്ഞ് 62,979.37 ൽ എത്തി. പകൽ സമയത്ത്, ഇത് 364.77 പോയിന്റ് അഥവാ 0.57 ശതമാനം ഇടിഞ്ഞ് 62,874.12 താഴ്ന്ന നിലയില്‍ എത്തിയിരുന്നു. എൻഎസ്ഇ നിഫ്റ്റി 105.75 പോയിന്റ് അഥവാ 0.56 ശതമാനം ഇടിഞ്ഞ് 18,665.50ലാണ് വ്യാപാരം അവസാനിപ്പിച്ചത്.

"ആഗോള തലത്തില്‍ കേന്ദ്ര ബാങ്കുകൾ നിലവിൽ പണപ്പെരുപ്പത്തെ നേരിടുന്നതിൽ ശ്രദ്ധ കേന്ദ്രീകരിക്കുകയാണ്. യുഎസ് ഫെഡറൽ റിസർവ് ചെയർ ജെറോം പവലിന്റെ പ്രസ്‍താവനയും ബാങ്ക് ഓഫ് ഇംഗ്ലണ്ടിന്റെ അപ്രതീക്ഷിത നിരക്ക് വർദ്ധനയും ഇത് തെളിയിക്കുന്നു," , ജിയോജിത് ഫിനാൻഷ്യൽ സർവീസസിലെ ഗവേഷണ വിഭാഗം മേധാവി വിനോദ് നായർ പറഞ്ഞു.

സെൻസെക്‌സില്‍ ഏറ്റവും വലിയ നഷ്ടം നേരിട്ടത് ടാറ്റ മോട്ടോഴ്‌സാണ്, 1.77 ശതമാനം ഇടിഞ്ഞു. എസ്ബിഐ, പവർ ഗ്രിഡ്, ടാറ്റ സ്റ്റീൽ, ഇൻഫോസിസ്, അൾട്രാടെക് സിമന്റ്, ടൈറ്റൻ, ലാർസൻ ആൻഡ് ടൂബ്രോ, റിലയൻസ് ഇൻഡസ്ട്രീസ്, മാരുതി എന്നിവയാണ് നഷ്ടം നേരിട്ട മറ്റ് ഓഹരികള്‍. അതേസമയം ഇൻഡസ്ഇൻഡ് ബാങ്ക്, ഭാരതി എയർടെൽ, ഏഷ്യൻ പെയിന്റ്‌സ്, എൻടിപിസി, എച്ച്‌സിഎൽ ടെക്‌നോളജീസ്, എച്ച്‌ഡിഎഫ്‌സി, സൺ ഫാർമ എന്നിവ നേട്ടത്തിലായിരുന്നു.

"ഒരു പ്രമുഖ യുഎസ് ടെക് കമ്പനിയായ ആക്‌സെഞ്ചറിന്റെ വരുമാന പ്രതീക്ഷകള്‍ കുറച്ചത് ഇന്ത്യൻ ഐടി മേഖലയിലെ വരുമാനം സംബന്ധിച്ച് ആശങ്ക ഉയർത്തിയിട്ടുണ്ട്, ഇത് ഐടി ഓഹരികളിൽ സമ്മർദ്ദം സൃഷ്ടിച്ചിട്ടുണ്ട്. എന്നിരുന്നാലും, അനുകൂലമായ ആഭ്യന്തര സാമ്പത്തിക സൂചകങ്ങൾ കാരണം ആഭ്യന്തര വിപണിയിൽ കാര്യമായ തിരുത്തലുണ്ടാകുമെന്ന് പ്രതീക്ഷിക്കുന്നില്ല," വിനോദ് നായർ കൂട്ടിച്ചേർത്തു.

ഏഷ്യൻ വിപണികളിൽ സിയോൾ, ടോക്കിയോ, ഷാങ്ഹായ്, ഹോങ്കോങ് എന്നിവ നഷ്ടത്തിലാണ് വ്യാപാരം അവസാനിപ്പിച്ചത്. യൂറോപ്പിലെ ഇക്വിറ്റി ബെഞ്ച്മാർക്ക് സൂചികകളും നഷ്ടത്തിലാണ് വ്യാപാരം നടത്തുന്നത്. വ്യാഴാഴ്ച രാത്രി വ്യാപാരത്തിൽ യുഎസ് വിപണികൾ സമ്മിശ്രമായ തലത്തിലാണ് വ്യാപാരം അവസാനിപ്പിച്ചത്. ആഗോള എണ്ണ മാനദണ്ഡമായ ബ്രെന്റ് ക്രൂഡ് 1.11 ശതമാനം ഇടിഞ്ഞ് ബാരലിന് 73.32 ഡോളറിലെത്തി.

വിദേശ സ്ഥാപന നിക്ഷേപകർ (എഫ്‌ഐഐകൾ) വ്യാഴാഴ്ച 693.28 കോടി രൂപയുടെ ഇക്വിറ്റികൾ വിറ്റഴിച്ചുവെന്ന് എക്സ്ചേഞ്ച് ഡാറ്റ വ്യക്തമാക്കുന്നു. ബിഎസ്ഇ ബെഞ്ച്മാർക്ക് 284.26 പോയിന്റ് അഥവാ 0.45 ശതമാനം ഇടിഞ്ഞ് 63,238.89 എന്ന നിലയിലെത്തി. നിഫ്റ്റി 85.60 പോയിൻറ് അഥവാ 0.45 ശതമാനം താഴ്ന്ന് 18,771.25 ൽ അവസാനിച്ചു.