പുതുചരിത്രം , 67000 തൊട്ട് സെന്‍സെക്സ്

രാജ്യത്തെ ഓഹരി വിപണി സൂചികകളായ സെൻസെക്സും നിഫ്റ്റിയും തങ്ങളുടെ റെക്കോഡ് ബ്രേക്കിംഗ് റാലി തുടരുകയാണ്. ചരിത്രത്തിലാദ്യമായി സെന്‍സെക്സ് 67000 പോയിന്‍റ് എന്ന നാഴികക്കല്ലിന് മുകളില്‍ എത്തിയിരിക്കുകയാണ്. പുതിയ വിദേശ ഫണ്ട് ഒഴുക്കും ബാങ്കിംഗ് കൗണ്ടറുകളിലെ ശക്തമായ വാങ്ങലുകളുമാണ് ഇന്ന് വിപണിയെ മുന്നോട്ടു നയിക്കുന്നത്. തിങ്കളാഴ്ച യുഎസ് വിപണികളില്‍ പ്രകടമായ പോസിറ്റീവ് വികാരവും ആഭ്യന്തര ബെഞ്ച്മാർക്ക് സൂചികകളുടെ ശുഭാപ്തിവിശ്വാസത്തിന് കാരണമായി. റിലയന്‍സ് ഇന്‍റസ്ട്രീസും ഇന്‍ഫോസിസുമാണ് വിപണിയിലെ മുന്നേറ്റത്തെ നയിക്കുന്ന പ്രമുഖ ഓഹരികള്‍.

30-ഷെയർ ബിഎസ്ഇ സെൻസെക്‌സ് തുടക്ക വ്യാപാരത്തില്‍ 395.57 പോയിന്റ് ഉയർന്ന് 66,985.50 ലെത്തി. എൻഎസ്ഇ നിഫ്റ്റി 99.8 പോയിന്റ് ഉയർന്ന് 19,811.25 എന്ന എക്കാലത്തെയും ഉയർന്ന നിലവാരത്തിലെത്തി. പിന്നീട് നേരിയ ചാഞ്ചാട്ടം പ്രകടമാക്കുമ്പോഴും വിപണി ശക്തമായ നേട്ടത്തില്‍ തുടരുകയാണ്. മികച്ച ആദ്യ പാദ ഫലങ്ങള്‍ പുറത്തുവന്നതും നിക്ഷേപകരുടെ വികാരം ഉയര്‍ത്തി.

സെൻസെക്‌സ് പാക്കിൽ നിന്ന്, ഇൻഡസ്ഇൻഡ് ബാങ്ക്, ആക്‌സിസ് ബാങ്ക്, എച്ച്‌ഡിഎഫ്‌സി ബാങ്ക്, ഐസിഐസിഐ ബാങ്ക്, ഇൻഫോസിസ്, ഹിന്ദുസ്ഥാൻ യുണിലിവർ, മാരുതി, ഏഷ്യൻ പെയിന്റ്‌സ് എന്നിവയാണ് ഏറ്റവും കൂടുതൽ നേട്ടമുണ്ടാക്കിയത്. ഭാരതി എയർടെൽ, ടെക് മഹീന്ദ്ര, ടൈറ്റൻ, അൾട്രാടെക് സിമന്റ്, ടാറ്റ കൺസൾട്ടൻസി സർവീസസ്, ടാറ്റ സ്റ്റീൽ തുടങ്ങിയ കമ്പനികൾ നഷ്ടത്തിലാണ് വ്യാപാരം നടത്തുന്നത്. ഏഷ്യൻ വിപണികളിൽ, ടോക്കിയോ നേട്ടത്തിലാണ്. സിയോളും ഷാങ്ഹായും താഴ്ന്ന നിലയിലാണ് വ്യാപാരം നടത്തുന്നത്. ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.38 ശതമാനം ഉയർന്ന് ബാരലിന് 78.80 ഡോളറിലെത്തി.

"ആഗോള വിപണിയിലെ അന്തരീക്ഷം ബുള്ളുകൾക്ക് അനുകൂലമായി തുടരുന്നു. ഡോളറിന്‍റെ മൂല്യം കുറയുന്നതിനൊപ്പം വളർന്നുവരുന്ന വിപണികളിലേക്ക് മൂലധനം ഒഴുകുകയും ചെയ്യുന്നു, അത് വിപണിക്ക് കരുത്ത് പകരും. എന്നിരുന്നാലും ഉയർന്ന മൂല്യനിർണ്ണയവും സാധ്യമായ ലാഭ ബുക്കിംഗും റാലിയെ നിയന്ത്രിക്കും. ആരോഗ്യകരമായ ഒരു ഏകീകരണമാകും സമീപഭാവിയിലെ ഒരു പ്രവണത," ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെന്റ് സ്ട്രാറ്റജിസ്റ്റ് വി കെ വിജയകുമാർ പറഞ്ഞു.

എക്‌സ്‌ചേഞ്ച് ഡാറ്റ പ്രകാരം തിങ്കളാഴ്ച 73 കോടി രൂപയുടെ ഇക്വിറ്റികൾ വാങ്ങിയ വിദേശ സ്ഥാപന നിക്ഷേപകർ (എഫ്‌ഐഐ) ഇന്ത്യന്‍ വിപണിയില്‍ അവരുടെ വാങ്ങൽ പ്രവർത്തനം തുടർന്നു. തിങ്കളാഴ്ച ബിഎസ്ഇ ബെഞ്ച്മാർക്ക് 529.03 പോയിന്റ് അല്ലെങ്കിൽ 0.80 ശതമാനം ഉയർന്ന് അതിന്റെ എക്കാലത്തെയും ഉയർന്ന ക്ലോസിംഗ് ആയ 66,589.93ൽ എത്തി. നിഫ്റ്റി 146.95 പോയിന്റ് അഥവാ 0.75 ശതമാനം ഉയർന്ന് 19,711.45 എന്ന റെക്കോർഡ് ഉയരത്തിൽ അവസാനിച്ചു.