വിദേശനാണ്യ കരുതല്‍ ധനശേഖരത്തില്‍ വന്‍ ഇടിവ്; കുറഞ്ഞത് 7 ബില്യണ്‍ ഡോളര്‍

ആഗോള വിപണിയിലെ അനിശ്ചിതത്വങ്ങള്‍ക്കിടയില്‍ ഇന്ത്യയുടെ വിദേശനാണ്യ കരുതല്‍ ശേഖരത്തില്‍ വന്‍ ഇടിവ്. മാര്‍ച്ച് 13-ന് അവസാനിച്ച വാരത്തില്‍ 7.052 ബില്യണ്‍ ഡോളറിന്റെ കുറവാണ് രേഖപ്പെടുത്തിയത്. ഇതോടെ രാജ്യത്തിന്റെ മൊത്തം കരുതല്‍ ശേഖരം 709.759 ബില്യണ്‍ ഡോളറായി താഴ്ന്നുവെന്ന് റിസര്‍വ് ബാങ്ക് പുറത്തുവിട്ട ഏറ്റവും പുതിയ കണക്കുകള്‍ വ്യക്തമാക്കുന്നു. രൂപയുടെ മൂല്യത്തകര്‍ച്ച തടയാന്‍ ആര്‍.ബി.ഐ നടത്തിയ ഇടപെടലുകളും ആഗോള കറന്‍സികളുടെ മൂല്യത്തിലുണ്ടായ വ്യത്യാസവുമാണ് ഈ കുറവിന് പ്രധാന കാരണമായി വിലയിരുത്തുന്നത്.

കരുതല്‍ ശേഖരത്തിന്റെ നട്ടെല്ലായ വിദേശ കറന്‍സി ആസ്തികളിലാണ് ഏറ്റവും വലിയ ഇടിവ് സംഭവിച്ചത്. ഒരാഴ്ചയ്ക്കിടെ 7.678 ബില്യണ്‍ ഡോളര്‍ കുറഞ്ഞ് ഇത് 555.568 ബില്യണ്‍ ഡോളറിലെത്തി. വിദേശ വിനിമയ ശേഖരത്തിലുള്ള യൂറോ, പൗണ്ട്, യെന്‍ തുടങ്ങിയ ഡോളര്‍ ഇതര കറന്‍സികളുടെ മൂല്യത്തിലുണ്ടായ മാറ്റങ്ങളാണ് ഇതില്‍ പ്രതിഫലിക്കുന്നത്. ഫെബ്രുവരിയില്‍ 725.727 ബില്യണ്‍ ഡോളറെന്ന സര്‍വകാല റെക്കോര്‍ഡിലെത്തിയ ശേഖരം, കഴിഞ്ഞ രണ്ടാഴ്ചയായി തുടര്‍ച്ചയായി താഴേക്ക് പോകുന്നത് സാമ്പത്തിക വിദഗ്ധര്‍ ഗൗരവത്തോടെയാണ് കാണുന്നത്.

അതേസമയം, വിപണിയിലെ ആശങ്കകള്‍ക്കിടയിലും സ്വര്‍ണ ശേഖരത്തില്‍ വര്‍ദ്ധനവുണ്ടായത് ആശ്വാസകരമായി. റിപ്പോര്‍ട്ടിംഗ് കാലയളവില്‍ സ്വര്‍ണ ശേഖരം 664 മില്യണ്‍ ഡോളര്‍ ഉയര്‍ന്ന് 130.681 ബില്യണ്‍ ഡോളറിലെത്തി. എന്നാല്‍ ഇന്റര്‍നാഷണല്‍ മോണിറ്ററി ഫണ്ടിലെ ഇന്ത്യയുടെ കരുതല്‍ ധനത്തിലും സ്‌പെഷ്യല്‍ ഡ്രോയിംഗ് അവകാശങ്ങളിലും നേരിയ കുറവ് രേഖപ്പെടുത്തിയിട്ടുണ്ട്.

പശ്ചിമേഷ്യന്‍ യുദ്ധസാഹചര്യങ്ങളും വിദേശ നിക്ഷേപകരുടെ പിന്‍വാങ്ങലും രൂപയുടെ മൂല്യത്തെ ബാധിക്കുന്ന സാഹചര്യത്തില്‍, വിദേശനാണ്യ ശേഖരത്തിലെ ഈ ഇടിവ് ആര്‍.ബി.ഐക്ക് വലിയ വെല്ലുവിളിയാണ്.