ദലാല്‍ തെരുവില്‍ ഹാപ്പി വീക്കെന്‍ഡ്

മൂന്ന് ദിവസത്തെ ഇടിവിന് ശേഷം ഇന്ന് ആഭ്യന്തര ഓഹരി വിപണി സൂചികകള്‍ നേട്ടത്തിലേക്ക് തിരിച്ചെത്തി. ഐടി കൗണ്ടറുകളിലെ വാങ്ങലുകളും ആഗോള വിപണിയിലെ സമ്മിശ്ര പ്രവണതകളും നിക്ഷേപകരില്‍ സ്വാധീനം ചെലുത്തി. വലിയ തോതിലുള്ള ചാഞ്ചാട്ടം ഇന്ന് വ്യാപാരത്തിനിടെ അനുഭവപ്പെട്ടിരുന്നു. ഇന്ത്യയുടെ സേവന മേഖലയുടെ വളർച്ച ജൂലൈയിൽ 13 വർഷത്തെ ഏറ്റവും ഉയർന്ന നിലയിലെത്തിയതും ആഭ്യന്തര വിപണിക്ക് കരുത്തേകി.

ബിഎസ്ഇ സെൻസെക്‌സ് 480.57 പോയിന്റ് അഥവാ 0.73 ശതമാനം ഉയർന്ന് 65,721.25ൽ എത്തി. എൻഎസ്ഇ നിഫ്റ്റി 133.00 പോയിന്റ് അഥവാ 0.69 ശതമാനം ഉയർന്ന് 19,514.65ൽ എത്തി.

സെൻസെക്‌സ് പാക്കിൽ ടെക് മഹീന്ദ്ര, വിപ്രോ, എച്ച്‌സിഎൽ ടെക്‌നോളജീസ്, ടാറ്റ കൺസൾട്ടൻസി സർവീസസ്, ഇൻഫോസിസ്, ടൈറ്റൻ, തുടങ്ങിയ ഓഹരികൾ നേട്ടത്തിലാണ്. ജെഎസ്ഡബ്ല്യു സ്റ്റീൽ, പവർ ഗ്രിഡ്, ഹിന്ദുസ്ഥാൻ യുണിലിവർ, ടാറ്റ മോട്ടോഴ്‌സ്, ഐസിഐസിഐ ബാങ്ക്, ഐടിസി തുടങ്ങിയ ഓഹരികൾ പിന്നോക്കം പോയി.

ഏഷ്യൻ വിപണികളിൽ, ഷാങ്ഹായ്, ഹോങ്കോങ്, സിയോൾ എന്നിവ ഉയർന്നു. ടോക്കിയോയും സിഡ്‌നിയും നഷ്ടത്തില്‍ വ്യാപാരം അവസാനിപ്പിച്ചു.

വിദേശ സ്ഥാപന നിക്ഷേപകർ (എഫ്‌ഐഐകൾ) വ്യാഴാഴ്ച 317.46 കോടി രൂപയുടെ ഇക്വിറ്റികൾ വിറ്റഴിച്ചുവെന്ന് എക്സ്ചേഞ്ച് ഡാറ്റ വ്യക്തമാക്കുന്നു. സെന്‍സെക്സ് ഇന്നലെ 542.10 പോയിന്റ് അഥവാ 0.82 ശതമാനം ഇടിഞ്ഞ് 65,240.68 എന്ന നിലയിലെത്തി. നിഫ്റ്റി 144.90 പോയിന്റ് അഥവാ 0.74 ശതമാനം ഇടിഞ്ഞ് 19,381.65ലാണ് അവസാനിച്ചിരുന്നത്.