ഓഹരി വിപണിയില്‍ ബുള്‍ തരംഗം, സെന്‍സെക്‌സ് 1000 പോയിന്റ് കുതിച്ചു

രണ്ട്‌ ദിവസത്തെ ഇടിവിനു ശേഷം ഇന്ത്യൻ ഓഹരി വിപണി നേട്ടത്തിൽ വ്യാപാരം അവസാനിപ്പിച്ചു. സെൻസെക്സ് 1,006 പോയിന്റ് അഥവാ 1.27 ശതമാനം ഉയർന്ന് 80,218.37 ലും നിഫ്റ്റി 289 പോയിന്റ് അഥവാ 1.20 ശതമാനം ഉയർന്ന് 24,328.50 ലും ദിവസം അവസാനിച്ചു. ഇതോടെ ബിഎസ്ഇയിൽ ലിസ്റ്റ് ചെയ്ത കമ്പനികളുടെ മൊത്തം വിപണി മൂല്യം കഴിഞ്ഞ സെഷനിലെ ₹421.6 ലക്ഷം കോടിയിൽ നിന്ന് ₹426 ലക്ഷം കോടിയായി ഉയർന്നു.

സെൻസെക്സ് ഓഹരികൾ ( Top Gainers, Losers )

സെൻസെക്സ് ഓഹരികളിൽ റിലയൻസ് ഇൻഡസ്ട്രീസ് 5.27 ശതമാനവും മഹീന്ദ്ര ആൻഡ് മഹീന്ദ്ര 2.29 ശതമാനാവും നേട്ടമുണ്ടാക്കി. സൺ ഫാർമ, ടാറ്റ സ്റ്റീൽ, സ്റ്റേറ്റ് ബാങ്ക് ഓഫ് ഇന്ത്യ, ആക്സിസ് ബാങ്ക്, ടാറ്റ മോട്ടോഴ്‌സ്, ലാർസൺ ആൻഡ് ട്യൂബ്രോ, ഐസിഐസിഐ ബാങ്ക് എന്നി ഓഹരികളും ഇന്ന് നേട്ടമുണ്ടാക്കി. അതേസമയം എച്ച്‌സി‌എൽ ടെക്, അൾട്രാടെക് സിമന്റ്, നെസ്‌ലെ, ഹിന്ദുസ്ഥാൻ യൂണിലിവർ ഓഹരികൾ ഇടിവ് നേരിട്ടു.

സെക്ടറൽ സൂചിക

സെക്ടറൽ സൂചികകളിൽ നിഫ്റ്റി ഐടി ഒഴികെ മറ്റെല്ലാ സൂചികകളും ഇന്ന് നേട്ടത്തിൽ എത്തി. നിഫ്റ്റി ഐടി 0.22 ശതമാനം ഇടിവ് രേഖപ്പെടുത്തി. അതേസമയം റിയൽറ്റി, ഓയിൽ & ഗ്യാസ്, ഫാർമ, പി‌എസ്‌യു ബാങ്ക് എന്നിവ 1-3 ശതമാനം ഉയർന്നു.

ബി‌എസ്‌ഇ മിഡ്‌ക്യാപ് സൂചിക 1.3 ശതമാനവും സ്‌മോൾ‌ക്യാപ് സൂചിക 0.4 ശതമാനം ഉയർന്നു. ഇന്ത്യ വിക്സ് 1.26 ശതമാനം താഴ്ന്ന് 16.94 ൽ എത്തി.

ആഗോള വിപണികൾ

ഏഷ്യൻ വിപണികളിൽ, ദക്ഷിണ കൊറിയയുടെ കോസ്പി സൂചികയും ടോക്കിയോയുടെ നിക്കി 225 ഉം നേട്ടത്തിലാണ് ക്ലോസ് ചെയ്തത്, ഷാങ്ഹായ് എസ്എസ്ഇ കോമ്പോസിറ്റും ഹോങ്കോങ്ങിന്റെ ഹാങ് സെങ്ങും താഴ്ന്ന നിലയിലാണ് ക്ലോസ് ചെയ്തത്. യൂറോപ്യൻ വിപണികൾ ഉയർന്ന നിലയിലാണ് വ്യാപാരം നടത്തിയത്. വെള്ളിയാഴ്ച യുഎസ് വിപണികൾ നേട്ടത്തോടെയാണ് ക്ലോസ് ചെയ്തത്.

ആഗോള എണ്ണ മാനദണ്ഡമായ ബ്രെന്റ് ക്രൂഡ് ഓയിൽ 0.19 ശതമാനം ഇടിഞ്ഞ് ബാരലിന് 66.74 ഡോളറിലെത്തി.