ഓഹരി വിപണിയില്‍ മുന്നേറ്റം; സെന്‍സെക്സ് 300 പോയന്‍റ് നേട്ടത്തില്‍

ഇന്ത്യൻ ഓഹരി വിപണി ഇന്ന് നേട്ടത്തിൽ വ്യാപാരം അവസാനിപ്പിച്ചു. സെൻസെക്സ് 295 പോയിന്റ് അഥവാ 0.37 ശതമാനം നേട്ടത്തോടെ 80,796.84 ലും നിഫ്റ്റി 114 പോയിന്റ് അഥവാ 0.47 ശതമാനം നേട്ടത്തോടെ 24,461.15 ലും ക്ലോസ് ചെയ്തു. ഇതോടെ ബിഎസ്‌ഇയിൽ ലിസ്റ്റ് ചെയ്ത സ്ഥാപനങ്ങളുടെ മൊത്തം വിപണി മൂല്യം 423 ലക്ഷം കോടിയിൽ നിന്ന് 428 ലക്ഷം കോടിയായി ഉയർന്നു.

സെൻസെക്സ് ഓഹരികൾ ( Top Gainers, Losers )

ബജാജ് ഫിൻസെർവ്, മഹീന്ദ്ര & മഹീന്ദ്ര, എറ്റേണൽ, പവർ ഗ്രിഡ്, ഐടിസി, ടാറ്റ മോട്ടോഴ്‌സ്, ഏഷ്യൻ പെയിന്റ്‌സ്, ഹിന്ദുസ്ഥാൻ യൂണിലിവർ എന്നിവ നേട്ടമുണ്ടാക്കിയപ്പോൾ കൊട്ടക് മഹീന്ദ്ര ബാങ്ക്, സ്റ്റേറ്റ് ബാങ്ക് ഓഫ് ഇന്ത്യ, ആക്സിസ് ബാങ്ക്, ടൈറ്റാൻ, ഇൻഡസ്ഇൻഡ് ബാങ്ക് എന്നിവ നഷ്ടത്തിൽ വ്യാപാരം അവസാനിപ്പിച്ചു.

സെക്ടറൽ സൂചിക

സെക്ടറൽ സൂചികകളിൽ നിഫ്റ്റി ഐടി, മെറ്റൽ, ഫാർമ, റിയാൽറ്റി, മീഡിയ, ഓയിൽ & ​ഗ്യാസ് തുടങ്ങിയ സൂചികകൾ ഒരു ശതമാനം വീതം നേട്ടം കുറിച്ചപ്പോൾ നിഫ്റ്റി പ്രൈവറ്റ് ബാങ്ക്, പിഎസ്‍യു ബാങ്ക് എന്നി സൂചികകൾ നഷ്ട്ടം നേരിട്ടു.

ബിഎസ്ഇ മിഡ്ക്യാപ് 1.45 ശതമാനവും സ്മോൾ ക്യാപ് സൂചിക 1.23 ശതമാനം ഉയർന്നു. ഇന്ത്യ വിക്സ് 0.43 ശതമാനം ഉയർന്ന്‌ 18.34 ൽ എത്തി.

ആഗോള വിപണികൾ

ദക്ഷിണ കൊറിയ, ജപ്പാൻ, ചൈന, ഹോങ്കോംഗ് എന്നിവിടങ്ങളിലെ വിപണികൾക്ക്‌ അവധിയായിരുന്നു. യൂറോപ്യൻ വിപണികൾ സമ്മിശ്രമായാണ് വ്യാപാരം നടത്തിയത്. യുഎസ് വിപണികൾ വെള്ളിയാഴ്ച നേട്ടത്തിൽ വ്യാപാരം നടത്തി.

ആഗോള എണ്ണ മാനദണ്ഡമായ ബ്രെന്റ് ക്രൂഡ് 1.45 ശതമാനം ഇടിഞ്ഞ് ബാരലിന് 60.40 ഡോളറിലെത്തി. ഡോളറിനെതിരെ രൂപയുടെ മൂല്യം 24 പൈസ ഉയർന്ന് 84.33 ൽ ക്ലോസ് ചെയ്തു.