സെന്‍സെക്‌സ് 870 പോയന്റ് ഇടിഞ്ഞു, നിഫ്റ്റി 24,700ല്‍: മൂന്നാം ദിവസവും വിപണി നഷ്ടത്തിൽ

തുടർച്ചയായ മൂന്നാം ദിവസവും നിഫ്റ്റിയും സെൻസെക്‌സും നഷ്ടത്തിൽ വ്യാപാരം അവസാനിപ്പിച്ചു. സെൻസെക്സ് 872.98 പോയിന്റ് അഥവാ 1.06 ശതമാനം ഇടിഞ്ഞ് 81,186.44 ൽ ക്ലോസ് ചെയ്തു. നിഫ്റ്റി 261.55 പോയിന്റ് അഥവാ 1.05 ശതമാനം ഇടിഞ്ഞ് 24,683.90 ലെത്തി.

സെൻസെക്സ് ഓഹരികൾ ( Top Gainers, Losers )

സെൻസെക്സ് ഓഹരികളിൽ എറ്റേണൽ 4.10 ശതമാനം ഇടിഞ്ഞു. എച്ച്ഡിഎഫ്‌സി ബാങ്ക് 1.26 ശതമാനവും റിലയൻസ് ഇൻഡസ്ട്രീസ് 1.13 ശതമാനവും ഇടിഞ്ഞു. മാരുതി, മഹീന്ദ്ര & മഹീന്ദ്ര, അൾട്രാടെക് സിമന്റ്, പവർ ഗ്രിഡ്, നെസ്‌ലെ, ബജാജ് ഫിനാൻസ്, ഹിന്ദുസ്ഥാൻ യൂണിലിവർ, ഏഷ്യൻ പെയിന്റ്സ് എന്നി ഓഹരികളും ഇടിവ് നേരിട്ടു. ടാറ്റ സ്റ്റീൽ, ഇൻഫോസിസ്, ഐടിസി എന്നിവ മാത്രമാണ് ഇന്ന് നേട്ടമുണ്ടാക്കിയത്.

സെക്ടര്‍ സൂചിക

സെക്ടര്‍ സൂചികകളിൽ എല്ലാ മേഖലകളും ഇന്ന് നഷ്ടത്തിൽ അവസാനിച്ചു. നിഫ്റ്റി ഓട്ടോ 2.17 ശതമാനം ഇടിഞ്ഞു, തൊട്ടുപിന്നാലെ നിഫ്റ്റി എഫ്എംസിജി, ഓയിൽ & ഗ്യാസ്, ഐടി, ഫർമ എന്നിവ 1.3 - 1.7 ശതമാനം വരെ ഇടിഞ്ഞു.

ബി‌എസ്‌ഇ മിഡ്‌ക്യാപ്പ് സൂചിക 1.65 ശതമാനവും സ്‌മോൾക്യാപ്പ് സൂചിക 0.96 ശതമാനവും ശതമാനവും ഇടിഞ്ഞു. ഇന്ത്യ വിക്സ് 0.17 ശതമാനം ഉയർന്നു 17.396 ൽ എത്തി.

ആഗോള വിപണികൾ

ഏഷ്യൻ വിപണികളിൽ, ജപ്പാനിലെ നിക്കി 225 സൂചിക, ഷാങ്ഹായിലെ എസ്എസ്ഇ കോമ്പോസിറ്റ് സൂചിക, ഹോങ്കോങ്ങിലെ ഹാങ് സെങ് എന്നിവ നേട്ടത്തിലും ദക്ഷിണ കൊറിയയിലെ കോസ്പി നേരിയ നഷ്ടത്തിലും വ്യാപാരം അവസാനിപ്പിച്ചു. യൂറോപ്പിലെ വിപണികൾ നേട്ടത്തിലാണ് വ്യാപാരം നടത്തിയത്. യുഎസ് വിപണികൾ തിങ്കളാഴ്ച ഉയർന്ന് വ്യാപാരം അവസാനിപ്പിച്ചു.

ആഗോള എണ്ണ മാനദണ്ഡമായ ബ്രെന്റ് ക്രൂഡ് ഓയിൽ ബാരലിന് 0.11 ശതമാനം ഇടിഞ്ഞ് 65.47 ഡോളറിലെത്തി.