തിരിച്ചുകയറി ഓഹരി വിപണി; സെന്‍സെക്‌സ് 400 പോയിന്റ് മുന്നേറി

രണ്ടു ദിവസത്തെ ഇടിവിനു ശേഷം നിഫ്റ്റിയും സെൻസെക്‌സും ഇന്ന് നേട്ടത്തിൽ വ്യാപാരം അവസാനിപ്പിച്ചു. സെൻസെക്സ് 410.19 പോയിന്റ് അഥവാ 0.51 ശതമാനം ഉയർന്ന് 81,596.63 ൽ ക്ലോസ് ചെയ്തു. നിഫ്റ്റി 129.55 പോയിന്റ് അഥവാ 0.52 ശതമാനം ഉയർന്ന് 24,813.45 ൽ എത്തി. ഇതോടെ ബിഎസ്‌ഇയിൽ ലിസ്റ്റ് ചെയ്ത സ്ഥാപനങ്ങളുടെ വിപണി മൂല്യം കഴിഞ്ഞ സെഷനിലെ ₹438 ലക്ഷം കോടിയിൽ നിന്ന് ₹441 ലക്ഷം കോടിയായി ഉയർന്നു.

സെൻസെക്സ് ഓഹരികൾ ( Top Gainers, Losers )

സെൻസെക്സ് ഓഹരികളിൽ ബജാജ് ഫിൻസെർവ്, ടാറ്റ സ്റ്റീൽ, സൺ ഫാർമ, ടെക് മഹീന്ദ്ര, ബജാജ് ഫിനാൻസ്, എൻ‌ടി‌പി‌സി, നെസ്‌ലെ, ടാറ്റ മോട്ടോഴ്‌സ്, ഹിന്ദുസ്ഥാൻ യൂണിലിവർ, മഹീന്ദ്ര & മഹീന്ദ്ര എന്നിവയാണ് ഏറ്റവും കൂടുതൽ നേട്ടമുണ്ടാക്കിയത്. അതേസമയം ഇൻഡസ്ഇൻഡ് ബാങ്ക്, കൊട്ടക് മഹീന്ദ്ര ബാങ്ക്, പവർ ഗ്രിഡ്, ഐ‌ടി‌സി എന്നിവ നഷ്ടത്തിൽ വ്യാപാരം അവസാനിച്ചു.

സെക്ടര്‍ സൂചിക

സെക്ടര്‍ സൂചികകളിൽ നിഫ്റ്റി റിയലിറ്റിയാണ് ഏറ്റവും മികച്ച പ്രകടനം കാഴ്ചവച്ചത്, സൂചിക 1.7 ശതമാനം നേട്ടം കൈവരിച്ചു. നിഫ്റ്റി ഫാർമ 1.3 ശതമാനവും നിഫ്റ്റി പി‌എസ്‌യു ബാങ്ക് 0.7 ശതമാനവും നേട്ടം കൈവരിച്ചു. നിഫ്റ്റി ഐടി, നിഫ്റ്റി മെറ്റൽ എന്നിവ യഥാക്രമം 0.7 ശതമാനവും 0.4 ശതമാനവും നേട്ടം കൈവരിച്ചു. നിഫ്റ്റി കൺസ്യൂമർ ഡ്യൂറബിൾസ് 0.5 ശതമാനം ഇടിഞ്ഞു.

ബി‌എസ്‌ഇ മിഡ്‌ക്യാപ്പ് സൂചിക 0.90 ശതമാനവും സ്‌മോൾക്യാപ്പ് സൂചിക 0.51 ശതമാനവും ശതമാനവും ഉയർന്നു. ഇന്ത്യ വിക്സ് 0.93 ശതമാനം ഉയർന്നു 17.55 ൽ എത്തി.

ആഗോള വിപണികൾ

ഏഷ്യൻ വിപണികളിൽ, ദക്ഷിണ കൊറിയയുടെ കോസ്പി, ഷാങ്ഹായുടെ എസ്‌എസ്‌ഇ കോമ്പോസിറ്റ് സൂചിക, ഹോങ്കോങ്ങിന്റെ ഹാംഗ് സെങ് എന്നിവ നേട്ടത്തിൽ സ്ഥിരത പുലർത്തിയപ്പോൾ ജപ്പാന്റെ നിക്കി 225 സൂചിക താഴ്ന്നു. യൂറോപ്പിലെ വിപണികൾ നെഗറ്റീവ് മേഖലയിലാണ് വ്യാപാരം നടത്തിയത്. ചൊവ്വാഴ്ച യുഎസ് വിപണികൾ താഴ്ന്നു.

ആഗോള എണ്ണ മാനദണ്ഡമായ ബ്രെന്റ് ക്രൂഡ് ഓയിൽ 1.19 ശതമാനം ഉയർന്ന് ബാരലിന് 66.16 ഡോളറിലെത്തി.