നേട്ടം നിലനിർത്തി വിപണി: രൂപയ്ക്ക് ഇടിവ്, 52 പൈസയുടെ നഷ്ടം

ഇന്ത്യൻ ഓഹരി വിപണി ഇന്ന് നേട്ടത്തിൽ വ്യാപാരം അവസാനിപ്പിച്ചു. സെൻസെക്സ് 143 പോയിന്റ് ഉയർന്ന്‌ 81,481 ലും നിഫ്റ്റി 33 പോയിന്റ് ഉയർന്ന്‌ 24,855 ലും ക്ലോസ് ചെയ്തു.

സെൻസെക്സ് ഓഹരികൾ ( Top Gainers, Losers )

സെൻസെക്സ് ഓഹരികളിൽ ലാർസൻ & ട്യൂബ്രോ, സൺ ഫാർമ, എൻ‌ടി‌പി‌സി, മാരുതി, ഭാരതി എയർടെൽ, ട്രെന്റ്, ആക്സിസ് ബാങ്ക് എന്നിവ നേട്ടമുണ്ടാക്കി. അതേസമയം ടാറ്റ മോട്ടോഴ്‌സ്, പവർ ഗ്രിഡ്, എറ്റേണൽ, ബജാജ് ഫിൻ‌സെർവ്, ഹിന്ദുസ്ഥാൻ യൂണിലിവർ എന്നിവ നഷ്ടത്തിൽ വ്യാപാരം അവസാനിപ്പിച്ചു.

സെക്ടര്‍ സൂചിക

സെക്ടര്‍ സൂചികകളിൽ മീഡിയ, ഓട്ടോ, പി‌എസ്‌യു ബാങ്ക്, റിയൽറ്റി എന്നിവ 0.5 ശതമാനം വീതം ഇടിഞ്ഞു. ബി‌എസ്‌ഇ മിഡ്‌ക്യാപ് സൂചിക 0.11 ശതമാനവും സ്‌മോൾക്യാപ് സൂചിക 0.67 ശതമാനവും താഴ്ന്നു.

ആഗോള വിപണികൾ

ഏഷ്യൻ വിപണികളിൽ, ജപ്പാനിലെ നിക്കി 225 സൂചികയും ഹോങ്കോങ്ങിലെ ഹാംഗ് സെങ്ങും താഴ്ന്നപ്പോൾ ദക്ഷിണ കൊറിയയുടെ കോസ്പിയും ഷാങ്ഹായുടെ എസ്‌എസ്‌ഇ കോമ്പോസിറ്റ് സൂചികയും നേട്ടത്തിൽ അവസാനിച്ചു. യൂറോപ്യൻ വിപണികൾ സമ്മിശ്രമായാണ് വ്യാപാരം നടത്തിയത്. ചൊവ്വാഴ്ച യുഎസ് വിപണികൾ താഴ്ന്നു.

ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.44 ശതമാനം കുറഞ്ഞ് ബാരലിന് 72.19 ഡോളറിലെത്തി. ഡോളറിനെതിരെ രൂപയുടെ മൂല്യം 52 പൈസ ഇടിഞ്ഞ് 87.43 ൽ ക്ലോസ് ചെയ്തു.