നേട്ടങ്ങളെല്ലാം കൈവിട്ട് ഇന്ത്യൻ വിപണി: സെന്‍സെക്‌സ് 400 പോയിന്റ് ഇടിഞ്ഞു

ഇന്ത്യന്‍ ഓഹരി വിപണി ഇന്ന് നഷ്ടത്തിൽ വ്യാപാരം അവസാനിപ്പിച്ചു. സെന്‍സെക്‌സ് 368 പോയിന്റ് ഇടിഞ്ഞ് 80,235 ലും നിഫ്റ്റി 97 പോയിന്റ് ഇടിഞ്ഞ് 24,487 ലും ക്ലോസ് ചെയ്തു.

സെന്‍സെക്‌സ് ഓഹരികൾ

സെന്‍സെക്‌സ് ഓഹരികളില്‍ മാരുതി, ടെക് മഹീന്ദ്ര, മഹീന്ദ്ര & മഹീന്ദ്ര, എൻ‌ടി‌പി‌സി എന്നിവ നേട്ടമുണ്ടാക്കി. അതേസമയം ബജാജ് ഫിനാൻസ്, ട്രെന്റ്, ഹിന്ദുസ്ഥാൻ യൂണിലിവർ, എച്ച്ഡിഎഫ്സി ബാങ്ക്, എറ്റേണൽ, ബജാജ് ഫിൻസെർവ്, ഐസിഐസിഐ ബാങ്ക്, ഭാരത് ഇലക്ട്രോണിക്സ് എന്നിവ നഷ്ടത്തില്‍ വ്യാപാരം അവസാനിപ്പിച്ചു.

സെക്ടര്‍ സൂചികകൾ

സെക്ടര്‍ സൂചികകളില്‍ കൺസ്യൂമർ ഡ്യൂറബിൾസ് ഒഴികെ മറ്റെല്ലാ മേഖല സൂചികകളും ഇന്ന് നേട്ടം കൈവരിച്ചു. നിഫ്റ്റി ഫാർമ, മെറ്റൽ, ഓട്ടോ, ഓയിൽ & ഗ്യാസ്, പി‌എസ്‌യു ബാങ്ക്, റിയാലിറ്റി എന്നിവ 0.5-2 ശതമാനം നേട്ടമുണ്ടാക്കി. ബിഎസ്ഇ മിഡ്‌ക്യാപ് സൂചിക 0.8 ശതമാനവും സ്‌മോൾക്യാപ് സൂചിക 0.35 ശതമാനവും ഉയർന്നു.

ആഗോള വിപണികൾ

ഏഷ്യൻ വിപണികളിൽ, ദക്ഷിണ കൊറിയയുടെ കോസ്പി താഴ്ന്നപ്പോൾ, ജപ്പാനിലെ നിക്കി 225 സൂചിക, ഷാങ്ഹായുടെ എസ്‌എസ്‌ഇ കോമ്പോസിറ്റ് സൂചിക, ഹോങ്കോങ്ങിന്റെ ഹാംഗ് സെങ് എന്നിവ നേട്ടത്തിൽ അവസാനിച്ചു. യൂറോപ്യൻ വിപണികൾ സമ്മിശ്രമായാണ് വ്യാപാരം നടത്തിയത്. തിങ്കളാഴ്ച യുഎസ് വിപണികൾ താഴ്ന്നു.

ക്രൂഡ്/ രൂപ

ആഗോള എണ്ണ മാനദണ്ഡമായ ബ്രെന്റ് ക്രൂഡ് ഓയിൽ 0.18 ശതമാനം ഉയർന്ന് ബാരലിന് 66.75 ഡോളറിലെത്തി. യുഎസ് ഡോളറിനെതിരെ രൂപയുടെ മൂല്യം 3 പൈസ ഉയർന്ന് 87.72 ൽ ക്ലോസ് ചെയ്തു.