രൂപയ്ക്ക് നേട്ടം, 40 പൈസ മുന്നേറി; ഓഹരി വിപണിയിലും കുതിപ്പ്

ഇന്ത്യന്‍ ഓഹരി വിപണി ഇന്ന് നേട്ടത്തിൽ വ്യാപാരം അവസാനിപ്പിച്ചു. സെന്‍സെക്‌സ് 370 പോയിന്റ് ഉയർന്ന് 81,644 ലും നിഫ്റ്റി 103 പോയിന്റ് ഉയർന്ന് 24,980 ലും ക്ലോസ് ചെയ്തു.

സെന്‍സെക്‌സ് ഓഹരികൾ

സെന്‍സെക്‌സ് ഓഹരികളില്‍ ടാറ്റ മോട്ടോഴ്‌സ് 3.5 ശതമാനം ഉയർന്നപ്പോൾ അദാനി പോർട്ട്‌സ് 3.16 ശതമാനവും റിലയൻസ് ഇൻഡസ്ട്രീസ് 2.82 ശതമാനം ഉയർന്നു. എറ്റേണൽ, ടെക് മഹീന്ദ്ര, കൊട്ടക് മഹീന്ദ്ര ബാങ്ക്, ഹിന്ദുസ്ഥാൻ യൂണിലിവർ, മാരുതി എന്നിവയും നേട്ടമുണ്ടാക്കി. അതേസമയം ബജാജ് ഫിൻസെർവ്, പവർ ഗ്രിഡ്, മഹീന്ദ്ര & മഹീന്ദ്ര, എച്ച്‌സി‌എൽ ടെക് എന്നിവ നഷ്ടത്തിൽ വ്യാപാരം അവസാനിപ്പിച്ചു.

സെക്ടര്‍ സൂചികകൾ

സെക്ടര്‍ സൂചികകളില്‍ ഫാർമ ഒഴികെ മറ്റെല്ലാ മേഖലകളും ഇന്ന് നേട്ടത്തിലെത്തി. ടെലികോം, എഫ്എംസിജി, മീഡിയ, ഓട്ടോ, ഓയിൽ & ഗ്യാസ് സൂചികകൾ 1% വീതം ഉയർന്നു. ബിഎസ്ഇ മിഡ്‌ക്യാപ്, സ്‌മോൾക്യാപ് സൂചികകൾ 1% വീതം ഉയർന്നു.

ആഗോള വിപണികൾ

ഏഷ്യൻ വിപണികളിൽ, ദക്ഷിണ കൊറിയയുടെ കോസ്പി, ജപ്പാനിലെ നിക്കി 225 സൂചിക, ഷാങ്ഹായുടെ എസ്‌എസ്‌ഇ കോമ്പോസിറ്റ്, ഹോങ്കോങ്ങിന്റെ ഹാങ് സെങ് എന്നിവ താഴ്ന്ന നിലയിൽ ക്ലോസ് ചെയ്തു. യൂറോപ്പിലെ വിപണികൾ ഉയർന്ന നിലയിലായിരുന്നു വ്യാപാരം. തിങ്കളാഴ്ച യുഎസ് വിപണികൾ ഫ്ലാറ്റ് നോട്ടിൽ അവസാനിച്ചു.

ക്രൂഡ്/ രൂപ

ആഗോള എണ്ണ സൂചികയായ ബ്രെന്റ് ക്രൂഡ് ഓയിൽ 0.93 ശതമാനം ഇടിഞ്ഞ് ബാരലിന് 65.98 ഡോളറിലെത്തി. ഡോളറിനെതിരെ രൂപയുടെ മൂല്യം 40 പൈസ ഉയർന്ന് 86.99 ൽ ക്ലോസ് ചെയ്തു.