ഇരുവിപണികളും ഇടിവില്‍ അവസാനിച്ചു

ആഗോള വിപണിയിലെ ദുർബലമായ പ്രവണതകളും പണപ്പെരുപ്പ ആശങ്കകളും ഇന്ന് ആഭ്യന്തര ഓഹരി വിപണികളെ ഇടിവിലേക്ക് നയിച്ചു. ബിഎസ്ഇ സെൻസെക്‌സ് 434.46 പോയിന്റ് അഥവാ 0.66 ശതമാനം താഴ്ന്ന് 65,104.96 എന്ന നിലയിലെത്തി. എൻഎസ്ഇ നിഫ്റ്റി 119.40 പോയിന്റ് അഥവാ 0.61 ശതമാനം താഴ്ന്ന് 19,345.60ൽ എത്തി.

സെൻസെക്‌സ് പാക്കിൽ നിന്ന്, ഐടിസി, ആര്‍ഐഎല്‍, ഐസിഐസിഐ ബാങ്ക്, പവർ ഗ്രിഡ്, അൾട്രാടെക് സിമന്റ്, നെസ്‌ലെ, ലാർസൻ ആൻഡ് ടൂബ്രോ, ടാറ്റ മോട്ടോഴ്‌സ്, മാരുതി,എൻടിപിസി, ഇന്‍ഫോസിസ് എന്നിവയാണ് നഷ്ടം നേരിട്ട പ്രധാന ഓഹരികള്‍. ടെക് മഹീന്ദ്ര, ടൈറ്റൻ, ടാറ്റ സ്റ്റീൽ, ആക്സിസ് ബാങ്ക്, മാരുതി, സ്റ്റേറ്റ് ബാങ്ക് ഓഫ് ഇന്ത്യ, എച്ച്സിഎല്‍ ടെക്നോളജീസ് തുടങ്ങിയ ഓഹരികൾ നേട്ടത്തിലായിരുന്നു.

ഏഷ്യൻ വിപണികളിൽ, സിയോൾ, ടോക്കിയോ, ഹോങ്കോംഗ് എന്നിവ താഴ്ന്ന നിലയിലാണ് വ്യാപാരം അവസാനിപ്പിച്ചത് ഷാങ്ഹായ് നേട്ടത്തിലായിരുന്നു. ബുധനാഴ്ച യുഎസ് വിപണികൾ നെഗറ്റീവ് ടെറിട്ടറിയിലാണ് അവസാനിച്ചത്.

"വിപണികൾക്കായുള്ള ആഗോള സൂചനകൾ ദുർബലമായി തുടരുന്നു. ആഗോള ഓഹരി വിപണികളിൽ ഇപ്പോൾ രണ്ട് നെഗറ്റീവുകൾ ഉണ്ട്: ഒന്ന്, പണപ്പെരുപ്പം നിയന്ത്രിക്കാൻ ഈ നിരക്ക് വർദ്ധനവ് സൈക്കിളിൽ ഒരു നിരക്ക് വർദ്ധന കൂടി ആവശ്യമായി വന്നേക്കാമെന്ന് യുഎസ് ഫെഡ് മിനിറ്റ്സ് സൂചിപ്പിക്കുന്നു. രണ്ട്, ചൈനീസ് മാക്രോ ഡാറ്റ സൂചിപ്പിക്കുന്നത് സമ്പദ്‌വ്യവസ്ഥ നേരത്തെ ഭയന്നതിനേക്കാൾ മന്ദഗതിയിലാണ്, ഇത് ആഗോള സാമ്പത്തിക വളർച്ചയെ ബാധിക്കും. ഈ സാഹചര്യത്തിൽ ഇന്ത്യൻ വിപണി വേറിട്ടുനിന്ന് പുതിയ ഉയരങ്ങളിലേക്ക് മാറാന്‍ സാധ്യതയില്ല. എന്നിരുന്നാലും, ഒരു മൂർച്ചയുള്ള തിരുത്തൽ സാധ്യതയും ഇല്ലെന്ന് തോന്നുന്നു," ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെന്റ് സ്ട്രാറ്റജിസ്റ്റ് വി കെ വിജയകുമാർ പറഞ്ഞു.

എക്സ്ചേഞ്ച് ഡാറ്റ പ്രകാരം 722.76 കോടി രൂപയുടെ ഇക്വിറ്റികൾ ഇന്നലെ വിദേശ നിക്ഷേപക സ്ഥാപനങ്ങള്‍ (എഫ്ഐഐ) വാങ്ങി. ബിഎസ്ഇ ബെഞ്ച്മാർക്ക് 137.50 പോയിന്റ് അഥവാ 0.21 ശതമാനം ഉയർന്ന് 65,539.42 എന്ന നിലയിലാണ് ഇന്നലെ വ്യാപാരം അവസാനിപ്പിച്ചത്. നിഫ്റ്റി 30.45 പോയിന്റ് അഥവാ 0.16 ശതമാനം ഉയർന്ന് 19,465ലാണ് അവസാനിച്ചിരുന്നത്.