ഓഹരി വിപണിയിൽ വമ്പൻ കുതിപ്പ്: നിക്ഷേപകര്‍ക്ക് നേട്ടം 16 ലക്ഷം കോടി

ഇന്ത്യ- പാക് വെടിനിര്‍ത്തലിന് പിന്നാലെ ഓഹരി വിപണിയില്‍ വൻ കുതിപ്പ്. സെൻസെക്സ് 2,975 പോയിന്റ് ഉയർന്ന് 82,430 ലും നിഫ്റ്റി 916.70 പോയിന്റ് ഉയർന്ന് 24,924.70 ൽ വ്യാപാരം അവസാനിപ്പിച്ചു. ഇതോടെ ബിഎസ്ഇയിൽ ലിസ്റ്റ് ചെയ്തിട്ടുള്ള എല്ലാ കമ്പനികളുടെയും മൊത്തത്തിലുള്ള വിപണി മൂല്യം ഇന്ന് 16 ലക്ഷം കോടി വർധിച്ച് 432 ലക്ഷം കോടിയായി ഉയർന്നു.

സെൻസെക്സ് ഓഹരികൾ ( Top Gainers, Losers )

സെൻസെക്സ് ഓഹരികളിൽ ഇൻഫോസിസ് 7.91 ശതമാനം ഉയർന്നു. എച്ച്‌സി‌എൽ ടെക്, ടാറ്റ സ്റ്റീൽ, എറ്റേണൽ, ടെക് മഹീന്ദ്ര, ടാറ്റ കൺസൾട്ടൻസി സർവീസസ്, ആക്സിസ് ബാങ്ക്, ഐസിഐസിഐ ബാങ്ക്, എൻ‌ടി‌പി‌സി, റിലയൻസ് ഇൻഡസ്ട്രീസ്, ബജാജ് ഫിനാൻസ് എന്നി ഓഹരികളും മികച്ച നേട്ടം കൈവരിച്ചു. അതേസമയം സൺ ഫാർമ, ഇൻഡസ്ഇൻഡ് ബാങ്ക് എന്നി ഓഹരികൾ നഷ്ടത്തിൽ വ്യാപാരം അവസാനിപ്പിച്ചു.

സെക്ടറൽ സൂചിക

സെക്ടര്‍ സൂചികകളെല്ലാം നേട്ടത്തിലാണ്. നിഫ്റ്റി ഐടി 6.20 ശതമാനം ഉയര്‍ന്നു. റിയാലിറ്റി, പവർ, മീഡിയ,മെറ്റൽ, ഓട്ടോ എന്നീ സൂചികകൾ 4-6 ശതമാനം വരെ ഉയർന്നു.

ബിഎസ്ഇ മിഡ്ക്യാപ് സൂചിക 3.8 ശതമാനവും സ്മോൾക്യാപ് സൂചിക 4 ശതമാനവും ഉയർന്നു. ഇന്ത്യ വിക്സ് 14.97 ശതമാനം താഴ്ന്നു 18.39 ൽ എത്തി.

ആഗോള വിപണികൾ

ഏഷ്യൻ വിപണികളിൽ, ദക്ഷിണ കൊറിയയുടെ കോസ്പി, ജപ്പാന്റെ നിക്കി 225 സൂചിക, ഷാങ്ഹായുടെ എസ്‌എസ്‌ഇ കോമ്പോസിറ്റ് സൂചിക, ഹോങ്കോങ്ങിന്റെ ഹാങ് സെങ് എന്നിവ ഉയർന്ന നിലയിൽ ക്ലോസ് ചെയ്തു. യൂറോപ്പിലെ വിപണികൾ നേട്ടത്തിലാണ് വ്യാപാരം നടത്തിയത്. വെള്ളിയാഴ്ച യുഎസ് വിപണികൾ സമ്മിശ്രമായാണ് അവസാനിച്ചത്.