ഇന്ത്യൻ വിപണിക്ക് റെക്കോഡ് ക്ലോസിംഗ്

ആഭ്യന്തര സൂചികകൾ ഇന്ന് വ്യാപാരം അവസാനിപ്പിച്ചത് പുതിയ റെക്കോർഡ് ഉയരങ്ങളിൽ. വിദേശ നിക്ഷേപകരുടെ അധികരിച്ചു വന്ന വാങ്ങലും ആഗോള വിപണികളിലെ നേട്ടങ്ങളും വിപണിക്ക് താങ്ങായി. റിലയൻസ് ഓഹരികളിലെ ഉയർന്ന വാങ്ങലും കുതിപ്പിന് ആക്കം കൂട്ടി. സെൻസെക്‌സ് 494.28 പോയിൻ്റ് അഥവാ 0.67 ശതമാനം ഉയർന്ന് 74,742.50 എന്ന പുതിയ ഉയരത്തിൽ ക്ലോസ് ചെയ്തു. നിഫ്റ്റി 152.60 പോയിൻ്റ് അഥവാ 0.68 ശതമാനം ഉയർന്ന് 22,666.30 ലെത്തി.

നിഫ്റ്റിയിൽ ഐഷർ മോട്ടോർസ്, മാരുതി സുസുക്കി, മഹീന്ദ്ര ആൻഡ് മഹീന്ദ്ര, എൻടിപിസി, ജെഎസ്ഡബ്ല്യു സ്റ്റീൽ, റിലയൻസ് ഇൻഡസ്ട്രീസ്, ആക്‌സിസ് ബാങ്ക് എന്നീ ഓഹരികൾ നേട്ടത്തോടെ ക്ലോസ് ചെയ്തു. നെസ്‌ലെ, വിപ്രോ, ടാറ്റ കൺസൾട്ടൻസി സർവീസസ്, എച്ച്‌ഡിഎഫ്‌സി ബാങ്ക്, ടൈറ്റൻ, എച്ച്‌സിഎൽ ടെക്‌നോളജീസ് എന്നിവ ഇടിഞ്ഞു.

സെക്ടറൽ സൂചികയിൽ ഓട്ടോ സൂചിക രണ്ടു ശതമാനത്തോളം ഉയർന്നു. നിഫ്റ്റി റിയൽറ്റി, എനർജി, മെറ്റൽ സൂചികകൾ ഒരു ശതമാനത്തോളവും ഇടിഞ്ഞു.

ബിഎസ്ഇ മിഡ്ക്യാപ് 0.26 ശതമാനം ഉയർന്നപ്പോൾ സ്മോൾക്യാപ് സൂചിക 0.06 ശതമാനം ഇടിഞ്ഞു.

മൊത്തം 266 ഓഹരികൾ 52 ആഴ്ചയിലെ ഏറ്റവും ഉയർന്ന നിലയിലെത്തി, 12 എണ്ണം 52 ആഴ്ചയിലെ ഏറ്റവും താഴ്ന്ന നിലയിലെത്തി.

ഏഷ്യൻ വിപണികളിൽ, സിയോൾ, ടോക്കിയോ, ഹോങ്കോംഗ് എന്നിവ നേട്ടത്തോടെ ക്ലോസ് ചെയ്തു. ഷാങ്ഹായ് നഷ്ടത്തിലാണ് ക്ലോസ് ചെയ്തത്. യൂറോപ്യൻ വിപണികൾ നേട്ടത്തോടെയാണ് വ്യാപാരം നടത്തുന്നത്. വെള്ളിയാഴ്ച യു എസ് വിപണികളും നേട്ടത്തിലായിരുന്നു.

വിദേശ നിക്ഷേപ സ്ഥാപനങ്ങൾ (എഫ്ഐഐ) വെള്ളിയാഴ്ച 1,659.27 കോടി രൂപയുടെ ഓഹരികൾ വാങ്ങി. ബ്രെൻ്റ് ക്രൂഡ് 0.81 ശതമാനം ഇടിഞ്ഞ് ബാരലിന് 90.43 ഡോളറിലെത്തി. സ്വർണം ട്രോയ് ഔൺസിന് 0.46 ശതമാനം ഉയർന്ന് 2356 ഡോളറിലെത്തി. യുഎസ് ഡോളറിനെതിരെ രൂപയുടെ മൂല്യം 83.31 ലെത്തി.