തമിഴ്നാട് ബജറ്റ് സമഗ്ര വികസനം സാധ്യമാക്കും: എംസിസിഐ

ചെന്നൈ: തമിഴ്നാട് ധനമന്ത്രി പളനിവേല്‍ ത്യാഗ രാജന്‍ അവതരിപ്പിച്ച ബജറ്റ് ചില സുപ്രധാന മേഖലകള്‍ക്ക് പ്രത്യേക ഊന്നല്‍ നല്‍കുകയും സംസ്ഥാനത്തിന്റെ സമഗ്ര വികസനം സാധ്യമാക്കുന്നതിന് സാമൂഹിക മേഖലകളില്‍ വിശാലമായ സമീപനം സ്വീകരിക്കുകയും ചെയ്യുന്നതാണെന്ന് വ്യവസായ സംഘടനയായ മദ്രാസ് ചേംബര്‍ ഓഫ് കൊമേഴ്സ് ആന്‍ഡ് ഇന്‍ഡസ്ട്രി (എംസിസിഐ) അറിയിച്ചു.

നിരവധി ജില്ലകളില്‍ പുതിയ വ്യവസായ പാര്‍ക്കുകളും മൈക്രോ ഇന്‍ഡസ്ട്രി ക്ലസ്റ്ററുകളും സ്ഥാപിക്കുന്നത് സംസ്ഥാനത്തിന്റെ വിപുലമായ വികസനത്തിലേക്ക് നീങ്ങാന്‍ സഹായിക്കുമെന്ന് എംസിസിഐ പ്രസിഡന്റ് ശ്രീവത്സ് റാം പറഞ്ഞു. സൂക്ഷമ, ചെറുകിട, ഇടത്തരം സംരംഭങ്ങളെ (എംഎസ്എംഇ) സഹായിക്കുന്നതിനുള്ള സ്വാഗതാര്‍ഹമായ നീക്കമാണ് ക്രെഡിറ്റ് ഗ്യാരന്റി സ്‌കീമിനുള്ള വിഹിതം എന്നിരിക്കെ, പദ്ധതി കൂടുതല്‍ ഫലപ്രദമാക്കാന്‍ നേരത്തെയുള്ള പോരായ്മകളും പരിഹരിക്കേണ്ടതുണ്ടെന്നും അദ്ദേഹം പറഞ്ഞു. ആരോഗ്യ സംരക്ഷണം, ജലം, ശുചിത്വം, വിദ്യാഭ്യാസം, പാര്‍പ്പിടം തുടങ്ങിയ സാമൂഹിക മേഖലകളിലെ വിശാലാടിസ്ഥാനത്തിലുള്ള സമീപനം സംസ്ഥാനത്തിന്റെ സമഗ്രമായ വികസനം സാധ്യമാക്കുമെന്നും അദ്ദേഹം കൂട്ടിച്ചേര്‍ത്തു.

തുറമുഖ-മധുരവയല്‍ ഇടനാഴി, ചെന്നൈ-കന്യാകുമാരി വ്യവസായ ഇടനാഴി, മറ്റ് വികസന ഇടനാഴികള്‍ എന്നിവ വ്യാവസായിക വളര്‍ച്ചയ്ക്കും കയറ്റുമതിക്കും ഉത്തേജനം നല്‍കുമെന്ന് അദ്ദേഹം പ്രസ്താവനയില്‍ പറഞ്ഞു. സംസ്ഥാനത്തിന്റെ കട ബാധ്യത ലഘൂകരിക്കുന്നതിനായി സംസ്ഥാന ഇലക്ട്രിസിറ്റി ബോര്‍ഡ് തമിഴ്നാട് ജനറേഷന്‍ ആന്‍ഡ് ഡിസ്ട്രിബ്യൂഷന്‍ കോര്‍പ്പറേഷന്റെ (ടാംഗഡ്കോ) 13,000 കോടി രൂപയുടെ നഷ്ടം ഏറ്റെടുക്കാനുള്ള പദ്ധതിയെയും ചേംബര്‍ അഭിനന്ദിക്കുന്നു.

അതേസമയം, ബജറ്റ് വളര്‍ച്ചാ കേന്ദ്രീകൃതമാണെന്നും എസ്സി, എസ്ടി സംരംഭകരെ പ്രോത്സാഹിപ്പിക്കുന്നതിനായി തമിഴ്നാട് സ്റ്റാര്‍ട്ടപ്പ് ആന്‍ഡ് ഇന്നൊവേഷന്‍ മിഷന് (ടാന്‍സിം) 30 കോടി രൂപ അനുവദിക്കാനുള്ള സര്‍ക്കാര്‍ തീരുമാനത്തെ ട്രേഡ് ചേംബര്‍ സ്വാഗതം ചെയ്യുന്നതായും ഹിന്ദുസ്ഥാന്‍ ചേംബര്‍ ഓഫ് കൊമേഴ്സ് പ്രസിഡന്റ് കെ സുരേഷ് പറഞ്ഞു. ചെന്നൈയ്ക്ക് 500 കോടി അനുവദിച്ചത് കൂടുതല്‍ വിനോദസഞ്ചാരികളെയും നിക്ഷേപകരെയും ആകര്‍ഷിക്കുമെന്നും അദ്ദേഹം പറഞ്ഞു.