കയറ്റുമതി വര്‍ധിപ്പിക്കേണ്ടത് അനിവാര്യമെന്ന് ഗഡ്കരി

ഇന്നത്തെ ലോകത്ത് ഭീഷണിപ്പെടുത്തല്‍ നടത്തുന്ന രാജ്യങ്ങള്‍ക്ക് അങ്ങനെ ചെയ്യാന്‍ കഴിയുന്നത് അവര്‍ സാമ്പത്തികമായി ശക്തരും സാങ്കേതികവിദ്യയുള്ളവരുമായതുകൊണ്ടാണെന്ന് കേന്ദ്രമന്ത്രി നിതിന്‍ ഗഡ്കരി. വിശ്വേശ്വരയ്യ നാഷണല്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജിയില്‍ (വിഎന്‍ഐടി) സംസാരിച്ച ഗഡ്കരി, ഇന്ത്യയുടെ കയറ്റുമതി വര്‍ദ്ധിപ്പിക്കേണ്ടതിന്റെയും ഇറക്കുമതി കുറയ്‌ക്കേണ്ടതിന്റെയും ആവശ്യകതയെക്കുറിച്ചും ഊന്നിപ്പറഞ്ഞു.

'നമ്മുടെ കയറ്റുമതി നിരക്കും സമ്പദ് വ്യവസ്ഥയും വളര്‍ന്നാല്‍, നമ്മള്‍ ആരുടെയും അടുത്തേക്ക് പോകേണ്ടതില്ലെന്ന് ഞാന്‍ കരുതുന്നു. 'ദാദാഗിരി'യില്‍ മുഴുകുന്നവര്‍ അങ്ങനെ ചെയ്യുന്നത് അവര്‍ സാമ്പത്തികമായി ശക്തരായതിനാലും അവര്‍ക്ക് സാങ്കേതികവിദ്യ ഉള്ളതിനാലുമാണ്. നമുക്ക് മികച്ച സാങ്കേതികവിദ്യയും വിഭവങ്ങളും ലഭിക്കുകയാണെങ്കില്‍, നമ്മള്‍ ആരെയും ഭീഷണിപ്പെടുത്തില്ല, കാരണം ലോകത്തിന്റെ ക്ഷേമമാണ് ഏറ്റവും പ്രധാനമെന്ന് നമ്മുടെ സംസ്‌കാരം നമ്മെ പഠിപ്പിക്കുന്നു,' അദ്ദേഹം പറഞ്ഞു.

'ആഗോളതലത്തില്‍ നമ്മള്‍ വിവിധ പ്രശ്‌നങ്ങള്‍ നേരിടുന്നു, ഈ പ്രശ്‌നങ്ങള്‍ക്കെല്ലാം പരിഹാരം ശാസ്ത്രവും സാങ്കേതികവിദ്യയുമാണ്, അതായത് അറിവ്, അതൊരു ശക്തിയാണ്,' അദ്ദേഹം പറഞ്ഞു.

ഗവേഷണ സ്ഥാപനങ്ങള്‍, ഐഐടികള്‍, എഞ്ചിനീയറിംഗ് കോളേജുകള്‍ എന്നിവ രാജ്യത്തിന്റെ ആവശ്യകതകള്‍ കണക്കിലെടുത്ത് ഗവേഷണം നടത്തണമെന്ന് അദ്ദേഹം പറഞ്ഞു, മറ്റ് മേഖലകളിലെ ഗവേഷണവും ഒരുപോലെ പ്രധാനമാണെന്നും അദ്ദേഹം കൂട്ടിച്ചേര്‍ത്തു.