ബജാജ് ഫിൻസെർവിന്‌ 2,417 കോടി രൂപ നാലാംപാദ ലാഭം; വരുമാനത്തിൽ 14% കുതിപ്പ്

മാർച്ചിൽ അവസാനിച്ച നാലാം പാദത്തിൽ ബജാജ് ഫിൻസെർവ് ലിമിറ്റഡിന്റെ സംയോജിത അറ്റാദായം 14 ശതമാനം വർധിച്ച് 2,417 കോടി രൂപയായി. മുൻ സാമ്പത്തിക വര്‍ഷം ഇതേ കാലയളവിൽ അറ്റാദായം 2,119 കോടി രൂപയായിരുന്നു. 2025 മാർച്ച് പാദത്തിലെ മൊത്തം സംയോജിത വരുമാനം മുൻ സാമ്പത്തിക വർഷത്തെ ഇതേ കാലയളവിലെ 32,042 കോടി രൂപയിൽ നിന്ന് 35,596 കോടി രൂപയായി ഉയർന്നതായി കമ്പനി റെഗുലേറ്ററി ഫയലിംഗിൽ പറഞ്ഞു.

2024-25 സാമ്പത്തിക വർഷത്തിൽ, കമ്പനിയുടെ ലാഭം മുൻ സാമ്പത്തിക വർഷത്തിലെ 8,148 കോടി രൂപയിൽ നിന്ന് 9 ശതമാനം വർധിച്ച് 8,872 കോടി രൂപയായി. മൊത്തം സംയോജിത വരുമാനം മുൻ സാമ്പത്തിക വർഷത്തിലെ 1,10,383 കോടി രൂപയിൽ നിന്ന് 1,33,822 കോടി രൂപയായി ഉയർന്നു. കൂടാതെ ഓഹരി ഒന്നിന് ഒരു രൂപ അഥവാ ഒരു രൂപ മുഖവിലയുള്ള ഓഹരിയുടെ 100 ശതമാനം ലാഭവിഹിതം നൽകാനും ബോർഡ് ശുപാർശ ചെയ്തു.