ഇന്ത്യ വേറെ ലെവലെന്ന് ആര്‍ബിഐ; വിദേശനാണ്യ കരുതല്‍ ശേഖരം അതിശക്തം

രാജ്യത്തിന്റെ വിദേശനാണ്യ കരുതല്‍ ശേഖരം 11 മാസത്തെ ചരക്ക് കയറ്റുമതി നിറവേറ്റാന്‍ പര്യാപ്തമെന്ന് റിസര്‍വ് ബാങ്ക് ഓഫ് ഇന്ത്യ ഗവര്‍ണര്‍ സഞ്ജയ് മല്‍ഹോത്ര. ഇത് ആഗോള ആഘാതങ്ങളില്‍ നിന്ന് സമ്പദ് വ്യവസ്ഥയ്ക്ക് ഒരു സംരക്ഷണം നല്‍കുന്നു. മുംബൈയില്‍ നടന്ന വാര്‍ഷിക ബാങ്കിംഗ് കോണ്‍ഫറന്‍സില്‍ സംസാരിക്കുകയായിരുന്നു അദ്ദേഹം.

'രാജ്യത്തിന് വളരെ ശക്തമായ വിദേശനാണ്യ കരുതല്‍ ശേഖരമുണ്ട്. ഏറ്റവും പുതിയ കണക്കുകള്‍ പ്രകാരം അത് 695 ബില്യണ്‍ ഡോളര്‍ വരും. 11 മാസത്തെ ചരക്ക് കയറ്റുമതിക്ക് ഇത് പര്യാപ്തമാണ്,' അദ്ദേഹം പറഞ്ഞു.

'കഴിഞ്ഞ കുറച്ച് വര്‍ഷങ്ങളായി സര്‍ക്കാരും വിവിധ നിയന്ത്രണ ഏജന്‍സികളും പിന്തുടര്‍ന്ന മികച്ച സാമ്പത്തിക, ധനനയങ്ങള്‍ മൂലമാണ് ഇതെല്ലാം സാധ്യമായത്. ഘടനാപരമായ പരിഷ്‌കാരങ്ങള്‍, ഭൗതിക, ഡിജിറ്റല്‍ അടിസ്ഥാന സൗകര്യങ്ങളുടെ വന്‍തോതിലുള്ള ഉയര്‍ച്ച, മെച്ചപ്പെട്ട ഭരണം എന്നിവ ഉല്‍പ്പാദനക്ഷമതയും മത്സരശേഷിയും വര്‍ദ്ധിപ്പിച്ചു,' ഗവര്‍ണര്‍ വിശദീകരിച്ചു.

വളര്‍ച്ചയെ പിന്തുണയ്ക്കുന്നതിനൊപ്പം പണപ്പെരുപ്പം നിയന്ത്രണത്തിലാക്കുന്നതില്‍ കേന്ദ്ര ബാങ്കിന്റെ മോണിറ്ററി പോളിസി കമ്മിറ്റി (എംപിസി) ശ്രദ്ധ കേന്ദ്രീകരിക്കുന്നത് തുടരുമെന്ന് മല്‍ഹോത്ര ഊന്നിപ്പറഞ്ഞു.

'വളര്‍ച്ചയുടെ ലക്ഷ്യം കണക്കിലെടുത്ത് എംപിസി വില സ്ഥിരതയില്‍ ശ്രദ്ധ കേന്ദ്രീകരിക്കുന്നത് തുടരും. വിതരണ-വിഭാഗ നടപടികളും പണനയവും സിപിഐ പണപ്പെരുപ്പം നിയന്ത്രിക്കാന്‍ സഹായിച്ചിട്ടുണ്ട്. കര്‍ശനമായ നിയന്ത്രണങ്ങള്‍ സാമ്പത്തിക വളര്‍ച്ചയെ തടസ്സപ്പെടുത്തിയേക്കാം, സാഹചര്യം ആവശ്യപ്പെടുമ്പോള്‍ നിയമങ്ങളില്‍ ഇളവ് വരുത്തിയിട്ടുണ്ട്,' അദ്ദേഹം പറഞ്ഞു.

വ്യാപാര തടസ്സങ്ങളും ഭൗമരാഷ്ട്രീയ സംഘര്‍ഷങ്ങളും ചൂണ്ടിക്കാട്ടി മല്‍ഹോത്ര ആഗോള സാഹചര്യങ്ങള്‍ അനിശ്ചിതത്വത്തിലാണെന്നും വിശേഷിപ്പിച്ചു.