സൈപ്രസുമായി ബന്ധം മെച്ചപ്പെടുത്തുമെന്ന് പ്രധാനമന്ത്രി

സൈപ്രസുമായി ഉഭയകക്ഷി ബന്ധം കൂടുതല്‍ മെച്ചപ്പെടുത്തുമെന്ന് പ്രധാനമന്ത്രി നരേന്ദ്ര മോദി. സൈപ്രസ് പ്രസിഡന്റ് നിക്കോസ് ക്രിസ്റ്റോഡൗലിഡ്സുമായി നടന്ന ബിസിനസ് യോഗത്തില്‍ സംസാരിക്കുകയായിരുന്നു പ്രധാനമന്ത്രി.

ഇന്ത്യയില്‍ നിന്നും സൈപ്രസില്‍ നിന്നുമുള്ള ബിസിനസ്സ് നേതാക്കളെ യോഗത്തില്‍ അഭിസംബോധന ചെയ്തു.

ഉഭയകക്ഷി ബന്ധങ്ങളിലെ 'വളര്‍ച്ചയ്ക്കുള്ള വലിയ സാധ്യതകള്‍' മോദി എടുത്തുപറഞ്ഞു, സൈപ്രസ് 'വളരെക്കാലമായി ഇന്ത്യയുടെ വിശ്വസനീയ പങ്കാളിയാണ്' എന്ന് അദ്ദേഹം കൂട്ടിച്ചേര്‍ത്തു. 'പല ഇന്ത്യന്‍ കമ്പനികളും ഇതിനെ യൂറോപ്പിലേക്കുള്ള ഒരു കവാടമായി കാണുന്നു,' അദ്ദേഹം പറഞ്ഞു.

വ്യാപാരം, നിക്ഷേപം, സാമ്പത്തിക സേവനങ്ങള്‍, ഫിന്‍ടെക്, സ്റ്റാര്‍ട്ടപ്പ്, ഇന്നൊവേഷന്‍, എഐ, ഐടി, ലോജിസ്റ്റിക്‌സ്, പ്രതിരോധം, കണക്റ്റിവിറ്റി, ഷിപ്പിംഗ്, മൊബിലിറ്റി എന്നീ മേഖലകളിലെ സാമ്പത്തിക ബന്ധങ്ങള്‍ ശക്തിപ്പെടുത്താന്‍ ഇരു നേതാക്കളും ആഹ്വാനം ചെയ്തതായി വിദേശകാര്യ മന്ത്രാലയ വക്താവ് രണ്‍ധീര്‍ ജയ്സ്വാള്‍ പറഞ്ഞു.

'23 വര്‍ഷത്തിനു ശേഷം ഒരു ഇന്ത്യന്‍ പ്രധാനമന്ത്രി സൈപ്രസില്‍ എത്തിയിരിക്കുന്നു, ആദ്യത്തെ പരിപാടി ബിസിനസ് വട്ടമേശ സമ്മേളനമായിരുന്നു. സാമ്പത്തിക ലോകവുമായി ബന്ധപ്പെട്ട ആളുകള്‍ ഇന്ത്യയും സൈപ്രസും തമ്മിലുള്ള ബന്ധത്തിന് എത്രത്തോളം പ്രധാനമാണെന്ന് ഇത് സൂചിപ്പിക്കുന്നു,' എന്ന് പരിപാടിയെ അഭിസംബോധന ചെയ്തുകൊണ്ട് മോദി പറഞ്ഞു.

ഇന്ത്യയുടെ വളര്‍ച്ചയെക്കുറിച്ചും അദ്ദേഹം സംസാരിച്ചു, 'ബിസിനസ്സ് ചെയ്യുന്നതിനുള്ള വിശ്വാസ്യത'യിലും 'ബിസിനസ്സ് ചെയ്യുന്നതിനുള്ള എളുപ്പത്തിലും' രാജ്യം ഒരുപോലെ ശ്രദ്ധ കേന്ദ്രീകരിച്ചിട്ടുണ്ടെന്ന് അദ്ദേഹം പറഞ്ഞു.

പ്രധാനമന്ത്രിയുടെ സന്ദര്‍ശന വേളയില്‍, അതിര്‍ത്തി കടന്നുള്ള ഇടപാടുകള്‍ക്കായി സൈപ്രസില്‍ യുപിഐ സേവനങ്ങള്‍ അവതരിപ്പിക്കുന്നതിനായി നാഷണല്‍ പേയ്മെന്റ്‌സ് കോര്‍പ്പറേഷന്‍ ഓഫ് ഇന്ത്യയും (എന്‍പിസിഐ) യൂറോബാങ്കും തമ്മില്‍ ഒരു ധാരണാപത്രം ഒപ്പുവച്ചതായി ഉദ്യോഗസ്ഥര്‍ പറഞ്ഞു.

ലോകത്തിലെ ഇന്നത്തെ ഡിജിറ്റല്‍ ഇടപാടുകളുടെ 50 ശതമാനവും യുപിഐ മൂലം ഇന്ത്യയിലാണെന്ന് മോദി തന്റെ പ്രസംഗത്തില്‍ പറഞ്ഞു.

അതിര്‍ത്തി കടന്നുള്ള പണമൊഴുക്ക് സാധ്യമാക്കുന്നതിനായി എന്‍എസ്ഇ ഇന്റര്‍നാഷണല്‍ എക്‌സ്‌ചേഞ്ച് ഗിഫ്റ്റ് സിറ്റി സൈപ്രസ് സ്റ്റോക്ക് എക്‌സ്‌ചേഞ്ചുമായി ഒരു ധാരണാപത്രത്തില്‍ ഒപ്പുവച്ചു.

യൂറോപ്പും ഗിഫ്റ്റ് സിറ്റി ഇന്ത്യയും തമ്മിലുള്ള ഇത്തരത്തിലുള്ള ആദ്യ കരാറാണിതെന്നും ഗിഫ്റ്റ് സിറ്റി, സൈപ്രസ്, യൂറോപ്പ് എന്നിവിടങ്ങളിലെ നിക്ഷേപകര്‍ക്ക് ഇത് ഗുണം ചെയ്യുമെന്നും ഉദ്യോഗസ്ഥര്‍ പറഞ്ഞു.

പ്രധാനമന്ത്രി മോദി ലാര്‍നാക്ക അന്താരാഷ്ട്ര വിമാനത്താവളത്തില്‍ എത്തിയപ്പോള്‍, ക്രിസ്റ്റോഡൗലിഡ്‌സ് നേരിട്ടെത്തി അദ്ദേഹത്തെ സ്വീകരിച്ചു.

ഇന്ത്യയും സൈപ്രസും തമ്മിലുള്ള ഉഭയകക്ഷി വ്യാപാരം സമീപ വര്‍ഷങ്ങളില്‍ ഏറ്റക്കുറച്ചിലുകള്‍ക്കിടയിലും സ്ഥിരത പുലര്‍ത്തുന്നു, 2023 ഏപ്രില്‍ മുതല്‍ 2024 മാര്‍ച്ച് വരെ ഇത് 136.96 മില്യണ്‍ യുഎസ് ഡോളറായിരുന്നുവെന്ന് വിദേശകാര്യ മന്ത്രാലയത്തിന്റെ കണക്കുകള്‍ സൂചിപ്പിക്കുന്നു.