Login 
പഠിക്കാം & സമ്പാദിക്കാം 
Home
18 March 2026 4:24 PM IST
Summary
ചൈനയ്ക്ക് ലഭിക്കേണ്ടിയിരുന്ന റഷ്യന് ഇന്ധനം ഇപ്പോള് ഇന്ത്യയുടെ ഊര്ജ്ജ സുരക്ഷ ഉറപ്പാക്കാന് ഉപയോഗിക്കപ്പെടുകയാണ്. മാറുന്ന ഭൗമരാഷ്ട്രീയ സാഹചര്യങ്ങളില് ഇന്ത്യ ഒരു പ്രധാന ഊര്ജ്ജ ഹബ്ബായി മാറുന്നതിന്റെ സൂചനയാണിത്
ലോകം ഒരു വന് ഊര്ജ്ജ പ്രതിസന്ധിയെ അഭിമുഖീകരിക്കവെ, കടല്പ്പാതകളില് നാടകീയ നീക്കങ്ങള്. ചൈനയിലെ റിഷാവോ തുറമുഖത്തേക്ക് ലക്ഷ്യം വെച്ചിരുന്ന 'അക്വാ ടൈറ്റന്' എന്ന റഷ്യന് ഭീമന് എണ്ണക്കപ്പല് പെട്ടെന്ന് ഗതിമാറ്റി ഇന്ത്യയിലെ ന്യൂ മാംഗ്ലൂര് തുറമുഖത്തേക്ക് കുതിക്കുന്നു. യുഎസ്-ഇറാന് സംഘര്ഷത്തെത്തുടര്ന്ന് ഹോര്മുസ് കടലിടുക്ക് അടച്ചതോടെ ഉണ്ടായ വിതരണ തടസ്സം മറികടക്കാന് റഷ്യയില് നിന്നുള്ള എണ്ണ ഇറക്കുമതിക്ക് യുഎസ് പച്ചക്കൊടി കാട്ടിയതിന് പിന്നാലെയാണിത്.
റഷ്യയുടെ 'യുറല്സ് ക്രൂഡുമായി' എത്തുന്ന അക്വാ ടൈറ്റന് മാത്രമല്ല, ഇതുപോലെ ചൈനയിലേക്ക് പോകാനിരുന്ന ഏഴോളം കപ്പലുകളാണ് റൂട്ട് മാറ്റി ഇപ്പോള് ഇന്ത്യന് തീരമണയുന്നത്. കസാക്കിസ്ഥാനില് നിന്നുള്ള എണ്ണയുമായി വരുന്ന 'സൂസോ എന്' എന്ന സൂയസ്മാക്സ് കപ്പലും ലക്ഷ്യസ്ഥാനം മാറ്റി ഗുജറാത്തിലെ സിക്ക തുറമുഖത്തേക്ക് അടുക്കുകയാണ്. മിഡില് ഈസ്റ്റില് നിന്നുള്ള എണ്ണ ലഭ്യത കുറഞ്ഞതോടെ, വെറും ഒരാഴ്ചയ്ക്കുള്ളില് 30 ദശലക്ഷം ബാരല് റഷ്യന് എണ്ണയ്ക്കായി ഇന്ത്യന് റിഫൈനറികള് കരാര് ഉറപ്പിച്ചു കഴിഞ്ഞു.
യുദ്ധസമാനമായ സാഹചര്യങ്ങള്ക്കിടയിലും ഇന്ത്യന് കപ്പലുകള്ക്ക് ഹോര്മുസ് കടലിടുക്കിലൂടെ സുരക്ഷിത പാത ലഭിക്കുന്നു എന്നത് ആഗോളതലത്തില് ഇന്ത്യയുടെ നയതന്ത്ര വിജയമായി കരുതപ്പെടുന്നു. കഴിഞ്ഞ ദിവസങ്ങളില് ഇന്ത്യന് പതാക വഹിച്ച 'നന്ദാദേവി', 'ശിവാലിക്' എന്നീ എല്പിജി കാരിയറുകള് സംഘര്ഷഭരിതമായ ജലപാത കടന്ന് ഗുജറാത്തിലെ വാഡിനാര് തുറമുഖത്ത് സുരക്ഷിതമായി എത്തിച്ചേര്ന്നിരുന്നു. ലോകത്തിലെ 20 ശതമാനത്തിലധികം ഇന്ധന വിതരണവും നടക്കുന്ന ഈ പാതയിലൂടെയുള്ള ഇന്ത്യയുടെ ഈ 'മാസ് എന്ട്രി' ഏറെ പ്രാധാന്യത്തോടെയാണ് വിദഗ്ധര് കാണുന്നത്.
ചുരുക്കത്തില്, ചൈനയ്ക്ക് ലഭിക്കേണ്ടിയിരുന്ന റഷ്യന് ഇന്ധനം ഇപ്പോള് ഇന്ത്യയുടെ ഊര്ജ്ജ സുരക്ഷ ഉറപ്പാക്കാന് ഉപയോഗിക്കപ്പെടുകയാണ്. മാറുന്ന ഭൗമരാഷ്ട്രീയ സാഹചര്യങ്ങളില് ഇന്ത്യ ഒരു പ്രധാന ഊര്ജ്ജ ഹബ്ബായി മാറുന്നതിന്റെ സൂചനയാണിത്. വരും ദിവസങ്ങളില് കൂടുതല് വിദേശ കപ്പലുകള് ഇന്ത്യന് തീരത്തേക്ക് എത്തുമെന്നാണ് ഷിപ്പ് ട്രാക്കിംഗ് ഡാറ്റകള് വ്യക്തമാക്കുന്നത്.