കോടികളുടെ മണികിലുക്കം വര്‍ധിക്കുന്നു; സമ്പന്നരുടെ എണ്ണം ഇരട്ടിയായി

ഉയര്‍ന്ന ആസ്തിയുള്ളവരുടെ എണ്ണം രാജ്യത്ത് കുതിച്ചുയരുന്നു. 2021 നും 2025 നും ഇടയില്‍ 8.5 കോടി രൂപയോ അതില്‍ കൂടുതലോ ആസ്തിയുള്ള കുടുംബങ്ങളുടെ എണ്ണം ഇരട്ടിയായി വര്‍ധിച്ചു. 2021-ല്‍ 4.58 ലക്ഷം കുടുംബങ്ങളുണ്ടായിരുന്നത് ഇപ്പോള്‍ 8.71 ലക്ഷം കോടീശ്വര കുടുംബങ്ങളായി ഉയര്‍ന്നതായി മെഴ്സിഡസ്-ബെന്‍സ് ഹുറുണ്‍ ഇന്ത്യ വെല്‍ത്ത് റിപ്പോര്‍ട്ട് 2025 പറയുന്നു.

ഇന്ത്യയില്‍ 8.5 കോടിയോ അതില്‍ കൂടുതലോ ഉള്ള 8,71,700 കുടുംബങ്ങളുണ്ട്. 2021 നെ അപേക്ഷിച്ച് 90% വര്‍ധനയാണിത്. സമ്പന്നര്‍ ആഭരണങ്ങള്‍, കാറുകള്‍ തുടങ്ങിയ പരമ്പരാഗത സ്റ്റാറ്റസ് ചിഹ്നങ്ങളില്‍ മാത്രം ശ്രദ്ധ കേന്ദ്രീകരിക്കുന്നില്ല, മറിച്ച് ജീവിതശൈലി നവീകരണങ്ങളിലേക്കും ആഗോള അഭിലാഷങ്ങളിലേക്കും അവരുടെ സമ്പത്ത് വൈവിധ്യവല്‍ക്കരിക്കുകയാണെന്ന് ഹുറൂണിലെ വിശകലന വിദഗ്ധര്‍ അഭിപ്രായപ്പെടുന്നു.

മുംബൈ, ഡല്‍ഹി, ബെംഗളൂരു എന്നിവിടങ്ങളിലെ ഉയര്‍ന്ന ആസ്തിയുള്ള വ്യക്തികള്‍ ആഡംബര റിയല്‍ എസ്റ്റേറ്റിനെ ഇഷ്ടപ്പെടുന്നത് തുടരുന്നു. ഗോവയിലും ഹിമാലയത്തിലും രണ്ടാമത്തെ വീടുകളും വര്‍ദ്ധിച്ചുവരികയാണ്.കുടുംബങ്ങള്‍ ജീവിതശൈലി മൂല്യവും ആസ്തി മൂല്യവും ആഗ്രഹിക്കുന്നതിനാല്‍ ഹോളിഡേ വില്ലകളിലും ബ്രാന്‍ഡഡ് വസതികളിലും നിക്ഷേപം വര്‍ദ്ധിച്ചു.

മെഴ്സിഡസ്-ബെന്‍സ് ഹുറുണ്‍ ഇന്ത്യ ലക്ഷ്വറി കണ്‍സ്യൂമര്‍ സര്‍വേ പ്രകാരം ഏറ്റവും കൂടുതല്‍ പേര്‍ ഇഷ്ടപ്പെടുന്ന ഇന്ത്യന്‍ സ്വകാര്യ ബാങ്കായി എച്ച്ഡിഎഫ്‌സി ബാങ്കും മികച്ച അന്താരാഷ്ട്ര സ്വകാര്യ ബാങ്കായി സിറ്റി ബാങ്കും തിരഞ്ഞെടുക്കപ്പെട്ടു.

ഓഹരി, റിയല്‍ എസ്റ്റേറ്റ്, സ്വര്‍ണ്ണം എന്നിവയാണ് ഏറ്റവും മികച്ച ആസ്തി തിരഞ്ഞെടുപ്പുകള്‍. സര്‍വേയില്‍ പങ്കെടുത്തവരില്‍ 51% പേര്‍ അടുത്ത രണ്ട് വര്‍ഷത്തിനുള്ളില്‍ ഇന്ത്യന്‍ റിയല്‍ എസ്റ്റേറ്റ് വളരുമെന്ന് പ്രതീക്ഷിക്കുന്നു. അതേസമയം 38% പേര്‍ സ്ഥിരത നിലനിര്‍ത്തുമെന്ന് വിശ്വസിക്കുന്നു.

റിപ്പോര്‍ട്ട് പ്രകാരം, അടുത്ത ദശകത്തിലെ ഏറ്റവും പ്രധാനപ്പെട്ട ആഗോള നഗരങ്ങളുടെ പട്ടികയില്‍ മുംബൈ ഒന്നാം സ്ഥാനത്താണ്. ആഡംബര ഇടപാടുകളില്‍ ഡിജിറ്റല്‍ സൗകര്യത്തിലേക്കുള്ള വര്‍ദ്ധിച്ചുവരുന്ന താല്‍പര്യവും സര്‍വേയില്‍ പ്രകടമായി.

മുംബൈയിലാണ് ഏറ്റവുമധികം കോടിപതികളുള്ളത്. ഇവിടെ ഈ വിഭാഗത്തിലുള്ള ഒന്നരലക്ഷത്തോളം പേര്‍ വസിക്കുന്നു.