ആഗോള വളര്‍ച്ചയെ നയിക്കാന്‍ ഇന്ത്യ പ്രാപ്തമെന്ന് പ്രധാനമന്ത്രി

മന്ദഗതിയിലുള്ള വളര്‍ച്ചയില്‍ നിന്ന് ലോകത്തെ കരകയറ്റാന്‍ സഹായിക്കുന്നതിന് ഇന്ത്യ പ്രാപ്തമാണെന്ന് പ്രധാനമന്ത്രി നരേന്ദ്ര മോദി. ലോകത്തിലെ മൂന്നാമത്തെ വലിയ സമ്പദ്വ്യവസ്ഥയായി ഇന്ത്യ ഉടന്‍ മാറുമെന്നും 2047 ഓടെ വികസിത രാഷ്ട്രമായി മാറാനുള്ള പാതയിലാണെന്നും ഡെല്‍ഹിയില്‍ നടന്ന പരിപാടിയില്‍ പ്രധാനമന്ത്രി പറഞ്ഞു.

ജിഎസ്ടി പരിഷ്‌കരണ പ്രക്രിയ ദീപാവലിക്ക് മുമ്പ് പൂര്‍ത്തിയാക്കാനാണ് ശ്രമിക്കുന്നത്. അതുവഴി രാജ്യത്ത് സാധനങ്ങളുടെ വിലകള്‍ കുറയും. ക്ലീന്‍ എനര്‍ജി, ക്വാണ്ടം സാങ്കേതികവിദ്യ, ബാറ്ററി സംഭരണം, നൂതന വസ്തുക്കള്‍, ബയോടെക്‌നോളജി തുടങ്ങിയ മേഖലകളിലെ ഗവേഷണ വികസനത്തില്‍ സ്വകാര്യ മേഖല നിക്ഷേപം വര്‍ദ്ധിപ്പിക്കണമെന്നും പ്രധാനമന്ത്രി ആവശ്യപ്പെട്ടു.

ഈ മേഖലയിലെ നിക്ഷേപം രാജ്യത്തെ ഉല്‍പ്പാദനം വര്‍ധിപ്പിക്കും. കൂടാതെ വിപണി ആവശ്യകത ഉയരും, വ്യവസായത്തിന് പുതിയ ഉത്തേജനം ലഭിക്കും, പുതിയ തൊഴിലവസരങ്ങള്‍ സൃഷ്ടിക്കപ്പെടും- പ്രധാനമന്ത്രി പറഞ്ഞു.

കഴിഞ്ഞ ദശകത്തില്‍ ഇന്ത്യ കൈവരിച്ച സാമ്പത്തിക സ്ഥിരതയാണ് സമ്പദ്വ്യവസ്ഥയിലെ ഈ വളര്‍ച്ചയ്ക്കും പ്രതിരോധശേഷിക്കും കാരണമെന്ന് അദ്ദേഹം പറഞ്ഞു. ഇന്ന് ധനക്കമ്മി 4.4 ശതമാനമായി കുറയുമെന്ന് പ്രതീക്ഷിക്കുന്നു.

സമ്പദ്വ്യവസ്ഥയുടെ അടിസ്ഥാനകാര്യങ്ങളെക്കുറിച്ച് പറയുമ്പോള്‍, ഇന്ത്യന്‍ കമ്പനികള്‍ മൂലധന വിപണികളില്‍ നിന്ന് റെക്കോര്‍ഡ് ഫണ്ട് സമാഹരിക്കുന്നുണ്ടെന്നും, ബാങ്കുകള്‍ മുമ്പെന്നത്തേക്കാളും ശക്തമാണെന്നും, പണപ്പെരുപ്പം വളരെ കുറവാണെന്നും, പലിശ നിരക്കുകളും കുറവാണെന്നും മോദി പറഞ്ഞു.

കറന്റ് അക്കൗണ്ട് കമ്മി നിയന്ത്രണത്തിലാണ്, വിദേശനാണ്യ കരുതല്‍ ശേഖരവും ശക്തമാണ്, കൂടാതെ ഓരോ മാസവും ലക്ഷക്കണക്കിന് ആഭ്യന്തര നിക്ഷേപകര്‍ എസ്ഐപികള്‍ വഴി ആയിരക്കണക്കിന് കോടി രൂപ വിപണിയില്‍ നിക്ഷേപിക്കുന്നു.

2047 ഓടെ വികസിത രാഷ്ട്രമാകുക എന്ന ലക്ഷ്യത്തിലേക്ക് ഇന്ത്യ പൂര്‍ണ്ണ ശക്തിയോടെ പ്രവര്‍ത്തിക്കുന്നുണ്ടെന്നും വികസിത ഇന്ത്യയുടെ അടിസ്ഥാനം സ്വാശ്രയ ഇന്ത്യയാണെന്നും പ്രധാനമന്ത്രി കൂട്ടിച്ചേര്‍ത്തു.