Narendra Modi-2025, വിദേശ നയതന്ത്രത്തില്‍ ഇന്ത്യയുടെ വര്‍ഷം, ലോക ശ്രദ്ധ പിടിച്ചുപറ്റിയ മോദിയുടെ യാത്രകള്‍

2025 വർഷം ഇന്ത്യയ്ക്ക് പ്രതിരോധ രംഗത്ത് വലിയ മുന്നേറ്റങ്ങളും വിദേശ നയതന്ത്രത്തിൽ ശക്തമായ ഇടപെടലുകളും നിറഞ്ഞ വർഷമായി. തദ്ദേശീയമായി നിർമ്മിച്ച മിസൈലുകളും അന്തർവാഹിനികളും അടക്കം പുതിയ ആയുധങ്ങൾ സൈന്യത്തിന്റെ ഭാഗമായപ്പോൾ, ലോക രാജ്യങ്ങൾ ഇന്ത്യയുടെ പ്രതിരോധ ശേഷിയെ ശ്രദ്ധയോടെ വിലയിരുത്തി. അതേസമയം, ചില രാജ്യങ്ങളുമായി ബന്ധത്തിൽ വിള്ളലുകൾ ഉണ്ടായിരുന്നെങ്കിലും, പ്രധാനമന്ത്രി നരേന്ദ്ര മോദി തന്ത്രപ്രധാന ചർച്ചകളിലൂടെ ഇന്ത്യയുടെ ആഗോള സ്വാധീനം ശക്തമാക്കാൻ ശ്രമിച്ചു.

ഫെബ്രുവരി: ഫ്രാൻസും അമേരിക്കയും

2025 ലെ മോദിയുടെ ആദ്യ വിദേശ യാത്ര ഫ്രാൻസിലേക്കായിരുന്നു. ഫെബ്രുവരി 10 മുതൽ 12 വരെ നടന്ന സന്ദർശനത്തിൽ പ്രതിരോധം, സാങ്കേതികവിദ്യ, നിർമിതബുദ്ധി, ഡിജിറ്റൽ ഇൻഫ്രാസ്ട്രക്ചർ എന്നിവയിൽ ഇന്ത്യ–ഫ്രാൻസ് സഹകരണം ശക്തമാക്കി. ആർട്ടിഫിഷ്യൽ ഇന്റലിജൻസ് ആക്ഷൻ ഉച്ചകോടിയിൽ മോദിയും ഫ്രഞ്ച് പ്രസിഡന്റ് ഇമ്മാനുവൽ മാക്രോണും ചേർന്ന് അധ്യക്ഷത വഹിച്ചു.

തുടർന്ന് അമേരിക്കയിലെത്തിയ മോദി, പ്രസിഡൻ്റ് ഡൊണാൾഡ് ട്രംപുമായി കൂടിക്കാഴ്ച നടത്തി. 2025–2035 കാലയളവിലേക്കുള്ള ഇന്ത്യ–യുഎസ് 10 വർഷം നീളുന്ന പ്രധാന പ്രതിരോധ പങ്കാളിത്ത പദ്ധതികൾ ഇരുനേതാക്കളും പ്രഖ്യാപിച്ചു.

മാർച്ച്: അയൽപക്ക സൗഹൃദത്തിന് ഊന്നൽ

മാർച്ച് 11 ന് മോദി മൗറീഷ്യസ് സന്ദർശിച്ച് ദേശീയ ദിനാഘോഷങ്ങളിൽ മുഖ്യാതിഥിയായി പങ്കെടുത്തു. സമുദ്ര സുരക്ഷയും സാമ്പത്തിക സഹകരണവും ശക്തിപ്പെടുത്തുന്ന കരാറുകൾ ഒപ്പുവച്ചു. തുടർന്ന് ഏപ്രിലിന്റെ തുടക്കത്തിൽ തായ്‌ലൻഡും ശ്രീലങ്കയും സന്ദർശിച്ച മോദി BIMSTEC സഹകരണം ശക്തമാക്കണമെന്ന് തുറന്നുപറഞ്ഞു. അയൽരാജ്യങ്ങളുമായുള്ള ബന്ധം മെച്ചപ്പെടുത്താനുള്ള ശ്രമമായിരുന്നു ഇത്.

ഏപ്രിൽ: സൗദി സന്ദർശനം പാതിവഴിയിൽ

ഏപ്രിൽ 22 ന് സൗദി അറേബ്യയിലെത്തിയ മോദി, ഊർജ്ജം, വ്യാപാരം, പ്രാദേശിക സുരക്ഷ എന്നീ വിഷയങ്ങളിൽ കിരീടാവകാശി മുഹമ്മദ് ബിൻ സൽമാനുമായി ചർച്ച നടത്തി. എന്നാൽ ജമ്മു കശ്മീരിലെ പഹൽഗാമിലുണ്ടായ ഭീകരാക്രമണത്തെ തുടർന്ന് സന്ദർശനം പാതിവഴിയിൽ അവസാനിപ്പിച്ച് അദ്ദേഹം ഇന്ത്യയിലേക്ക് മടങ്ങി.

ജൂൺ: യൂറോപ്പിലും G7 വേദിയിലും

ജൂൺ 15 ന് സൈപ്രസിലെത്തിയ മോദി, 20 വർഷത്തിനുശേഷം ആ രാജ്യം സന്ദർശിക്കുന്ന ആദ്യ ഇന്ത്യൻ പ്രധാനമന്ത്രിയായി. പ്രതിരോധവും ഭീകരവാദ വിരുദ്ധ സഹകരണവും ഉൾപ്പെടുന്ന അഞ്ച് വർഷത്തെ പദ്ധതികൾക്ക് ഇരുരാജ്യങ്ങളും രൂപം നൽകി. തുടർന്ന് കാനഡയിലെ G7 ഉച്ചകോടിയിലും ക്രൊയേഷ്യയിലെ കാർഷിക–ശാസ്ത്ര സഹകരണ ചർച്ചകളിലും മോദി പങ്കെടുത്തു.

ജൂലൈ: ആഫ്രിക്ക മുതൽ യുകെ വരെ

ജൂലൈയിൽ ആഫ്രിക്ക, കരീബിയൻ, ലാറ്റിൻ അമേരിക്ക എന്നിവിടങ്ങളിലേക്കുള്ള ദീർഘപര്യടനമാണ് മോദി നടത്തിയത്. ഘാന, നമീബിയ, ട്രിനിഡാഡ് & ടൊബാഗോ, അർജന്റീന, ബ്രസീൽ തുടങ്ങിയ രാജ്യങ്ങൾ സന്ദർശിച്ച് വ്യാപാരവും നയതന്ത്ര ബന്ധവും ശക്തമാക്കി.

അതേ മാസം യുണൈറ്റഡ് കിംഗ്ഡം സന്ദർശനത്തിനിടെ ഇന്ത്യ–യുകെ സമഗ്ര സാമ്പത്തിക, വ്യാപാര കരാർ (CETA) ഒപ്പുവെച്ചു. നിക്ഷേപവും വ്യാപാര പ്രവാഹവും വർധിപ്പിക്കുന്നതിൽ ഇത് നിർണായക നീക്കമായി.

മാലിദ്വീപ്: ബന്ധ പുനഃസ്ഥാപനം

യുകെ സന്ദർശനത്തിന് പിന്നാലെ മാലിദ്വീപിലെത്തിയ മോദി, മുൻകാല സംഘർഷങ്ങൾക്ക് ശേഷം ബന്ധം പുനഃസ്ഥാപിച്ചു. സ്വതന്ത്ര വ്യാപാര കരാർ, ഡിജിറ്റൽ സാമ്പത്തിക സഹകരണം, അടിസ്ഥാന സൗകര്യ വികസനം തുടങ്ങിയ മേഖലകളിൽ ധാരണാപത്രങ്ങൾ ഒപ്പുവച്ചു. ഇന്ത്യ സാമ്പത്തിക സഹായ പാക്കേജും പ്രഖ്യാപിച്ചു.

ഓഗസ്റ്റ്: ജപ്പാനും ചൈനയും

ഓഗസ്റ്റിൽ ജപ്പാനിലെത്തിയ മോദി, ഇന്ത്യ–ജപ്പാൻ വാർഷിക ഉച്ചകോടിയിൽ ഇന്തോ–പസഫിക് സുരക്ഷയെക്കുറിച്ച് ചർച്ച നടത്തി. തുടർന്ന് ചൈനയിൽ നടന്ന SCO ഉച്ചകോടിയിൽ പങ്കെടുത്ത മോദി, പ്രസിഡന്റ് ഷി ജിൻപിങുമായി കൂടിക്കാഴ്ച നടത്തി. ഇന്ത്യയും ചൈനയും എതിരാളികളല്ല, വികസന പങ്കാളികളാണെന്ന സന്ദേശമാണ് ഇരുനേതാക്കളും നൽകിയത്.

നവംബർ: ഭൂട്ടാനും G20 ഉച്ചകോടിയും

നവംബറിൽ ഭൂട്ടാനിൽ ജലവൈദ്യുത പദ്ധതി ഉദ്ഘാടനം ചെയ്ത മോദി, തുടർന്ന് ദക്ഷിണാഫ്രിക്കയിൽ നടന്ന G20 ഉച്ചകോടിയിൽ പങ്കെടുത്തു. വികസനവും ആഗോള സാമ്പത്തിക വിഷയങ്ങളും ചർച്ചയായി.

ഡിസംബർ: പശ്ചിമേഷ്യയും ആഫ്രിക്കയും

വർഷാവസാനം ജോർദാൻ, എത്യോപ്യ, ഒമാൻ എന്നീ രാജ്യങ്ങൾ സന്ദർശിച്ച മോദി, പുനരുപയോഗ ഊർജ്ജം, ജലസംരക്ഷണം, ഡിജിറ്റൽ പരിഹാരങ്ങൾ തുടങ്ങിയ മേഖലകളിൽ കരാറുകൾ ഒപ്പുവച്ചു. എത്യോപ്യയുടെ പരമോന്നത ബഹുമതിയും ഒമാന്റെ ‘ഓർഡർ ഓഫ് ഒമാൻ’ ബഹുമതിയും അദ്ദേഹത്തിന് ലഭിച്ചു.

ലക്ഷ്യങ്ങൾ കണ്ടതും കണ്ടില്ലാത്തതും

2025ൽ നരേന്ദ്ര മോദി നടത്തിയ വിദേശയാത്രകൾ ഇന്ത്യയുടെ ആഗോള സാന്നിധ്യം ശക്തമാക്കിയെങ്കിലും, ചില കരാറുകൾ കടലാസിൽ മാത്രം ഒതുങ്ങിയെന്ന വിമർശനവും ഉയർന്നു. എങ്കിലും പ്രതിരോധം, സാമ്പത്തികം, വിദേശനയം എന്നീ മേഖലകളിൽ ഇന്ത്യയുടെ സ്വാധീനം ലോകവേദിയിൽ അടയാളപ്പെടുത്തിയ വർഷമായാണ് 2025 വിലയിരുത്തപ്പെടുന്നത്.