രാജ്യത്തെ ടോള്‍ നടപടികളില്‍ പുതിയ മാറ്റം

രാജ്യത്തെ ദേശീയപാതകളിലെ ടോള്‍ പിരിവ് സുഗമമാക്കുന്നതിനായുള്ള വാര്‍ഷിക പാസ് സംവിധാനം ഈ മാസം പതിനഞ്ച് മുതല്‍ പ്രാബല്യത്തില്‍ വരും. നാഷണല്‍ ഹൈവേ അതോറിറ്റി ഓഫ് ഇന്ത്യയുടെ കീഴിലുള്ള ദേശീയ പാതകളിലാണ് ടോള്‍ നികുതി അടയ്ക്കുന്നതില്‍ പ്രധാന മാറ്റം വരാന്‍ പോകുന്നത്. ഈ വര്‍ഷം ആദ്യം പതിവായി ദേശീയ പാതയിലൂടെ യാത്ര ചെയ്യുന്നവര്‍ക്ക് ടോള്‍ പേയ്മെന്റുകള്‍ എളുപ്പത്തിലും ചെലവ് കുറഞ്ഞതുമാക്കുന്നതിനായി നാഷണല്‍ ഹൈവേ അതോറിറ്റി ഓഫ് ഇന്ത്യ പുതിയ ടോള്‍ പാസ് സംവിധാനം അവതരിപ്പിച്ചിരുന്നു. ഈ പുതിയ ടോള്‍ പാസ് സംവിധാനം 2025 ഓഗസ്റ്റ് 15 മുതല്‍ പ്രാബല്യത്തില്‍ വരും.

രാജ്യത്തെ ദേശീയ പാതകളില്‍ പ്രാബല്യത്തില്‍ വരുന്ന ഫാസ് ടാഗ് പാസിന്റെ വില ഒരു വര്‍ഷത്തേക്ക് 3,000 രൂപയാണ്. പുതിയ പാസ് എത്തുന്നതോടെ സ്വകാര്യ വാഹനങ്ങള്‍ക്ക് യാത്ര സുഗമമാകും. വാണിജ്യേതര കാറുകള്‍, ജീപ്പുകള്‍, വാനുകള്‍ എന്നീ വാഹനങ്ങള്‍ക്ക് പാസ് നേട്ടമാകും. സ്ഥിരം യാത്രക്കാര്‍ക്ക് 3000 രൂപയ്ക്ക് 200 തവണ അല്ലെങ്കില്‍ ഒരു വര്‍ഷ കാലാവധി അനുവദിക്കുന്ന തരത്തിലാണ് പാസ് പുറത്തിറങ്ങുന്നത്. നിയുക്ത ദേശീയ പാതകളിലും എക്‌സ്പ്രസ് വേകളിലും ഈ പാസ് ബാധകമാകും. സംസ്ഥാന സര്‍ക്കാരുകളുടെയും ബ്ലോക്കുകളുടെയും കീഴിലുള്ള ടോള്‍ പാതകളില്‍ സാധാരണ ഫാസ്ടാഗ് വഴി ടോള്‍ നല്‍കേണ്ടിവരും.

പാസ് എങ്ങനെ സ്വന്തമാക്കാം?

രാജ്മാര്‍ഗ് യാത്ര മൊബൈല്‍ ആപ്ലിക്കേഷന്‍ വഴിയും എഎച്ച്എഐ വെബ്‌സൈറ്റ് മുഖേനെയും വാര്‍ഷിക പാസ് നേടാം. വാഹന്‍ ഡേറ്റബേസിലെ വാഹനനമ്പര്‍ പരിശോധിച്ച് ഏത് തരത്തിലുള്ള വാഹനമാണെന്ന് പരിശോധിക്കും. വെരിഫിക്കേഷന്‍ പൂര്‍ത്തിയായി വാര്‍ഷിക പാസിന് അര്‍ഹതയുണ്ടെന്ന് കണ്ടെത്തിയാല്‍ 3,000 രൂപ ഫീസ് സമര്‍പ്പിച്ച് രജിസ്റ്റര്‍ ചെയ്യാം. രണ്ട് മണിക്കൂറിനുള്ളില്‍ പാസ് പ്രവര്‍ത്തനക്ഷമമാകും. 200 യാത്രാ പരിധി അല്ലെങ്കില്‍ ഒരു വര്‍ഷത്തെ സാധുത തീര്‍ന്നാല്‍, വാര്‍ഷിക പാസ് ഒരു സ്റ്റാന്‍ഡേര്‍ഡ് ഫാസ്ടാഗിലേക്ക് മടങ്ങും. വാര്‍ഷിക പാസിന്റെ ആനുകൂല്യങ്ങള്‍ ആസ്വദിക്കാന്‍ ആഗ്രഹിക്കുന്ന ഉപയോക്താക്കള്‍ വെബ്സൈറ്റില്‍ നിന്ന് അത് വീണ്ടും സജീവമാക്കണം. നിലവിലുള്ള ഫാസ്ടാഗില്‍ തന്നെ വാര്‍ഷിക പാസ് ആക്ടിവേറ്റ് ചെയ്യാം.

വാര്‍ഷിക പാസ് രജിസ്റ്റര്‍ ചെയ്തശേഷം മറ്റ് വാഹനങ്ങളിലൊട്ടിച്ച് ഉപയോഗിക്കാന്‍ കഴിയില്ല. അങ്ങനെയുണ്ടായാല്‍ പാസ് സ്വയം ഡീ ആക്ടിവേറ്റ് ആകും. രജിസ്റ്റര്‍ ചെയ്ത വാഹനത്തിന്റെ മുന്നിലെ വിന്‍ഷീല്‍ഡ് ഗ്ലാസില്‍ തന്നെ ഫാസ്ടാഗ് ഒട്ടിക്കണമെന്നാണ് എന്‍എച്ച്എഐ നിര്‍ദ്ദേശം.

ഫാസ് ടാഗ് വാര്‍ഷിക പാസ് എങ്ങനെ ആക്ടിവേറ്റ് ചെയ്യാം?

* സ്മാര്‍ട്ട് ഫോണില്‍ രാജ്മാര്‍ഗ് യാത്ര മൊബൈല്‍ ആപ്ലിക്കേഷന്‍ വഴിയും അല്ലെങ്കില്‍ എന്‍എച്ച്എഐ വെബ്സൈറ്റിലേക്ക് എത്തുക.

* നിലവിലുള്ള ഫാസ് ടാഗ് ക്രെഡന്‍ഷ്യലുകള്‍ ഉപയോഗിച്ച് പോര്‍ട്ടലില്‍ ലോഗിന്‍ ചെയ്യുക.

* രജിസ്റ്റര്‍ ചെയ്ത മൊബൈല്‍ നമ്പര്‍, വാഹന രജിസ്‌ട്രേഷന്‍ നമ്പര്‍, ഫാസ് ടാഗ് ഐഡി ചോദിച്ചാല്‍ നല്‍കണം.

* വാഹനത്തിന്റെ യോഗ്യതയും അനുബന്ധ ഫാസ് ടാഗും സ്വയമേവ പരിശോധിക്കും.

* പരിശോധന വാഹനം വാര്‍ഷിക പാസിനുള്ള മാനദണ്ഡങ്ങള്‍ പാലിക്കുന്നുണ്ടെന്ന് ഉറപ്പാക്കും.

* വിജയകരമായ പരിശോധനയ്ക്ക് ശേഷം 2025 - 2026 അടിസ്ഥാന വര്‍ഷത്തേക്ക് 3,000 രൂപ പേയ്മെന്റ് നടത്താന്‍ ആവശ്യപ്പെടും.

* പണമടയ്ക്കാന്‍ യുപിഐ, ഇന്റര്‍നെറ്റ് ബാങ്കിങ്, ഡെബിറ്റ് കാര്‍ഡുകള്‍ ക്രെഡിറ്റ് കാര്‍ഡുകള്‍ പോലുള്ള ഡിജിറ്റല്‍ പേയ്മെന്റ് ഓപ്ഷനുകള്‍ ഉപയോഗിക്കാം.

* പേയ്മെന്റ് വിജയകരമായി സ്ഥിരീകരിച്ചുകഴിഞ്ഞാല്‍ രജിസ്റ്റര്‍ ചെയ്ത ഫാസ്റ്റ് ടാഗില്‍ വാര്‍ഷിക പാസ് സജീവമാക്കും.

* എസ്എംഎസ് അല്ലെങ്കില്‍ ഇമെയില്‍ വഴി ഒരു സ്ഥിരീകരണം ലഭിക്കും.

* വിജയകരമായ പേയ്മെന്റും സ്ഥിരീകരണവും കഴിഞ്ഞ് രണ്ട് മണിക്കൂറിനുള്ളില്‍ പാസ് സജീവമാകും.

* വാര്‍ഷിക പാസിനായി പുതിയ ഫാസ് ടാഗ് വാങ്ങേണ്ടതില്ല. യോഗ്യതാ മാനദണ്ഡങ്ങള്‍ പാലിക്കുന്നുണ്ടെങ്കില്‍ നിലവിലുള്ളതില്‍ സജീവമാക്കും.

* പാസ് കൈമാറ്റം ചെയ്യാന്‍ കഴിയില്ല, കൂടാതെ ഫാസ് ടാഗ് ഘടിപ്പിച്ച് രജിസ്റ്റര്‍ ചെയ്ത വാഹനത്തിന് മാത്രമേ സാധുതയുള്ളൂ.