സൂമിന് രാജ്യവ്യാപക ടെലികോം ലൈസന്‍സ്

പാൻ-ഇന്ത്യ ടെലികോം ലൈസൻസ് കരസ്ഥമാക്കിയതായി വെബ് കോൺഫറൻസ് കമ്പനിയായ സൂം വീഡിയോ കമ്മ്യൂണിക്കേഷൻസ് (ഇസഡ്‍വി‍സി) അറിയിച്ചു. ഇത് എന്റർപ്രൈസ് ഉപഭോക്താക്കൾക്ക് ടെലിഫോൺ സേവനങ്ങളും വാഗ്ദാനം ചെയ്യാൻ കമ്പനിയെ പ്രാപ്തമാക്കും. യുഎസ് ആസ്ഥാനമായുള്ള സൂം പ്രധാനമായും അതിന്റെ വെബ്‌സൈറ്റിലൂടെയും ആപ്പിലൂടെയും വോയ്‌സ്, വീഡിയോ കോൺഫറൻസ് സേവനം വാഗ്ദാനം ചെയ്യുന്നു.

ഇസഡ്‍വി‍സി ഇന്ത്യയുടെ മാതൃ സ്ഥാപനമായ സൂം വീഡിയോ കമ്മ്യൂണിക്കേഷൻസ് ഇന്‍കിന് എന്‍എല്‍ഡി (നാഷണൽ ലോംഗ് ഡിസ്റ്റൻസ്), ഐഎല്‍ഡി ( ഇന്റർനാഷണൽ ലോംഗ് ഡിസ്റ്റൻസ്) എന്നിവയുള്ള ഏകീകൃത ലൈസൻസാണ് ടെലികമ്മ്യൂണിക്കേഷൻ വകുപ്പ് നല്‍കിയിട്ടുള്ളത്. ഈ ലൈസൻസുകൾ ഉപയോഗിച്ച്, കമ്പനിക്ക് അതിന്റെ ക്ലൗഡ് അധിഷ്‌ഠിത പ്രൈവറ്റ് ബ്രാഞ്ച് എക്‌സ്‌ചേഞ്ച് (പിബിഎക്‌സ്) സേവനമായ 'സൂം ഫോൺ' ഇന്ത്യയിൽ പ്രവർത്തിക്കുന്ന ബിസിനസുകൾക്കും ബഹുരാഷ്ട്ര കോർപ്പറേഷനുകൾക്കും വാഗ്ദാനം ചെയ്യാൻ കഴിയുമെന്ന് കമ്പനി അറിയിച്ചു.

എന്റർപ്രൈസുകൾക്കായുള്ള ഒരു പ്രാദേശിക ടെലിഫോൺ എക്സ്ചേഞ്ചായി പിബിഎക്സ് പ്രവർത്തിക്കുകയും കോൺഫറൻസ് കോൾ സേവനങ്ങൾ കൈകാര്യം ചെയ്യുന്നതിൽ അവരെ സഹായിക്കുകയും ചെയ്യുന്നു.ഇന്ത്യക്ക് നല്‍കുന്ന പ്രാമുഖ്യത്തിന്‍റെയും ഇന്ത്യന്‍ വിപണിക്കായി പുതിയ സേവന വിഭാഗങ്ങള്‍ ലഭ്യമാക്കുന്നതിനുള്ള പരിശ്രമത്തിന്‍റെയും പ്രതിഫലനമാണ് പുതിയ നാഴികക്കല്ലെന്ന് സൂം പറയുന്നു.

സൂം ഫോൺ 2023 സാമ്പത്തിക വർഷത്തിൽ ആഗോളതലത്തിൽ 100 ​​ശതമാനത്തിലധികം വളർച്ച നേടി നാലാം പാദത്തിൽ സീറ്റുകൾ 5.5 ദശലക്ഷത്തിനു മുകളിലേക്ക് എത്തിയെന്നും പ്രസ്താവനയില്‍ പറയുന്നു. ക്ലൗഡ് പിബിഎക്‌സ് സേവനങ്ങള്‍ക്കൊപ്പം, ഇന്റർനാഷണൽ ടെലികമ്മ്യൂണിക്കേഷൻ ദാതാക്കളുമായി ചേര്‍ന്ന് 47 രാജ്യങ്ങളില്‍ ഫോൺ നമ്പറുകളും കോളിംഗ് പ്ലാനുകളും സൂം വാഗ്ദാനം ചെയ്യുന്നു.