Trump announces temporary ceasefire:പശ്ചിമേഷ്യയില്‍ താൽക്കാലിക ആശ്വാസം! അഞ്ച് ദിവസത്തെ വെടിനിര്‍ത്തല്‍ പ്രഖ്യാപിച്ച് ട്രംപ്

24 ദിവസമായി തുടരുന്ന പശ്ചിമേഷ്യന്‍ സംഘര്‍ഷത്തില്‍ നിര്‍ണായക വഴിത്തിരിവ്. അമേരിക്കയും ഇറാനും തമ്മില്‍ കഴിഞ്ഞ രണ്ട് ദിവസമായി നടന്ന ചര്‍ച്ചകള്‍ 'വളരെ മികച്ചതും ഫലപ്രദവുമാണെന്ന്' യുഎസ് പ്രസിഡന്റ് ഡൊണാള്‍ഡ് ട്രംപ്. ഈ ചര്‍ച്ചകളുടെ പശ്ചാത്തലത്തില്‍ ഇറാന്റെ ഊര്‍ജ പശ്ചാത്തല സൗകര്യങ്ങള്‍ക്ക് നേരെ അമേരിക്ക നടത്തിവന്ന എല്ലാ ആക്രമണങ്ങളും അഞ്ച് ദിവസത്തേക്ക് നിര്‍ത്തിവെക്കാന്‍ തീരുമാനിച്ചു. മേഖലയില്‍ സമാധാനം പുനഃസ്ഥാപിക്കാനുള്ള നിര്‍ണായക ചുവടുവെപ്പായാണ് ഇതിനെ കാണുന്നത്.

ഹോര്‍മുസ് കടലിടുക്ക് വീണ്ടും തുറക്കുന്നതിനായി ട്രംപ് നല്‍കിയ സമയപരിധി ഇന്ന് അവസാനിക്കാനിരിക്കെയാണ് ഈ അപ്രതീക്ഷിത പ്രഖ്യാപനം വരുന്നത്. ഇറാനുമായുള്ള ബന്ധം മെച്ചപ്പെടുത്തുന്നതിനും തര്‍ക്കങ്ങള്‍ പരിഹരിക്കുന്നതിനും നിലവിലെ ചര്‍ച്ചകള്‍ സഹായിക്കുമെന്ന് വൈറ്റ് ഹൗസ് വൃത്തങ്ങള്‍ പ്രത്യാശ പ്രകടിപ്പിച്ചു.

അതേസമയം, മേഖലയില്‍ യുദ്ധസന്നദ്ധമായിരുന്ന യുഎസ് വിമാനവാഹിനിക്കപ്പലായ യുഎസ്എസ് ജെറാള്‍ഡ് ആര്‍. ഫോര്‍ഡ് ഗ്രീസിലെ ക്രീറ്റ് ദ്വീപിലുള്ള നാവിക താവളത്തില്‍ തിരിച്ചെത്തി. പശ്ചിമേഷ്യയിലെ യുദ്ധസമാനമായ സാഹചര്യങ്ങളില്‍ സജീവമായിരുന്ന ലോകത്തിലെ ഏറ്റവും വലിയ ഈ യുദ്ധക്കപ്പല്‍ സൂഡ ബേയിലെ താവളത്തിലാണ് നങ്കൂരമിട്ടിരിക്കുന്നത്. ഇറാന്റെ തീരങ്ങളില്‍ നിന്നുള്ള കപ്പലിന്റെ ഈ പിന്മാറ്റം സംഘര്‍ഷാവസ്ഥയില്‍ നേരിയ അയവുണ്ടാക്കിയിട്ടുണ്ട്.

ഫെബ്രുവരിയില്‍ ക്രീറ്റില്‍ നിന്ന് ഇന്ധനവും ആയുധങ്ങളും ശേഖരിച്ച ഈ കപ്പല്‍ മാര്‍ച്ച് 12ന് ഒരു ചെറിയ അപകടത്തെ അഭിമുഖീകരിച്ചിരുന്നു. കപ്പലിലെ ലോണ്‍ട്രിയിലുണ്ടായ തീപിടുത്തത്തില്‍ രണ്ട് നാവികര്‍ക്ക് പരിക്കേറ്റതായി റിപ്പോര്‍ട്ടുകള്‍ സൂചിപ്പിക്കുന്നു. ഈ പശ്ചാത്തലത്തില്‍ കൂടിയാണ് കപ്പല്‍ ഇപ്പോള്‍ താവളത്തിലേക്ക് മടങ്ങിയെത്തിയിരിക്കുന്നത്. എങ്കിലും ട്രംപും ഇറാനും തമ്മിലുള്ള ചര്‍ച്ചകള്‍ വിജയിച്ചാല്‍ മേഖലയില്‍ സ്ഥിരമായ സമാധാനം കൈവരുമെന്നാണ് പ്രതീക്ഷിക്കപ്പെടുന്നത്.

അതേസമയം, ചര്‍ച്ച നടത്തിയെന്ന ട്രംപിന്റെ വാദം തള്ളി ഇറാന്‍. അമേരിക്കന്‍ പ്രസിഡന്റ് ഡൊണാള്‍ഡ് ട്രംപുമായി നേരിട്ടോ അല്ലാതെയോ യാതൊരുവിധ ആശയവിനിമയവും നടത്തിയിട്ടില്ലെന്ന് ഇറാന്റെ ഔദ്യോഗിക വൃത്തങ്ങളെ ഉദ്ധരിച്ച് 'ഫാര്‍സ്' ന്യൂസ് ഏജന്‍സി റിപ്പോര്‍ട്ട് ചെയ്തു. ഇറാനിലെ വൈദ്യുതി, ഊര്‍ജ നിലയങ്ങള്‍ ലക്ഷ്യം വെക്കുമെന്ന് ട്രംപ് ഭീഷണിപ്പെടുത്തിയിരുന്നതായും, എന്നാല്‍ കടുത്ത പ്രത്യാഘാതങ്ങള്‍ ഉണ്ടാകുമെന്ന ഇറാന്റെ മുന്നറിയിപ്പിനെത്തുടര്‍ന്ന് അദ്ദേഹം ആ നീക്കത്തില്‍ നിന്ന് 'പിന്‍വാങ്ങുകയായിരുന്നു' എന്നുമാണ് ഇറാന്റെ അവകാശവാദം.

ഇറാൻ്റെ ഭാഗത്തുനിന്ന് കടുത്ത മുന്നറിയിപ്പുകളും ഉയരുന്നുണ്ട്. ഇറാൻ്റെ തീരപ്രദേശങ്ങളോ ദ്വീപുകളോ ആക്രമിക്കാന്‍ ഏതെങ്കിലും തരത്തിലുള്ള ശ്രമം ഉണ്ടായാല്‍ പേര്‍ഷ്യന്‍ ഗള്‍ഫിലെ എല്ലാ ആശയവിനിമയ പാതകളും മൈന്‍ ഉപയോഗിച്ച് തകര്‍ക്കുമെന്ന് ഇറാൻ്റെ നാഷണല്‍ ഡിഫന്‍സ് കൗണ്‍സില്‍ വ്യക്തമാക്കി. തങ്ങളുടെ അതിര്‍ത്തികള്‍ സംരക്ഷിക്കാന്‍ സജ്ജമാണെന്ന ശക്തമായ സന്ദേശമാണ് ഇതിലൂടെ ഇറാന്‍ നല്‍കുന്നത്.

നിലവിലെ അഞ്ച് ദിവസത്തെ വെടിനിര്‍ത്തല്‍ ഇരുരാജ്യങ്ങളും തമ്മിലുള്ള നയതന്ത്ര ചര്‍ച്ചകള്‍ക്ക് കൂടുതല്‍ കരുത്ത് പകരുമെന്നാണ് അന്താരാഷ്ട്ര നിരീക്ഷകര്‍ വിലയിരുത്തുന്നത്. എങ്കിലും ഹോര്‍മുസ് കടലിടുക്ക് തുറക്കുന്നതുമായി ബന്ധപ്പെട്ട അന്തിമ തീരുമാനം എങ്ങനെയുണ്ടാകും എന്നതിനെ ആശ്രയിച്ചിരിക്കും മേഖലയിലെ വരും ദിവസങ്ങളിലെ സ്ഥിതിഗതികള്‍.