ക്രെഡിറ്റ് കാർഡ് എടുക്കുന്നത് ബുദ്ധിയോ?

ഇന്ത്യയിൽ ക്രെഡിറ്റ് കാർഡ് ഉപയോക്താക്കളുടെ എണ്ണത്തിൽ കഴിഞ്ഞ ദശാബ്ദത്തിൽ വലിയ വർദ്ധനവുണ്ടായിട്ടുണ്ട്. വിവിധതരം ക്രെഡിറ്റ് കാർഡുകൾ ആണ് സ്വകാര്യ, പൊതുമേഖലാ ബാങ്കുകൾ വാഗ്ദാനം ചെയ്യുന്നത്. സാങ്കേതികവിദ്യയുടെ വളർച്ചയും ഓൺലൈൻ പേയ്‌മെന്റുകളുടെ വർദ്ധനവുമാണ് ക്രെഡിറ്റ് കാർഡ് ഉപയോക്താക്കളുടെ എണ്ണം കൂടാൻ പ്രധാന കാരണം.

2024 ഫെബ്രുവരിയിലെ ഡാറ്റ പ്രകാരം, ഇന്ത്യയിൽ 100 ​​ദശലക്ഷത്തിലധികം സജീവ ക്രെഡിറ്റ് കാർഡുകൾ ഉണ്ട്. PwC റിപ്പോർട്ട് പ്രകാരം, ഇന്ത്യയിലെ ക്രെഡിറ്റ് കാർഡ് വിപണിയിൽ വലിയ വളർച്ചയാണ് പ്രതീക്ഷിക്കുന്നത്. കഴിഞ്ഞ അഞ്ച് വർഷത്തിനിടെ ക്രെഡിറ്റ് കാർഡുകളുടെ എണ്ണം ഇരട്ടിയായതും ഈ വളർച്ചയ്ക്ക് ആക്കം കൂട്ടുന്നു. 2028-29 ഓടെ വിപണി 200 ദശലക്ഷം കാർഡുകളിലെത്തുമെന്ന് പ്രവചനങ്ങൾ സൂചിപ്പിക്കുന്നു. അതായത്, പ്രതിവർഷം 15% എന്ന സംയുക്ത വാർഷിക വളർച്ചാ നിരക്കിലാണ് (CAGR) ഈ മേഖല മുന്നോട്ട് പോകുന്നത്. 2018 ജനുവരിയിൽ റിസർവ് ബാങ്ക് ഓഫ് ഇന്ത്യയുടെ കണക്കനുസരിച്ച് 36.2 ദശലക്ഷം ക്രെഡിറ്റ് കാർഡുകൾ ആണ് ഉപയോഗത്തിലുണ്ടായിരുന്നത്. എച്ച്ഡിഎഫ്സി ബാങ്ക്, ഐസിഐസിഐ, ആസ്സിസ് ബാങ്ക്, എസ് ബി ഐ ബാങ്ക് തുടങ്ങിയവരാണ് ക്രെഡിറ്റ് കാർഡ് വിപണിയിലെ മുൻനിരക്കാർ.

ക്രെഡിറ്റ് കാർഡിന്റെ പ്രയോജനങ്ങൾ

ക്രെഡിറ്റ് കാർഡ് ഉപയോഗിക്കുന്നതിന്റെ മറ്റൊരു പ്രധാന നേട്ടം EMI സൗകര്യമാണ്. ടെലിവിഷനോ ലാപ്ടോപ്പോ പോലുള്ള വലിയ ഷോപ്പിംഗ് നടത്തുമ്പോൾ, ക്രെഡിറ്റ് കാർഡ് ഉപയോക്താക്കൾക്ക് EMI സൗകര്യം തിരഞ്ഞെടുക്കാനും ന്യായമായ പലിശ നിരക്കിൽ പ്രതിമാസ ഗഡുക്കളായി പണം തിരിച്ചടയ്ക്കാനും കഴിയും. ഇതുവഴി വാങ്ങുന്നയാൾക്ക് ഒറ്റയടിക്ക് വലിയ തുക നൽകേണ്ടി വരുന്നില്ല, അതിനാൽ ഇത് അവരുടെ ബാങ്ക് അക്കൗണ്ടിനെ ബാധിക്കുകയുമില്ല. ആമസോൺ, ഫ്ലിപ്കാർട്ട് പോലുള്ള ഓൺലൈൻ ഷോപ്പിംഗ് സൈറ്റുകൾ ക്രെഡിറ്റ് കാർഡുകൾക്ക് EMI ഓപ്ഷനുകൾ നൽകുന്നു, ഇത് ക്രെഡിറ്റ് കാർഡ് വഴിയുള്ള വാങ്ങലുകൾ കൂടുതൽ എളുപ്പമാക്കുന്നു. ക്രെഡിറ്റ് കാർഡുകൾക്ക് ഏകദേശം 45-60 ദിവസത്തെ പലിശ രഹിത കാലയളവുണ്ട്. ഈ കാലയളവിൽ, നിശ്ചിത തീയതിയിൽ മുഴുവൻ ബില്ലും അടയ്ക്കുകയാണെങ്കിൽ കുടിശ്ശികയുള്ള ക്രെഡിറ്റിന് പലിശ ഈടാക്കില്ല.

പ്രതീക്ഷിക്കാതെ വരുന്ന വലിയ അടിയന്തര പേയ്‌മെന്റുകൾക്ക് ക്രെഡിറ്റ് കാർഡ് വളരെ സഹായകമാണ്. ഉദാഹരണത്തിന്, പെട്ടെന്നുണ്ടാകുന്ന മെഡിക്കൽ ചെലവുകൾക്ക് ക്രെഡിറ്റ് കാർഡ് വളരെ ഉപകാരപ്രദമാണ്. ക്രെഡിറ്റ് കാർഡ് ക്യാഷ് ബാക്ക് പോലുള്ള വിവിധ റിവാർഡുകൾ വാഗ്ദാനം ചെയ്യുന്നു. ഇന്റർനാഷണൽ കാർഡുകൾ യാത്ര വേളകളിൽ വളരെ പ്രോയോജനം ആണ്. കൂടാതെ, ക്രെഡിറ്റ് കാർഡുകൾ നല്ല രീതിയിൽ ഉപയോഗിക്കുന്നത് വഴി ഒരു ഒരു നല്ല ക്രെഡിറ്റ് സ്കോർ ഹിസ്റ്ററി കെട്ടിപ്പടിക്കുവാൻ സാധിക്കും.

ക്രെഡിറ്റ് കാർഡ് ഉപയോഗിക്കുന്നതിലെ ദോഷങ്ങൾ

1. ഉയർന്ന പലിശ നിരക്കുകൾ

ഒരു സാധാരണ ക്രെഡിറ്റ് കാർഡ് വാർഷിക പലിശ നിരക്ക്, സാധാരണയായി 24% നും 40% നും ഇടയിലാണ്. ചില കാർഡ് ഇഷ്യൂവർമാർ 48-50% വരെ വാർഷിക ശതമാന നിരക്ക് (APR) ഈടാക്കിയേക്കാം. ക്രെഡിറ്റ് കാർഡ് ഇഷ്യൂവർ, കാർഡിന്റെ തരം, ക്രെഡിറ്റ് യോഗ്യത എന്നിവയെ ആശ്രയിച്ച് ഈ നിരക്ക് വ്യത്യാസപ്പെടാം. ഉയർന്ന ക്രെഡിറ്റ് സ്കോർ സാധാരണയായി കുറഞ്ഞ പലിശ നിരക്കുകളിലേക്ക് നയിക്കുന്നു, കാരണം ഇത് വായ്പ നൽകുന്നയാൾക്ക് കുറഞ്ഞ അപകടസാധ്യതയെ സൂചിപ്പിക്കുന്നു. റിവാർഡ് ക്രെഡിറ്റ് കാർഡുകൾക്ക് അടിസ്ഥാന കാർഡുകളേക്കാൾ ഉയർന്ന പലിശ നിരക്കുകൾ ഉണ്ടായിരിക്കാം. കൂടാതെ, അടയ്ക്കാത്ത ബില്ലുകൾ അടുത്ത മാസത്തേക്ക് കൊണ്ടുപോവുകയും കാർഡ് ഉടമയ്ക്ക് പിഴകളും ചാർജുകളും ചുമത്തുകയും ചെയ്യുന്നു.

2. അമിത ചിലവ്

ക്രെഡിറ്റ് കാർഡ് ഉപയോഗിക്കാനുള്ള എളുപ്പവും ഒന്നിലധികം കാർഡുകൾ കൈവശം വെക്കാനുള്ള സൗകര്യവും നിങ്ങളുടെ പരിധി വിട്ട് ചെലവഴിക്കാൻ പ്രേരിപ്പിക്കുന്നു. നിങ്ങളുടെ ബാങ്ക് അക്കൗണ്ടിൽ നിന്ന് പണം കുറയുന്നത് നേരിട്ട് കാണാത്തതിനാൽ വരുമാനത്തെക്കാൾ കൂടുതൽ വാങ്ങുന്നത് ആകർഷകമായി തോന്നിയേക്കാം.

3. കടബാധ്യത

തെറ്റായ ക്രെഡിറ്റ് കാർഡ് ഉപയോഗത്തിലൂടെയുള്ള അമിതമായ ചിലവ് കടബാധ്യതയിലേക്ക് നയിക്കും. നിങ്ങളുടെ വരുമാനത്തിന് ഒരു നിശ്ചിത തുക പലിശ അടയ്ക്കാൻ മാത്രമേ കഴിയൂ, പരിധി വിട്ട് ചെലവഴിക്കുന്നത് ബില്ലുകൾ അടയ്ക്കാൻ കഴിയാത്ത അവസ്ഥയിലേക്ക് നയിച്ചേക്കാം.

ചുരുക്കത്തിൽ, ക്രെഡിറ്റ് കാർഡ് സാമ്പത്തിക ഇടപാടുകൾക്ക് വളരെ പ്രയോജനകരമാണ്, പ്രത്യേകിച്ചും അടിയന്തിര ഘട്ടങ്ങളിലും വലിയ തുകകൾ EMI ആയി അടയ്‌ക്കേണ്ടി വരുമ്പോഴും. എന്നാൽ, ഉയർന്ന പലിശ നിരക്കുകളും അമിതമായി ചിലവഴിക്കാനുള്ള സാധ്യതയും ശ്രദ്ധിച്ചില്ലെങ്കിൽ കടബാധ്യതയിലേക്ക് നയിച്ചേക്കാം. അതുകൊണ്ട്, ക്രെഡിറ്റ് കാർഡ് ഉപയോഗിക്കുമ്പോൾ ജാഗ്രത പാലിക്കേണ്ടത് അത്യാവശ്യമാണ്.