കോവിഡ് കാലത്തെ മികച്ച പ്രവര്‍ത്തനം, ഡോ റെഡീസിന്റെ വരുമാനത്തില്‍ വര്‍ധന

ഹൈദരാബാദ്: ആദ്യ പാദത്തിലെ ഡോ. റെഡ്ഡീസ് ലബോറട്ടറീസിന്റെ നികുതി കിഴിച്ചുള്ള ലാഭം 108 ശതമാനം ഉയര്‍ന്ന് 1187.6 കോടി രൂപയില്‍ എത്തി. വരുമാനത്തില്‍ ഗണ്യമായ വര്‍ധനവുണ്ടായതാണ് നേട്ടത്തിന് കാരണം. മുന്‍വര്‍ഷം ഇതേ പാദത്തില്‍ 570.8 കോടി രൂപയായിരുന്നു ലാഭം. 2022 സാമ്പത്തിക വര്‍ഷത്തിന്റെ ആദ്യ പാദത്തിലെ 4,919.4 കോടി രൂപയുമായി താരതമ്യം ചെയ്യുമ്പോള്‍ നടപ്പ് സാമ്പത്തിക വര്‍ഷത്തിന്റെ ആദ്യപാദത്തില്‍ വരുമാനം ആറ് ശതമാനം ഉയര്‍ന്ന് 5,215.4 കോടി രൂപയായി.

മറ്റ് മേഖലയില്‍ നിന്നുള്ള വരുമാനം 600 കോടി രൂപയായി. മുന്‍ സാമ്പത്തിക വര്‍ഷം ഇതേ പാദത്തില്‍ ഇത് 50 കോടി രൂപയായിരുന്നു വരുമാനം. ഇന്‍ഡിവിയോര്‍ ഇന്‍കോര്‍പ്പറേറ്റഡ്, ഇന്‍ഡിവിയോര്‍ യുകെ, അക്വസ്റ്റീവ് തെറാപ്യൂടിക്സ് എന്നിവയുമായുള്ള സെറ്റില്‍മെന്റ് കരാറില്‍ നിന്നുള്ള വരുമാനം അംഗീകരിച്ചതാണ് വര്‍ധനയ്ക്ക് കാരണമായത്.

ജനറിക് ബുപ്രനോര്‍ഫിന്‍, നലോക്സോണ്‍ സബ്ലിംഗ്വല്‍ ഫിലിമുമായി ബന്ധപ്പെട്ട എല്ലാ തര്‍ക്കങ്ങളും പരിഹരിച്ചതായി ഡോ റെഡ്ഡീസ് പറഞ്ഞു. കഴിഞ്ഞ വര്‍ഷം പുറത്തിയക്കിയ ഉത്പന്നങ്ങള്‍ (കോവിഡ് ചികിത്സയുമായി ബന്ധപ്പെട്ടവ) മികച്ച പ്രകടനം കാഴ്ച്ചവച്ചത് വരുമാന വളര്‍ച്ചയ്ക്ക് കാരണമായെന്ന് സഹ ചെയര്‍മാനും എംഡിയുമായ ജി വി പ്രസാദ് പറഞ്ഞു.