ആത്മീയതയിലും എഐ വിപ്ലവം; ജപ്പാനിലെ ബുദ്ധക്ഷേത്രത്തില്‍ റോബോട്ട് സന്യാസി!

തൊഴില്‍ മേഖലകളില്‍ യന്ത്രങ്ങള്‍ മനുഷ്യന് പകരക്കാരാകുന്നത് പുതിയ വാര്‍ത്തയല്ല. എന്നാല്‍, പരമ്പരാഗതമായ വിശ്വസങ്ങളും ആചാരങ്ങളും നിലനില്‍ക്കുന്ന ആത്മീയ ലോകത്തേക്കും ഇപ്പോള്‍ കൃത്രിമബുദ്ധി കടന്നുവരുന്നു. ജപ്പാനിലെ ക്യോട്ടോയിലുള്ള പ്രശസ്തമായ ഷോറന്‍-ഇന്‍ ക്ഷേത്രത്തില്‍ അനാച്ഛാദനം ചെയ്ത 'ബുദ്ധറോയ്ഡ്' എന്ന റോബോട്ട് സന്യാസിയാണ് ഇപ്പോള്‍ ആഗോളതലത്തില്‍ ശ്രദ്ധയാകര്‍ഷിക്കുന്നത്. ഈ ഹ്യൂമനോയിഡ് റോബോട്ട്, ആധുനിക സാങ്കേതികവിദ്യയും പുരാതന ബുദ്ധമത തത്വങ്ങളും തമ്മിലുള്ള അപൂര്‍വ്വ സംഗമത്തിന്റെ പ്രതീകമായി മാറിയിരിക്കുന്നു.

മനുഷ്യ സന്യാസിമാരെ പൂര്‍ണ്ണമായും മാറ്റിസ്ഥാപിക്കുക എന്നതല്ല ഈ റോബോട്ടിന്റെ ലക്ഷ്യം. മറിച്ച്, ബുദ്ധമതം പഠിപ്പിക്കുന്നത് കൂടുതല്‍ ആളുകളിലേക്ക്, പ്രത്യേകിച്ച് യുവതലമുറയിലേക്കും വിദേശ വിനോദസഞ്ചാരികളിലേക്കും എത്തിക്കുക എന്നതാണ്. ജാപ്പനീസ് ഭാഷയില്‍ സംസാരിക്കുന്ന ബുദ്ധറോയ്ഡിന്റെ പ്രസംഗങ്ങള്‍, ഇംഗ്ലീഷ്, ചൈനീസ് ഭാഷകളിലുള്ള വിവര്‍ത്തനങ്ങളോടെ അടുത്തു തന്നെയുള്ള സ്‌ക്രീനില്‍ പ്രദര്‍ശിപ്പിക്കും. കാരുണ്യം, അഹങ്കാര ത്യാഗം, ആത്മപരിശോധന തുടങ്ങിയ വിഷയങ്ങളെ ആസ്പദമാക്കിയുള്ള റോബോട്ടിന്റെ ധ്യാനാത്മകമായ അവതരണം സന്ദര്‍ശകരില്‍ ആശ്ചര്യവും ഒപ്പം ചിലരില്‍ നേരിയ അസ്വസ്ഥതയും ഉളവാക്കുന്നുണ്ട്.

പ്രസംഗം കൃത്യമാണ്

ക്ഷീണമോ മറവിയോ ഇല്ലാതെ, പ്രോഗ്രാം ചെയ്ത വേദഗ്രന്ഥങ്ങള്‍ അടിസ്ഥാനമാക്കി കൃത്യമായി പ്രസംഗിക്കാന്‍ ബുദ്ധറോയ്ഡിന് കഴിയും. മനുഷ്യൻ്റേതിന് സമാനമായ ചലനങ്ങളും ഭാവങ്ങളും ഉള്‍പ്പെടുത്തിയാണ് ഇതിന്റെ രൂപകല്‍പ്പന. ഷോറന്‍-ഇന്‍ ക്ഷേത്രത്തിലെ പ്രധാന ആകര്‍ഷണമായി മാറിയ ഈ റോബോട്ടിന്റെ വീഡിയോകള്‍ എക്സ്, ഇന്‍സ്റ്റാഗ്രാം തുടങ്ങിയ സോഷ്യല്‍ മീഡിയ പ്ലാറ്റ്ഫോമുകളില്‍ വൈറലാണ്. മതപരമായ കാര്യങ്ങളില്‍ യന്ത്രങ്ങളെ ഉപയോഗിക്കുന്നത് ആത്മീയതയുടെ തീവ്രത കുറയ്ക്കുമെന്ന് ചിലര്‍ വാദിക്കുമ്പോള്‍, പുരാതന ജ്ഞാനം സംരക്ഷിക്കാനുള്ള ഒരു നൂതന മാര്‍ഗ്ഗമായാണ് മറ്റുള്ളവര്‍ ഇതിനെ കാണുന്നത്.

ബുദ്ധറോയ്ഡിന്റെ വിജയം ജപ്പാനിലെ മറ്റ് ക്ഷേത്രങ്ങളിലും സമാനമായ സാങ്കേതികവിദ്യകള്‍ നടപ്പിലാക്കുന്നതിനെക്കുറിച്ചുള്ള ചര്‍ച്ചകള്‍ക്ക് തുടക്കമിട്ടിട്ടുണ്ട്. എന്നാല്‍, പ്രധാനപ്പെട്ട ആചാരങ്ങള്‍ക്കും വ്യക്തിപരമായ ഉപദേശങ്ങള്‍ക്കും മനുഷ്യ സന്യാസിമാര്‍ തന്നെ മുന്നിലുണ്ടാകുമെന്ന് ക്ഷേത്ര അധികൃതര്‍ ഉറപ്പുനല്‍കുന്നു. അതേസമയം, ബുദ്ധമതം നൂറ്റാണ്ടുകള്‍ക്ക് മുമ്പ് ഇന്ത്യയില്‍ നിന്ന് ജപ്പാനിലെത്തിയതുപോലെ, ഇപ്പോള്‍ ആധുനിക സാങ്കേതികവിദ്യയുടെ സഹായത്തോടെ ആ തത്വങ്ങള്‍ ഡിജിറ്റല്‍ ലോകത്തും സംരക്ഷിക്കപ്പെടുന്നു എന്നത് കൗതുകകരമാണ്.