ടിക് ടോക്ക് തിരിച്ചു വരുമോ? ഒഴിവുകള്‍ പോസ്റ്റ് ചെയ്ത് ബൈറ്റ്ഡാന്‍സ്

ചൈനീസ് ഷോര്‍ട്ട്-വീഡിയോ ആപ്ലിക്കേഷനായ ടിക് ടോക്ക് ഇന്ത്യയിലേക്ക് തിരിച്ചുവരുമോ? ടിക് ടോക്കിന്റെ മാതൃകമ്പനിയായ ബൈറ്റ്ഡാന്‍സ്, ഗുരുഗ്രാമിലെ ഓഫീസില്‍ ലിങ്ക്ഡ്ഇനില്‍ രണ്ട് ഒഴിവുകള്‍ പോസ്റ്റ് ചെയ്തിട്ടുണ്ട്. ഇതാണ് സംശയം ഉയരാന്‍ കാരണമായത്.കമ്പനിയുടെ വെബ്സൈറ്റ് ഇന്ത്യയിലും ഭാഗികമായി ആക്സസ് ചെയ്യാന്‍ കഴിയുന്നതായി മാറിയതോടെ ടിക് ടോക്കിന്റെ തിരിച്ചുവരവ് സംബന്ധിച്ച അഭ്യൂഹങ്ങള്‍ പ്രചരിച്ചു.

2020-ലെ നിരോധനത്തിന് മുമ്പ് ഇന്ത്യ ടിക് ടോക്കിന്റെ രണ്ടാമത്തെ വലിയ വിപണിയായിരുന്നു. ഏകദേശം 200 ദശലക്ഷം ഉപയോക്താക്കളും ഉണ്ടായിരുന്നു.

യുഎസ് പ്രസിഡന്റ് ഡൊണാള്‍ഡ് ട്രംപ് ന്യൂഡല്‍ഹിയില്‍ ശിക്ഷാ തീരുവ ചുമത്തിയതിനെത്തുടര്‍ന്ന് ഇന്ത്യയും ചൈനയും തമ്മിലുള്ള നയതന്ത്ര ബന്ധത്തില്‍ പുരോഗതി വന്ന സാഹചര്യത്തിലാണ് ഈ നീക്കം.

ഗാല്‍വാന്‍ താഴ്വരയില്‍ ഇന്ത്യന്‍-ചൈനീസ് സൈനികര്‍ തമ്മിലുള്ള ഏറ്റുമുട്ടലിനെത്തുടര്‍ന്ന് 2020 ജൂണില്‍ മറ്റ് 58 ചൈനീസ് ആപ്പുകള്‍ക്കൊപ്പം ടിക് ടോക്കും നിരോധിച്ചു. ദേശീയ സുരക്ഷയും ഡാറ്റ സ്വകാര്യതയും സംബന്ധിച്ച ആശങ്കകളാണ് സര്‍ക്കാര്‍ ചൂണ്ടിക്കാട്ടിയത്. ഹെലോ, ക്യാപ്കട്ട് പോലുള്ള മറ്റ് ബൈറ്റ്ഡാന്‍സ് പ്ലാറ്റ്ഫോമുകളും നിരോധിച്ചു.

എന്നിരുന്നാലും, ടിക് ടോക്കിന്റെ സ്റ്റാറ്റസില്‍ മാറ്റമൊന്നും സംഭവിച്ചിട്ടില്ലെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. ''ഇന്ത്യയില്‍ ടിക് ടോക്കിലേക്കുള്ള ആക്സസ് ഞങ്ങള്‍ പുനഃസ്ഥാപിച്ചിട്ടില്ല. കൂടാതെ ഇന്ത്യാ ഗവണ്‍മെന്റിന്റെ നിര്‍ദ്ദേശം ഞങ്ങള്‍ തുടര്‍ന്നും പാലിക്കും,'' ടിക് ടോക്ക് വക്താവ് ദി ഇക്കണോമിക് ടൈംസിനോട് പറഞ്ഞു .

തിരിച്ചടികള്‍ക്കിടയിലും ബൈറ്റ്ഡാന്‍സ് പരിമിതമായ സാന്നിധ്യം നിലനിര്‍ത്തുന്നുണ്ടെന്ന് ഗുരുഗ്രാം പോസ്റ്റിംഗുകള്‍ സൂചിപ്പിക്കുന്നു.

നിലവില്‍ ഇന്ത്യന്‍ ഉപയോക്താക്കള്‍ക്ക് ടിക് ടോക്ക് ലഭ്യമല്ല - എന്നാല്‍ ഏറ്റവും പുതിയ ജോലികള്‍ കാണിക്കുന്നത് ബൈറ്റ്ഡാന്‍സ് വിപണിയില്‍ വീണ്ടും പ്രവേശിക്കുന്നതിനുള്ള വാതില്‍ അടച്ചിട്ടില്ല എന്നാണ്.